Read Achang YAKU 3 Bible Online

YAKU 3 - Achang bible

YAKU 3

¹Ngah boekyis eh, yang svra moq gas gohyuk thoq lyis zes than dah lyi yah soetuon zis xauh das yvlyis soh zis yah, namoq svra nyoshoq yuk vkuot mes goh.

²Yang dvnganhmoq gas dvsoq soq lyis seq shuot bang nghuot. Nghuot laus eq dius dvyuk gas nyang taiq yvmas khanhamp eq ma shuot nghuot lyis gas hauh soeu ka dyinghjet soeu nghuot las nyah gungs gonh lyis yoh joeu soeu nghuot.

³Yang gas nyang lyis yah dang gyo nhang das xiklyis nyang nhuot mas thyeq lungthungh kat lyis yang o yvpheh yoh loh nhang.

⁴Nghuot ya sangpho dvkoeuq lyis nghamh yoeuh goh, Svsoh kuh dah sangpho lhyi than dah lyeismuh jyang yah bat zis xauh laus eq, svsoh ngis dah shvp yah yoh joeu las sangpho komp soeu loh nhang mes yvpheh loh nyeis.

⁵Lhyo ka houyah dvyhangteh nghuot. Houka gungsdoeus mas vmhauhlo dvnghuot laus eq svsoh kuh cho jeis lyis seq moengs. Vtsihlo dah nyi jyenh gas kha iq teh dah dainhjeis yos lyis yoh ngeh tyamp yvlyis nghamh yoeuh geh.

⁶Lhyo eq nyi yah doeusgoh. Lhyo yah gungs shoh dah gungsdoeus mas ma gis ma shop dah mungkvn nghuot las gungs gonh mas hau ma shop yvlyis dyingh los nhang. Lhyo ka munyi yah nyang, yah kang dwis cho gonh lyis ngheq kat.

⁷Yang cangsoeu dius gas gohtoeu yewus ja khanghmuh, nghoq ja khanghmuh, shweh loh ja yahge jeis khau mha dah oengdoq vja ja lyis yoh mhiq las hounyhoq zis tsain mih.

⁸Nghuot laus eq lhyo lhyi ka hank eq ma yoh mhiq: hauh zis gas ma gis ma shop joq zis yahge ma yoh guon toh las shei nhang dah nyonoq yah dyingh joq.

⁹Yang gas lhyo lhyi, yah Yhensain Uwus Mangso lhyi chungh yvmas eq, Mangso dah gungsdoeus lho yah dvyhangteh gvnkhanh toh goeus dah dius nyang changh yah nhoengh khan goh yvmas eq, yhung nyeis.

¹⁰Nhuot dvkoeuq kyingh masyah Chungh Dang yahge nhoengh dang thuq los. Ngah boekyis eh, houka namoq mas ma bweh oeng.

¹¹Jeisthuq dwang dvkoeuq kyingh masyah jeis nghamh yahge jeis khoh yoh thuq kat zis ma nghuot.

¹²Ngah boekyis eh, maiphang zains mas tsanlun shih, zvbiq nwis mas maiphang shih ma yoh shih. Houyah dvyhangteh coh ngvm jeis thuq dwang gas nghamh dah jeis ma yoh thuq nhang.

¹³Namoq mas joeui bos las seq cho bos soeu dvyuk yuk bos lah? Hauh soeu ka nyang joeui bos cho lhyi nyah dah gis dah kang dwis cho yah eq, noeuh nhamp las joeui bos khyvlyis gis dah muhzoh kuot zis yah eq kanghjyoeng Chixoeuq bas jungh.

¹⁴Nghuot laus eq namoq ehnyet mas noh goh cho, nhaiq khoh, namoq nyang vkyuh dvxo ehnyet bos lyis gas, namoq joeui bos ge nghamh las khwank zis yah hau jyoeng cho lhyi shuot dah yobos vkuot goh.

¹⁵Housoeh teh joeui ka maukhung mhayah los dah joeui ma nghuot: houka mungkvn yahge dyos cho ma nghuot dah suih shoh yahge yius gomloeus yah dvsen.

¹⁶Hauh yvmas noh cho, vsainnyang vkyuh dvxo cho, nhunk cho yahge ma gis ma shop cho vja ja bos yvlyis nyvng.

¹⁷Nghuot laus eq nyhang mhayah jweh los dah joeui ka, cangxeih gas tsingh-kan, hauh thang lhyi nyenstap, noeuh nhamp, dap goh cho lhyi bweh nhang thoq lyis nhaiqnyen shoh gyo cho yah dyingh las gis dah muhzoh ge dah vshih lyis xauh yhomh yoeus. Houmha nyoqnho khyen cho yahge vguons kuot cho ma bos.

¹⁸Hau gis dah cho ka nyenstap muh wons bang nyenstap cho mha nyau khyoq las xauh yhomh yoeus dah jyo nyau shih nyau nghuot.