Read Achang HEBRE 8 Bible Online

HEBRE 8 - Achang bible

HEBRE 8

¹Gvshih ngamoq taiq kyoh nyeis cho dah dang vgungs gas, yang gas maukhung mha Gywes So Shoenkkhyi yah dyingh dah hwankti tank loqyos shot pheh tsung toh dah Phudyei Zainsmuh yoh toh.

²Nyang gas gyingshang thank joqyos mas Phudyei Zainsmuh muh wons wuq nyeis. Hauh joqyos gas maukhung ge, dius yah ma kuot, Mangso nyang kuot toh dah zvng gyingh nghuot.

³Phudyei Zainsmuh khanghmuh gas jyungshuk yahge gaunyhauq phudyei lyis Mangso jyank mas phudyei das xiklyis toeuq kat toh bang nghuot. Houyah dvyhangteh yah Phudyei Zainsmuh eq nyang mas lomhxangh lainh das xiklyis phudyei dvja chah joq.

⁴Nyang nyeisjvng thoq mas kyingh dvnyeis lyis gas, phudyei soeu khasoeh eq yoh duot das zis ma nghuot. Khasoeh ge lyis Yuda lyi yah dvyhangteh jyungshuk yah phudyei dah phudyei bang nyeis goeus.

⁵Phudyei bang khyvlyis nyamoq kuot dah muh gas maukhung mha paiq cho dah yikhyoh dah siyet dvnghuot. Moshe kuot los dah muh eq houyah dvyhangteh nghuot. Khasoeh ge lyis Moshe ka hau gyingshang dah Zvng kuot bah ge lyis, Mangso nyang lyis boms thoq mas, ngos nvng lyis chixoeuq goeus yikhyoh vgus hau dvnganh yoh kuot shoq zaih nyeis aq, ge taiq yvmvyah nghuot.

⁶Nghuot laus eq gvshih gas gohtoeu phudyei bang yoh dah muh thoq lyis zes dah phudyei muh Yesu lyis dyei goeus. Mangso yah dius dah jo mas Yhensain Yesu kuot dyei dah thanghchvp lyi gas zes gis dah thanghchvp nghuot. Khasoeh ge lyis hau thanghchvp gas xik lyis thoq lyis zes gis dah dangthoengh mas vpom toh.

⁷Cangxeih thanghchvp mas tswi ma bos zis jyoeng lhyi ka thang lhyi aiq vkoeuq lyis kuot toh dais ma bos lo.

⁸Nghuot laus eq Mangso ka nyah dius nyau lyis yobos huon zoh lyis taiq zis gas, Israel vnyau jens yah eq, Yuda dius nyau jens yah eq thanghchvp saiq toh das buisnyeis jweh los das.

⁹Hau thanghchvp gas, Ngos nyamoq lyis loq masyah she lha, Egutu mau masyah shwih los uhlyis ngos nyamoq dah phauh thyeih moq yah toh dah thanghchvp yah doeusgoh das zis ma nghuot. Nyamoq ngos yah toh dah thanghchvp mas dang ma jings yvmvyah, Ngos eq nyamoq lyis ma yoeuh ma gomh, ge Yhensain taiq.

¹⁰Gvshih hai thanghchvp gas jweh los das buisnyeis dah thang lhyi Israel vnyau jens yah Ngos toh das thanghchvp nghuot. Ngos nyamoq dah ehnyet khau mha ngah lyi kat toh dyei das, Nyamoq nhaiqlom mas lhaih toh das. Ngos nyamoq dah Mangso duot das las, nyamoq eq ngah dius duot das.

¹¹Nyamoq mas hank eq vsainnyang yhenkyoh changh lyis eq, vsainnyang boekyis changh lyis eq, Mangso lhyi seq geh oen jyauh chah das zis ma nghuot: khasoeh ge lyis ngis thank masyah kuh thank jweh shoq dvnganhmoq ngos lyis tsain seq das.

¹²Ngos nyamoq dah yobos lyis khyuot dyei las, nyamoq shuot cho lhyi ma soh dyei lo das, ge Yhensain taiq.

¹³Hau thanghchvp saiq dah cho taiq dah vjyuk gas, Mangso ka cangxeih thanghchvp lyis vcauh kuot tyamp cho nghuot; cauh las yom tyamp zis cha laus eq ma nyangh lyis wui das.