Read Achang HEBRE 5 Bible Online

HEBRE 5 - Achang bible

HEBRE 5

¹Phudyei Zainsmuh khanghmuh gas yaunos xiklyis lomhxangh yahge jyungshuk phudyei bas jungh, dius masyah khyen lha dius dah gungsthaiq Mangso lhyi phuqsoe das xiklyis toeuq kat toh zis xauh soeu nghuot.

²Nyah gungs nyang eq cho vja ja mas yomnhuk nyeis las seq cho ma bos bang, chah shuot loh bang lyis noeuh nhamp ehnyet yoh Chixoeuq soeu nghuot.

³Nyang nyang yomnhuk nyeis yvmvyah gohyuk dah yaunos xiklyis kyingh ma nghuot, nyah yaunos xiklyis eq phudyei chah.

⁴Hank eq vsainnyang gungs lyis Phudyei Zainsmuh duot dah nyoqnho ngelang mas yoh khyen toeuq toh zo zis ma nghuot. Aron lyis teh Mangso khi yoeus zis xauh soeu kyingh Phudyei Zainsmuh dvyoh kuot.

⁵Houyah dvyhangteh Khristu eq Phudyei Zainsmuh nyoqnho ngelang mas nyang gungs nyang chungh zo zis ma nghuot, Housoeh kuot das gungsthaiq, Nvng ngah Lo nghuot, Khvnyhik ngos nvng lyis ngah gungs masyah yaus kat, ge taiq dah Mangso yah dvchungh toh.

⁶Nyang gohyos dvdeh mas taiq zis gas, Nvng gas Melkhizedek dah gyamh huon zis xauh soeu, vcaiq vto phudyei soeu nghuot, ge.

⁷Yesu gas gungsshoh mas kang dwis nyeis shishenh lyis, nyang lyis shei masyah yoh khyuot yoeus soeu Mangso lhyi ngausdyeis ngausnhvp nyoqdyeis gyoh zis yah shvmanh dung sang cho kuot goeus. Yhensain Yesu gas ehnyet nyhen mha gyoh las kyauh soeu nghuot yvmvyah Mangso eq nyang sang cho lhyi gyo yoeus dyei.

⁸Nyang gas Mangso dah lo nyang nghuot nyeis laus eq, shanghsenh zis kham lha domsyos gyo cho lhyi xuq yoeus.

⁹Nyang lyis dyinghjet soeu dye kuot dyei goeus ya, nyang gas domsyos gyo bang dvnganh xiklyis vcaiq vto khyuot yoeus cho dah vpom bweh los.

¹⁰Mangso eq nyang lyis Melkhizedek dah gyamh huon dah Phudyei Zainsmuh nghuot ge taiq hoeuh dyei.

¹¹Haih cho yah sen lha ngamoq taiq das cho nyoshoq bos. Nghuot laus eq namoq gas lvnyap ma seqgyo yvmvyah namoq lyis phui kyoh das zis yau.

¹²Shishenh suon yoeuh lyis namoq gas jyauh bang duot gis goeus, nghuot laus eq Mangso dah cangxeih vpom dang lyis yangh namoq lyis dvyuk yuk jyauh chah joq shih. Namoq gas wom than zo das gungsthaiq nauh dvshuk chah nyeis shih.

¹³Nauh dvshuk shih soeu hank laus eq shuot cho yahge jus cho yah sen lha seq gvn dah thungh phuh cho ma bos dah lonoeuh dvnghuot nyeis shih.

¹⁴Than dah wom gas kuh goeus bang xiklyis nghuot las, nyamoq gas kuot man gvng mas gis gang seq gvn bang nghuot.