Read Achang HEBRE 6 Bible Online

HEBRE 6 - Achang bible

HEBRE 6

¹Housoeh yvmvyah namoq gas Khristan lomsjingh cho dah dang vpom lhyi toh khoq las lomsjingh cho mha nhaiqbos ung gying goeus bang yah phi dah jyauh cho pheh cheh loh goh.

²Jeisnyhop kham cho, loq kih muh huon cho, shei masyah dwis toq cho yahge vcaiq vto soetuon xauh cho jens lyis doms puk jyauh las vpom xi das zis ma chah lo.

³Gvshih yang xik pheh toq loh goh! Mangso bauh lyis gas yang haih yvlyis nyang kuot das.

⁴Khasoeh ge lyis hau lomsjingh cho mhayah nungs doms loh goeus bang lyis ehnyet dvlhain doms thaiq nhang das cho khasoeh gis bweh das lah? Nyamoq gas Mangso dah bvng yvmas dvlhain nyeis ku goeus las maukhung mha dah jyehjuh jyungshuk lyis wu yoeuh zis yahge Gyingshang Dyos lyis chomp kham yoeus ku goeus bang nghuot.

⁵Tsai, nyamoq gas Mangso dang gas gis yvlyis eq, thang caiq yah sen dah yomsoq lyis eq vsainnyang xauh kham zo las seq goeus bang nghuot.

⁶Housoeh bweh thang lhyi gvshih nyamoq gas nyamoq dah lomsjingh cho lhyi tyamp goeus. Nyamoq gas Mangso dah Lo lyis dvlhain doms taplhangh las moqphung xikkhonh mas maphauh madanh xoqphuh nhang yvmvyah nyamoq lyis nhaiqlom doms thaiq das cho khasoeh eq ma gis bweh lo.

⁷Nyoshoq lhain wus gyon dah mau jeis lyis lhom yoeus las phuk tsungh bang dah xiklyis vkyuh bos dah jyo yuk kuh nhang dah nyeisjvng lyis Mangso shvmanh jyehjuh tsoq dyei nyeis.

⁸Nghuot laus eq hauh nyeisjvng gas zoeu zains yahge nyoq kyingh dvyuk los nhang lhyi ka chah vkyuh ma bos thoq lyis magoh Mangso dah gyukphoh nhoengh zis yahge nyi mas ngheq tyamp zis xauh das.

⁹Jyetdap bang eh, ngamoq heisoeh taiq laus eq, namoq yah sen lha ngamoq nghamh kuk nyeis. Namoq gas hau khyuot yoeus cho yah sen lha zes gis dah shvmanh jyehjuh xauh yoeus goeus cho lhyi ngamoq seq.

¹⁰Khasoeh ge lyis Mangso ka lyi ma chi soeu ma nghuot. Nyang gas namoq wons wuq los goeus dah muhzoh lyis eq, namoq Yhensain lhyi jyetdap cho Chixoeuq das xiklyis lai loh goeus shishenh lyis yah gvshih jweh shoq Khristan nyang changh pangh goh cho lhyi eq, Mangso ma tohnyhik dyei.

¹¹Yang omes dah cho zainsmuh gas namoq dah nghamhloms cho dyingh los shoq yuk khanghmuh gas vsainnyang omes ehnyet lyis thang thank jweh shoq goeng joq nhang das cho nghuot.

¹²Ngamoq gas namoq lyis lan bang ma bweh nhang mes. Nghuot laus eq lomsjingh zis yah ehnyet xing bang bweh las Mangso dyei dah vso vlho kham yoeus bang teh namoq lyis bweh los nhang mes.

¹³Mangso Abraham lyis dangthoengh toh uhlyis, nyah dangthoengh vgus kuot das cho maukhi toh. Nyah thoq lyis zes soeu ma bos lo las, nyah nyings yoeus zis yah maukhi toh.

¹⁴Mangso ka, Ngos nvng lyis jyoengh shvmanh dyei das; vnyau vshih lyis jebais los nhang das, ge.

¹⁵Abraham gas jhen las langh nyeis yvmvyah, Mangso dah dangthoengh yah sen lha vso lhyi xauh kham yoeus.

¹⁶Dius gas maukhi uhlyis vsainnyang thoq lyis zes kuh soeu dah nyings yoeus las mau gyangh khi zis yahge nyamoq dah phyen-goh cho dvnganh lyis hau maukhi dang yah doengs nhang, dye nhang.

¹⁷Mangso ka nyang nghamh toeuq toh cho ma thaiq loh nhang cho lhyi dangthoengh vso vlho kham yoeus bang lyis bvng bvng Chixoeuq mes. Housoeh las nyah dangthoengh mas maukhi dang lhungh kat.

¹⁸Housoeh hau dangthoengh yahge maukhi dang aiq ja yah ma gis thaiq loh cho nghuot zis yahge houyah sen lha Mangso ka hwah dang yoh taiq zis ma nghuot. Housoeh las nyang lyis nges las sam cho xauh yoeus bang ge yang gas, yang lyis dyei dah nghamhloms cho lhyi goeng goeng zwi zains toh das nyhenshang yomdyei cho nyoshoq xauh yoeus goeus.

¹⁹Yang gas hau nghamhloms cho lhyi yah kang dwis cho nyhenshang jywangh dvkoeuq teh xauh kham yoeus goeus. Hau nghamhloms cho ka sam joq goeng joq las maukhung yhenmuh khau mha, gos toh dah misseh vkhau mha jweh wvng loh goeus.

²⁰Yhensain Yesu gas yah gungsthaiq hauh joqyos mas, yah xik pheh jweh wvng nyeis goeus las Melkhizedek dah gyamh huon cho yah, vcaiq vto phudyei zainsmuh bweh loh goeus.