Read Achang YAKU 1 Bible Online

YAKU 1 - Achang bible

YAKU 1

¹Mangso yahge Yhensain Yesu Khristu dah jyeidwis nghuot dah Yaku gas, mungkvn gonh nyeis dyos joq dah Mangso dius jens lyis jeshuh kat.

²Ngah boekyis eh, shiwu zis vja ja xauh uhlyis namoq xiklyis gaus cho nghuot oen lhom yoeus geh.

³Khasoeh ge lyis namoq dah lomsjingh ehnyet yah housoeh teh shiwu cho lhyi yoh ung tyamp uhlyis vsainnyang mas yoh kham dah yom lung los yvlyis namoq seq.

⁴Namoq gas chah cho mha laus eq chah zis ma bos, dyinghjet nyeis bas jungh, namoq dah jhen ehnyet lyis thang thank jweh shoq goeng joq nhang geh.

⁵Nghuot laus eq namoq mas dvyuk yuk joeui chah nyeis lyis gas Mangso jyank mas shvmanh dung bas jungh, Mangso ka nyang lyis hauh cho dyei das: khasoeh ge lyis nyang gas dvnganh lyis magons magoh jyehjuh khyvlyis dyei nyeis soeu nghuot.

⁶Nghuot laus eq, namoq shvmanh dung uhlyis loms shuot ehnyet ma bos bos, lomsjingh ehnyet yah dung chah. Loms shuot soeu hank laus eq lyeis muot las toq dah thomh mas jeisphauq yah doeusgoh.

⁷Housoeh teh soeu ka nyang kuot cho dvnganh mas nyah ehnyet ma yoh nghamh thyet las ehnyet ma thyeh thyet soeu nghuot.

⁸Nyang gas ehnyet aiq ja bos soeu nghuot las, Yhensain jyank masyah cha eq xauh yoeus das oen ma nghamh noh.

⁹Nyungs dah Khristan vmang vnoeuh gas, nyang lyis Mangso toeu toq uhlyis gaus bas jungh.

¹⁰Dis dah Khristan vmang vnoeuh ka, Mangso nyang lyis nyhen mha khyoq zis xauh lyis gaus nyeis chah: khasoeh ge lyis dis bang gas mhanhdyvp mas ban teh wui loh das.

¹¹Buis gas gywes ngeh los lyis ban zains ngeh kyuk tyamp. Ban buh eq gywis gyoh zis yah ban yungh dah vwot gas dyoq tyamp. Houyah dvyhangteh dis soeu ka nyah muhzoh kuot nyeis lyis dyoqbis las dyuk tyamp das.

¹²Shiwu zis xauh lyis lomluk nyeis soeu ka ngelhoq: khasoeh ge lyis hauh soeu ka housoeh teh shiyoeuh cho lhyi yoh lai ung lhyi Mangso ka nyang lyis jyetdap bang lyis dyei das ge thoengh toh dah kang lhyi jyungshuk khyvlyis xauh kham yoeus das.

¹³Dius dvyuk housoeh teh dah shiwu zis xauh lyis, Mangso ka ngos lyis shiwu, ge yoh taiq das zis ma nghuot. Khasoeh ge lyis ma gis zis gas Mangso lhyi yoh shiwu zis ma nghuot. Tsai, nyang hank lyis eq shiwu nyeis zis ma nghuot.

¹⁴Nghuot laus eq dius dvyuk shiwu zis xauh ge zis gas, vsainnyang ehnyet obos cho yah she loh yvmas chank loh las hauh jons duot loh yvlyis taiq zis nghuot.

¹⁵Hau obos ehnyet yenh goeus ya yaunos lyis khoeu kat. Yaunos yenh goeus ya shei cho lhyi khoeu kat.

¹⁶Ngah jyetdap boekyis eh, chowhang vwhang goh.

¹⁷Gis las dyinghjet dah jyehjuh jyungshuk dvnganh gas maukhung mhayah, maukhung bvng zis lyis tsain gvnkhanh toh dah Mangso mhayah los zis nghuot. Nyang mas phanh phuk nyeis gvng mas thaiq loh shaih loh cho yahge siyet ma bos.

¹⁸Nyang gvnkhanh toh yvmas yang gas cangxeih joqyos yoh dah vxeih vnyau duot bas jungh, nyang o khyvlyis hau jyoeng dang yah nyang yang lyis yaus kat.

¹⁹Ngah jyetdap boekyis eh, haih cho comh geh. Yuk khanghmuh gas gyo yoeus das zis nyap bas jungh, nghuot laus eq dang taiq das zis yahge nhaiq yo das zis vgyen.

²⁰Dius dah nhaiqyo zis gas Mangso o dah dan cho lhyi yoh bweh nhang zis ma nghuot.

²¹Housoeh yvmvyah ma lhoq ma shang dah wotwu khanghmuh yahge ma gis wotwu dvnganh lyis shang tyamp geh. Ehnyet nyhen mha gyoh zis yah Mangso dah domsyos gyo las, nyang namoq ehnyet mas kat toh dyei goeus, namoq lyis yoh khyuot yoeus dah hauh dang lyis lhom yoeus geh.

²²Nyah dang lyis xauhgyo khyvlyis yah kyingh vsainnyang gungs lyis ma mhuih jyomh bas jungh, hauh dang lyis chank kuot nyeis geh.

²³Hauh dang xauhgyo las ma chank kuot soeu hank laus eq vsainnyang nyoqnho lhyi bvngtoenk mas yoeuh zo soeu yah doeusgoh.

²⁴Nyang gas nyah gungs lyis yoeuh zo lho lha thuq loh yah dvyih nyah gungs khasoeh teh zis tohnyhik tyamp.

²⁵Nghuot laus eq dius lyis lhuiq kat dah dyinghjet lyi lyis yoeuh tsuk toh soeu ka hauh lyi lyis xauhgyo las doms tohnyhik tyamp soeu ma nghuot, tsoq las chank kuot soeu nghuot yvmvyah nyang kuot yvlyis Mangso shvmanh zis xauh das.

²⁶Ngos gas lomsnoq cho chank soeu nghuot ge namoq mas dvyuk yuk nghamh laus eq, vsainnyang lhyo lhyi ma yoh joeu lyis gas nyah lomsnoq cho ka vkom dvnghuot las nyah gungs lyis mhuih jyomh soeu dvnghuot.

²⁷Uwus Mangso xikkhonh mas lhoqshang lha gyingh dah lom noq cho ge zis gas, yaukyenh xauh nyeis dah chauhmuh chauhlo jens lyis bos yoeuh bos gomh las, vsainnyang gungs lyis mungkvn dah vwot v-oeu yah ma zangh shoq zaih las nyeis cho nghuot.