Read Achang HEBRE 13 Bible Online

HEBRE 13 - Achang bible

HEBRE 13

¹Namoq gas vmang vnoeuh nyang changh jyetdap vmang vnoeuh ehnyet tsoq las chixoeuq goh nyeis geh.

²Namoq yhen mha lvbaus boenghwus lyis lhom yoeus las phuqsoe das zis vtohnyhik goh. Housoeh phuqsoe zis dvyhamh gas loeuswons bang lyis masoh mathamh zangh phuqsoe goeus.

³Namoq gas thung lungh bang lyis eq dvgeh thung lungh joq bang teh nyamoq lyis soh nyeis geh. Shanghsenh zis xauh bang lyis namoq nyang shanghsenh nyeis teh soh nyeis geh.

⁴Nyi hwank cho lhyi dius dvnganhmoq phauh nyang chungh bas jungh. Yhensain phoq yhensain nyhiq nyang changh dang yoh jings goh nyeis bas jungh. Mangso ka wotwu dyoq bang yahge nyi shuot lvng shuot bang lyis soetuon das.

⁵Namoq gas ngwis nyoqnoq dah muh dvnganh lyis jhank nyeis geh. Yoh nyhoq yah nhaiqtap nyeis geh: khasoeh ge lyis Mangso ka, Ngos nvng lyis khanhamp eq ma toh khoq das; Ngos nvng lyis khanhamp eq ma doeuh tyamp toh das ge toh.

⁶Housoeh yvmvyah, Yhensain ka ngos lyis pangh soeu nghuot las, Ngos cha lhyi eq ma gyuk noh. Ngos lyis hank cha yoh kuot das! oen yang womh ehnyet yah taiq nyeis goh.

⁷Namoq lyis Mangso dah dang taiq kyoh goeus, xik lyis dah cho shwih she los bang lyis soh nyeis geh. Nyamoq kang khasoeh dwis las khasoeh shei loh goeus yvlyis doms nghamh yoeuh zis yah nyamoq dah lomsjingh yikhyoh lyis toeuq yoeus geh.

⁸Yesu Khristu gas nyinaq, khvnyhik, vcaiq vto dvyhangteh nghuot.

⁹Xikpheh ma nyvng ku, ma xauhgyo ku dah jyauh cho vja ja yah namoq lyis cho vshwih whang nhang goh. Zonoms yah sen, chank chah lyi lyis chank tyink khyvlyis ma nghuot, Mangso dah jyehjuh masyah dyos yom lyis kham yoeus zis gas zes gis. Zonoms yah sen dah lyi gas chank kuot bang lyis cha ma yoh pangh.

¹⁰Yuda jens dah paiq joqyos vkhau mha phuqsoe dah phudyei bang gas yah phon mha dah phudyei cha eq yoh zo das toeuh ma yoh.

¹¹Yuda Phudyei Zainsmuh gas gaunyhauq dah suih lyis yaunos khyuot das phudyei khyvlyis gyingshang thank joqyos mas yoeus wvng loh nghuot laus eq hauh phudyei mvng lyis gas dvp nghe mha dvngheq tyamp.

¹²Haih cho gvng mas Yesu eq nyah suih yah dius jens lyis yaunos masyah cheihshang yoeus das xiklyis wus nghe mha shei kham goeus.

¹³Housoeh yvmvyah yang gas dvp nghe pheh nyah jyank mas thuq e lha nyang kham dah xoqphuh cho lhyi dvgeh chomp kham goh.

¹⁴Khasoeh ge lyis haih nyeisjvng thoq mas yah xiklyis goeng joq dah wus ma bos las, yang gas thang pheh jweh los das wus lyis dvxo nyeis.

¹⁵Housoeh las yang gas nyang lyis yah Yhensain nghuot oen rhen dah nhuot yahge phudyei dah yah Chungh Dang lyis Yhensain Yesu gvng mas, Mangso lhyi vjangh phudyei nyeis goh.

¹⁶Gis dah muh kuot das zis namoq nyang changh pangh goh das cho vtohnyhik goh. Khasoeh ge lyis housoeh teh dah lomhxangh gas Mangso lhyi nhaiqdoeus nhang.

¹⁷Namoq dah uhshe bang dah domsyos gyo las nyamoq taiq toh dang lyis chank kuot nyeis geh. Nyamoq gas nyamoq phuqsoe dah muh cho Mangso lhyi suon xoeuq chah las, namoq ehnyet lyis ma no lo zungh yoeuh dyei nyeis. Namoq nyamoq dah domsyos gyo lyis gas nyamoq kuot dah muh lyis gausyis zis yah kuot das. Housoeh ma nghuot lyis gas nyamoq nhaiqkuk zis yah kuot das las namoq xiklyis chah vkyuh ma bos das.

¹⁸Ngamoq xiklyis malyen lo shvmanh dung nyeis geh. Ngamoq gas ngamoq dah sohseq ehnyet shang shang bos zis soh soh nghuot. Khasoeh ge lyis ngamoq gas shishenh khanghmuh jus cho kuot mes ehnyet tsain bos.

¹⁹Mangso ka ngos lyis namoq jyank mas lvnyap doms jweh los nhang bas jungh, oen yomkat shvmanh dung das xiklyis sang kat.

²⁰Nyah kang lhyi phudyei las shei kham zis yah vcaiq vto thanghchvp lyis kyihau tap goeus las yvng jens dah yvng yoeuh uhjyung Zainsmuh ge, yah Yhensain Yesu lyis Mangso ka shei masyah dwis toq nhang goeus.

²¹Namoq gas nyah nhaiqdoeus cho yoh chank kuot das xiklyis namoq mas chah nyeis, gis dah cho khanghmuh lyis nyenstap Mangso ka dyei bas jungh, Yhensain ka nyang o khyvlyis yah dvyhangteh Khristu gvng mas nyang nhaiqdoeus cho lhyi yang mas kuot bas jungh, Khristu mas vcaiq vto phunk bos bas jungh. Amen.

²²Boekyis eh, hai yomdyei dang lyis jhen zis yah gyo yoeus das xiklyis ngos namoq lyis sang kat. Khasoeh ge lyis ngos namoq lyis lhaih kat haih maussauh gas nyoshoq xing zis ma nghuot.

²³Ngamoq dah vmang vnoeuh Timothi gas thung mhayah luiq los goeus cho namoq lyis seq nhang mes. Nyang lvnyap jweh los lyis gas namoq yah xauhgoh das nyhenshang ngos nyang yah dvgeh los das.

²⁴Namoq dah uhshe bang dvnganh yahge Mangso dah dius nyau dvnganh lyis jeshuh dyei geh. Itali mau mas vmang vnoeuh moq gas namoq lyis jeshuh kat.

²⁵Mangso dah jyehjuh gas namoq dvnganhmoq yah dvgeh joq bas jungh.