Read Achang HEBRE 3 Bible Online

HEBRE 3 - Achang bible

HEBRE 3

¹Mangso khyen lui toh dah ngah Khristan boekyis eh, yang rhen, lomsjingh cho dah Phudyei Zainsmuh duot das xiklyis Mangso nhang kat dah Yesu lyis nghamh yoeuh geh.

²Moshe ka Mangso yhen mha dah nyah muh mas lomluk teh, nyang gas haih muh kuot das nyhenshang nyang lyis khyen kat soeu Mangso lhyi lomluk.

³Yhen tsuk soeu ka hauh yhen thoq lyis nyoqnho ngelang zes bos. Houyah dvyhangteh, Yesu eq Moshe thoq lyis zes dah phunk nyoqnho ngelang lyis chungh cho kham yoeus mon.

⁴Yhen ge yvlyis dius dvyuk yuk yah tsuk toh. Dvnganh yvlyis kuot toh soeu ka Mangso dvnghuot.

⁵Moshe ka Mangso dah yhen mha jyeidwis teh lomluk soeu nghuot las thang pheh Mangso taiq kyoh das cho lhyi taiq soeu nghuot.

⁶Nghuot laus eq Khristu gas Mangso yhen lhyi guon dah Lo nghuot khyvlyis lomluk. Yang eq yang nghamhloms cho lhyi womh ehnyet yahge nghamhnywe zis yah thank shoq zwi zains toh lyis gas, yang nyah yhenbang tsain nghuot.

⁷Housoeh yvmvyah Gyingshang Dyos taiq zis gas: Khvnyhik namoq Mangso dah thwe xauhgyo lyis gas,

⁸Mangso lhyi gomloeus toq las mhanhdyvp mas nghuot shishenh lyis nyang lyis shiwu dah namoq phauh thyeih jens teh ehnyet vthan goh.

⁹Mangso ka namoq dah phauh thyeih moq nyeici zvn top mhanhdyvp mas ngos kuot xoeuq dah muh lyis nyvng laus eq ngos lyis tyi lha shi yoeuh.

¹⁰Housoeh yvmvyah ngos hauh dius jens lyis nhaiqyo las, Nyamoq khanhamp eq lom ma luk, Ngos taiq toh dang lyis chank kuot das zis tsain ngoek, oen taiq goeus.

¹¹Ngos nhaiqyo las nyamoq lyis maukhi zis gas, Ngos nyamoq lyis dyei das noyos mas khanhamp eq ma xauh wvng das, oen.

¹²Boekyis eh, dwis nyeis Mangso mhayah, nungsdoms loh shoq ma shop, seq loms shuot ehnyet bos bang, namoq mas dvyuk eq ma bos bas jungh, zaih nyeis geh.

¹³Nyamoq mas dvyuk eq yaunos yah mhuih jyomh zis xauh las ehnyet than bang ma bweh bweh, lhaihtoh dang mas taiq, Khvnyhik oen, yah xiklyis yoh taiq shih dah shishenh lyis nyeih khanghmuh nyang changh nyang pangh goh nyeis geh.

¹⁴Khasoeh ge lyis Khristan vsaiq bweh los shishenh lyis teh nghamhnywe dah lomsjingh cho mha thang thank jweh shoq goeng goeng zwi zains toh lyis gas, yang dvnganh gas Khristu yah dvgeh muh chomp wons nyeis bang nghuot.

¹⁵Lhaihtoh dang mas taiq zis gas, Khvnyhik namoq Mangso thwe xauhgyo lyis gas, Mangso lhyi namoq dah phauh thyeih moq gomloeus toq uhlyis teh ehnyet vthan nyeis goh, ge.

¹⁶Mangso dah thwe lhyi xauhgyo nyeis goeus lyis eq nyang lyis gomloeus toq bang gas hank tsain nghuot lah? Nyamoq gas Egutu mau masyah Moshe khyuot shwih los bang dvnganh nghuot.

¹⁷Nyeici zvn top Mangso dah nhaiqyo zis xauh bang gas hank tsain nghuot lah? Hauh bang gas yaunos kuot las mhanhdyvp mas lains shei bang nghuot.

¹⁸Nyamoq gas ngos dyei das noyos mas khanhamp eq ma xauh wvng das, ge hank lyis toeuq las Mangso maukhi lah? Nyah dang lyis domsyos ma gyo las gomloeus toq bang lyis toeuq las taiq ma nghuot lhyeh?

¹⁹Housoeh nyamoq ma lomsjingh yvmvyah hauh mau mas ma tsain xauh wvng yvlyis yang yoh nyvng.