Read Achang 1 PETRU 1 Bible Online

1 PETRU 1 - Achang bible

1 PETRU 1

¹Yesu Khristu dah lvgyo ngos Petru gas Pontu, Galati, Kapadokia, Asia yahge Bithuni mau mas boenghwus teh khau nges yenh bang, Mangso khyen yoeus dah dius nyau jens lyis maussauh lhaih kat.

²Nyah Dyos mas gyingshang dius nyau kuot las Yesu Khristu dah domsyos gyo das zis yahge nyah suih yah cheihshang yoeus das nyhenshang Uwus Mangso dah gohlhain yah nghamh toeuq toh zis yah dvyhangteh namoq lyis khyen yoeus goeus. Jyehjuh yahge nyenstap zis gas namoq mas dyingh los bas jungh.

³Yang gas Yhensain Yesu Khristu dah Uwus Mangso lhyi chungh nyeis goh. Khasoeh ge lyis nyah nhaiqnyen ehnyet zainsmuh yah Yesu Khristu lyis shei masyah dwis toq los nhang gvng mas, nyang yang lyis kang vsaiq doms dyei toh goeus las yang mas dwis nyeis dah nghamhloms cho tyink dyei goeus.

⁴Housoeh las yang gas nyah dius nyau xiklyis Mangso tsomh toh, magons magoh dah shvmanh jyehjuh lyis xauh sain das nyhenshang nghamhloms nyeis. Nyang gas ma bop ma yuq, vwot v-oeu ma bos, ma nyhauh loh dah vso namoq nyhenshang maukhung mha tsomh toh dyei.

⁵Houka namoq xiklyis nghuot. Namoq gas lomsjingh gvng mas thang thank shishenh lyis thuq xoeuq das zis sont toh dah khyuot yoeus jyehjuh xiklyis Mangso dah yomsoq yah gomh toh zis xauh bang nghuot.

⁶Namoq xauh nyeis dah shiyoeuh cho vja ja gvng mas nhaiqkuk zis dvyoq xauh laus eq hau khyuot yoeus cho gvng mas namoq svsoh gaus nyeis geh.

⁷Hau shiyoeuh zis xauh dah cho ka namoq Mangso lhyi lomsjingh ehnyet gas gyingh lah, zis khyink yoeuh das xiklyis nghuot. Yoh thyoq dah xing lhyi yangh nyi mas ngheq shauq las khyink tyamp chah las xing thoq lyis zes phauhdap namoq dah lomsjingh cho lhyi eq goeng toenk das nyhenshang khyink tyamp chah. Housoeh lyis Yesu Khristu doms thuq xoeuq buisnyeis lyis chungh dah phunk yahge nyoqnho ngelang lyis namoq xauh kham yoeus das.

⁸Namoq Yesu lyis ma nyvng ku laus eq nyang lyis jyetdap nyeis. Gvshih nyang lyis ma nyvng laus eq nyang lyis lomsjingh nyeis. Housoeh las namoq gas ma thoq taiq lo shoq dah gausyis zis yah gausyis nyeis.

⁹Khasoeh ge lyis Yesu Khristu lyis lomsjingh kang dwis cho dah toeuqkhom nghuot dah namoq dyos kang dah khyuot yoeus cho lhyi xauh lhom yoeus nyeis.

¹⁰Hai khyuot yoeus cho yah sen lha lvpe jens gas yomkat las nyei gyo pheh xo lha Mangso namoq lyis dyei das hau jyehjuh jyungshuk cho nyamoq lvpe pe lha taiq kyoh.

¹¹Hau khyuot yoeus zis yah sen dah jyehjuh gas khah shishenh khah caiq lyis khasoeh khyvlyis jweh das cho lhyi yomkat tsain xo. Nyamoq mas bos, Khristu dah dyos gas hauh shishenh lyis Khristu kham das dah shanghsenh cho lhyi eq, housoeh dye kham thang lhyi eq xauh kham yoeus das phunk lyis eq uhlhomh las Chixoeuq toh goeus.

¹²Nyamoq wons wuq nyeis, taiq kyoh muh gas nyamoq nyang vkyuh xiklyis ma nghuot, namoq xiklyis dvnghuot cho Mangso ka haih lvpe jens lyis Chixoeuq goeus. Namoq jyank mas gausyis loeus chi los bang gas hau lvpe jens uhlhomh las taiq kyoh bang lyis maukhung mhayah nhang kat, Gyingshang Dyos dah yomsoq yah namoq lyis taiq shet yvmvyah namoq xauhgyo goeus. Haih cho lhyi loeuswons bang yangh seqgyo mes.

¹³Housoeh yvmvyah namoq muh kuot loh das nyhenshang namoq ehnyet lyis cicont kuot geh. Yesu Khristu thuq jyweq xoeuq uhlyis namoq lyis dyei das jyehjuh lyis khamkhvv ehnyet ma bos bos, jyoeng zaih zis yah dyingh dyingh nghamhloms nyeis geh.

¹⁴Mangso dah dang lyis domsyos gyo las, namoq xikpheh ma seq shih shishenh lyis namoq dah omes cho khyvlyis suh e lai loh goeus teh tsoq las vdoms kuot goh.

¹⁵Namoq lyis khi yoeus dah Mangso ka gyingshang nyeis zis yah dvyhangteh, namoq eq namoq dah kuot loh cho khanghmuh mas gyingshang nyeis geh.

¹⁶Hau lhaihtoh dang mas eq, Ngos gyingshang nyeis yvmvyah namoq eq gyingshang nyeis geh, ge toh.

¹⁷Hauh thoq lyis dius dvnganh lyis nyoqnho ma khyen, hank eq hank nyang kuot zis yah dvyhangteh soetuon nyeis dah Mangso jyank mas namoq shvmanh dung lyis Nyang lyis Uwus eh, ge tsain dung. Housoeh las haih mungkvn mas namoq kang dwis nyeis gyo lyis nyang lyis gyukwoms nyeis geh.

¹⁸Namoq dah phauh thyeih moq masyah bos lyih las phauh ma dap dah kang dwis cho wotwu masyah namoq lyis cha yah khyuot thaiq toh zis gas namoq seq. Houka seq dyoqbis loh dah ngwis xing teh zis dvja ja yah ma nghuot.

¹⁹Mesyos ma bos, chah zis ma bos dah yvnglo teh dah phauhdap Khristu suih yah dvnghuot.

²⁰Mungkvn ma bos shih lyis yah Mangso ka nyang lyis khyen toeuq toh las hai thang thank shishenh lyis namoq xiklyis Chixoeuq kat.

²¹Nyang lyis dwis toq los nhang lha phunk dyei dah Mangso lhyi nyah gvng mas namoq lomsjingh nyeis. Housoeh namoq dah lomsjingh cho yahge nghamhloms cho ka Mangso mha zuk joq.

²²Gvshih namoq gas hau jyoeng cho lhyi domsyos gyo zis yah namoq gungs lyis tsain cheihshang lha, namoq dah lomsjingh boekyis lyis jyoengh jyetdap nyeis. Housoeh las namoq nyang changh ehnyet dvnganh yah[1] jyetdap goh nyeis geh.

²³Khasoeh ge lyis namoq gas dwis nyeis las vcaiq vto nyeis Mangso Dang gvng mas ma seq shei dah ungwes uwus moq lo jens teh doms khoeu kat zis xauh goeus.

²⁴Houka lhaihtoh dang mas, Cangsoeu dvnganh gas mhanh teh nghuot; nyamoq dah phunk dvnganh mhanh buh yah doeusgoh. Hauh mhanh nyhauh tyamp las vbuh eq gywis gyoh tyamp.

²⁵Nghuot laus eq Yhensain dang gas vcaiq vto joq, ge taiq toh. Hauh Dang gas namoq lyis taiq kyoh dah gausyis dang nghuot.