Read Achang YAKU 2 Bible Online

YAKU 2 - Achang bible

YAKU 2

¹Ngah boekyis eh, namoq gas yah phunk bos Yhensain Yesu Khristu lyis lomsjingh bang nghuot zis yah dvyhangteh dius jens lyis yoh nyvng dah gungs lyis yoeuh las nyoqnho khyen khyvlyis dvyuk yah dvyuk khanhamp eq vzomh goh.

²Dangtoeuq, dis las xing loqkyop kyop, phauhdap dyimis wuot soeu dvyuk yahge vjuiq vnyho dyimis wuot dah nyungs soeu dvyuk namoq huom yvmas jweh los oen goh.

³Namoq gas hau phauhdap dyimis wuot soeu lhyi zes phauh nyang zis yah, Haih gis thank joqyos mas tsung aq ge lho lha; nyungs soeu lhyi ka, Nvng thyimha yap aq, nghuot ya ngah khyeiyang mas tsung aq, ge sang lhyi ka,

⁴namoq mas khwih khyamh cho lhyi bweh nhang lha, ma gis dah nghamh ehnyet yah dang thang thyet bang bweh goeus yvmvyah yaunos tsain bos.

⁵Ngah jyetdap boekyis eh, gyo yoeus geh: Mangso ka haih mungkvn mas nyungs bang lyis lomsjingh cho mha dis bang bweh das zis yahge nyang lyis jyetdap bang lyis thoengh toh dah munghdan lyis xauh sain yoeus das nyhenshang nyang nyamoq lyis khyen yoeus.

⁶Namoq yuk nyungs bang lyis ma phauh ma danh kuot goeus nyvng! Namoq lyis zaiq las soetuon bang xikkhonh mas lang she loh bang gas hank tsain nghuot lah? Hauh zis gas dis bang nghuot.

⁷Nyamoq gas namoq lyis dyei toh goeus dah nyings gis lyis jwangh bang tsain nghuot.

⁸Namoq gas, Nah yhenkyoh lyis nvnyang gungs lyis teh yoh jyetdap das, ge lhaihtoh dang mas bos. Maukhung munghdan lyi lyis domsyos gyo lyis gas namoq gis las jus yvlyis kuot nyeis.

⁹Nghuot laus eq namoq gas dius lyis yoh nyvng dah gungs lyis yoeuh las nyoqnho khyen khyvlyis lhom yoeus las zomh nghuot lyis gas namoq yaunos tsain yoh zis yahge hauh Lyi gas namoq lyis lyi lhyweq soeu khyvlyis dang thang thyet das.

¹⁰Hank laus eq lyi dvkoeuq lhyweq goeus ya lyi dvnganh yvlyis lhyweq goeus.

¹¹Khasoeh ge lyis, nyi shuot lvng vshuot, ge tung toh soeu nyang, Dius vsat, ge taiq nyeis shih. Nvng gas nyi ma shuot laus eq dius sat lyis gas nvng lyi lhyweq soeu nghuot goeus.

¹²Housoeh yvmvyah namoq gas yang lyis lhuiq kat dah lyi yah soetuon zis xauh das bang teh taiq las, chank kuot loh geh.

¹³Khasoeh ge lyis nhaiqnyen das ehnyet ma bos soeu lhyi soetuon uhlyis Mangso ka nyang lyis nhaiqnyen cho Chixoeuq das zis ma nghuot. Nghuot laus eq Nhaiqnyen ehnyet gas soetuon cho lhyi ung tyamp goeus.

¹⁴Ngah boekyis eh, namoq dvyuk yuk gas, Ngos gas lomsjingh cho bos, ge taiq laus eq, nyang muh khanh yvmas kanghjyoeng ma chixoeuq lyis gas cha vkyuh bos lah? Hau lomsjingh zis gas nvng lyis yoh khyuot yoeus lhyeh?

¹⁵Dangtoeuq: dyimis chah nyeis zis yahge zoshuk das zonoms dyet dah vmang vnoeuh, nghuot ya nhamhmuh jens nyeis oen goh.

¹⁶Namoq gas nyamoq lyis, Namoq lyis Mangso shvmanh dyei bas jungh! Jo jo zo geh, nywe nywe nyeis geh, ge las kang xiklyis yhaugyen zis ma dyei lyis gas chah vkyuh bos das lah?

¹⁷Lomsjingh cho mha eq houyah dvyhangteh nghuot. Muhzoh ma bos dah lomsjingh cho ka vshei dvnghuot.

¹⁸Nghuot laus eq dvyuk mas lomsjingh cho bos las, gohtoeu dvyuk mas muhzoh bos, ge dvyuk yuk ngos lyis taiq los lyis gas, muhzoh ma bos dah lomsjingh cho ngos lyis Chixoeuq aq; ngos gas ngah lomsjingh cho lhyi ngah muhzoh yah nvng lyis Chixoeuq das.

¹⁹Mangso ka dvso kyingh dvnghuot yvlyis nvng jingh lhyeh? Nghuot goeus, gis joq! Yius jens eq lomsjingh nyeis las tsain gyuk nvn nyeis.

²⁰Koh soeu eh, muhzoh ma bos dah lomsjingh cho ka vkom dvnghuot yvlyis nvng seq mes lhyeh?

²¹Yah phauh thyeih Abraham gas Mangso xikkhonh mas dan cho lhyi khasoeh yoh yoeus lah? Nyang gas nyah lo Isak lyis phon mha phudyei ge dah muhzoh yah xauh yoeus.

²²Nyah lomsjingh cho yahge muhzoh dvgeh khanh nyeis zis yahge nyah lomsjingh cho ka nyah muhzoh gvng mas yoh dyinghjet los goeus yvlyis nvng ma nyvng ma seq lhyeh?

²³Abraham gas Mangso lhyi lomsjingh las nyah lomsjingh cho gvng mas nyang lyis dan, ge lhom yoeus dyei, ge dah lhaihtoh dang gas dyingh nyuk los. Housoeh las Abraham gas Mangso dah buisnoms phoq ge dah nyings lyis kham yoeus goeus.

²⁴Housoeh las dius gas nyah lomsjingh gvng mas kyingh ma nghuot, nyah muhzoh yah Mangso dah xikkhonh mas dan soeu yoh bweh los yvlyis namoq nyvng.

²⁵Nghe nyhiq Rahab dah cho eq houyah dvyhangteh nghuot. Nyang gas joh yoeuh bang lyis lhom yoeus lho lha, gohcho yah luiq thuq loh das xiklyis pangh kat dah muhzoh gvng mas Mangso xikkhonh mas dan cho lhyi xauh lhom yoeus.

²⁶Housoeh las gungs mas dyos ma bos lyis gas vshei dvnghuot teh, muhzoh ma bos dah lomsjingh cho eq vshei dvnghuot.