Read Achang YAKU 4 Bible Online

YAKU 4 - Achang bible

YAKU 4

¹Namoq mas zan goh cho yahge dyoqgoh nyens goh cho ka kha mhayah los lah? Houka namoq dah gungs shoh pyo cho omes mhayah thuq los las vjangh zan goh nyeis.

²Namoq gas vyhang dvja ja lyis o lha hauh yvlyis ma yoh los lyis dius sat das zis cicont nghuot. Namoq svsoh o mes laus eq ma tsain yoh yvmvyah dyoqgoh zan goh nyeis. Namoq o zis namoq ma yoh: khasoeh ge lyis namoq hauh nyhenshang Mangso lhyi ma dung yvmvyah nghuot.

³Namoq dung lyis ma tsain xauh yoeus: khasoeh ge lyis namoq kuot dah cho ka ma gis namoq nyang dah pyo cho mha yhung das xiklyis dvdung yvmvyah ma tsain xauh yoeus.

⁴Namoq gas lom ma luk bang nghuot nyvng! Mungkvn yah buisnoms kuot zis gas, Mangso dah jeswus bweh nyeis ge zis lyis namoq ma seq goh lhyeh? Mungkvn dah buisnoms bweh mes soeu hank laus eq vsainnyang gungs lyis Mangso dah jeswus bweh nhang nyeis.

⁵Yah jyank mas Mangso kat toh dyei dah dyos gas noh dah ehnyet dyingh joq ge dah lhaihtoh dang mas jyoeng cho ma bos oen namoq nghamh goh lhyeh?

⁶Nghuot laus eq Mangso yang lyis dyei dah jyehjuh gas yom zes bos. Mangso ka khwank bang lyis kyamp toh laus eq, ehnyet nyhen mha gyoh bang lyis jyehjuh dyei, ge lhaihtoh dang mas taiq zis yah dvyhangteh nghuot.

⁷Housoeh las Mangso dah o mha gyoh nyeis las nyang o cho chank geh. Satan lhyi thoenk tyamp geh; housoeh lyis nyang namoq jyank masyah phang loh das.

⁸Mangso jyank pheh los geh; hauh uhlyis nyang namoq jyank pheh los das. Yaunos dap bang eh, namoq dah loq lyis cheihshang toh geh; vguons kuot bang eh, namoq dah ehnyet lyis tsingh-kan nhang geh.

⁹Nhaiqkuk nhaiqngis zis yah kaiq ngaus geh; namoq dah yis zis gas ngaus yvpheh, gausyis zis gas chiqjyen yvpheh thaiq tyamp geh.

¹⁰Yhensain xikkhonh mas namoq nhaiqlom nyhen mha gyoh nyeis geh: hauh uhlyis nyang namoq lyis toeu toq das.

¹¹Boekyis eh, namoq nyang changh tyixo dang vtaiq goh. Vsainnyang Khristan boekyis dvyuk lyis tyixo dang taiq, nghuot ya soetuon soeu hank laus eq hauh lyi lyis tyixo thoq lyis magoh hauh yvlyis soetuon soeu eq nghuot. Namoq hauh lyi lyis soetuon lhyi ka, lyi chank bang ma nghuot, hauh yvlyis soetuon bang dvnghuot joq.

¹²Mangso kyingh lyi dyei soeu yahge soe yoh tuon soeu nghuot. Nyang kyingh yoh khyuot yoeus zis yahge yoh mhont tyamp soeu nghuot. Nah yhenkyoh lyis soetuon soeu nvng gas hank nghuot oen nghamh nyeis lah?

¹³Khvnyhik, nghuot ya phvnaq nyeihyo yang dvwus wus mas loh las, houmha dvzvn thoeng lha soenghi kuot las ngwis nyo nyo yoh shoq kuot das ge bang eh, ngos taiq yvlyis gyo yoeuh geh.

¹⁴Namoq gas phvnaq nyeihyo namoq dah kang chamus das zis yangh ma tsain seq. Namoq gas dvsoq kyingh dvthuq los las bi loh dah nyikhauh yah doeusgoh.

¹⁵Mangso gyo lyis gas yang dwis nyeis las haih muh eq thyih muh eq yoh kuot das, ge dah dang gas namoq taiq gis.

¹⁶Nghuot laus eq gvshih gas namoq khwank las tsain moengs nyeis: housoeh moengs cho dvnganh gas shuot cho nghuot.

¹⁷Housoeh yvmvyah gis dah muh kuot das zis seq las ma kuot soeu ka yaunos bos.