Read Achang 1 PETRU 2 Bible Online

1 PETRU 2 - Achang bible

1 PETRU 2

¹Housoeh yvmvyah namoq gas ma gis cho vja ja yahge, mhuih khwangh cho, tyam cho, noh cho yahge ma phauh gis taiq cho dvnganh yvlyis shang tyamp geh.

²Lonoeuh teh dyos yah sen, gyingh dah nauh lyis vjangh yuot nyeis geh. Housoeh namoq shuk las kuhxing los zis yah khyuot yoeus zis xauh das.

³Lhaihtoh dang mas, Yhensain ka kha iq nhaiqnyen shohgyo dah Yhensain nghuot yvlyis namoq nyang kham yoeus ku khyvlyis tsain seq goeus, ge.

⁴Yhensain jyank mas los geh, nyang gas dius jens yah vkyuh ma bos ge khyen tyamp, dwis nyeis dah luk nghuot. Nghuot laus eq Mangso yah khyen yoeus, phauhdap dah luk bweh los goeus.

⁵Namoq eq dwis nyeis luk teh Mangso jyank mas los las, dyos yah sen dah yhenmuh tsuk yvmas namoq nyang bos wvng las yhung zis kham geh. Hauh joqyos mas Yhensain Yesu gvng mas, Dyos yah sen lha nhaiqdoeus lhom yoeus gis dah lomhxangh lyis Mangso lhyi phudyei das nyhenshang gyingshang phudyei bang teh namoq phuqsoe das.

⁶Khasoeh ge lyis lhaihtoh dang mas eq, Yoeuh aq, ngos Zion mha phauhdap luk dvlom khyen lha yhenthunk luklom khyvlyis khyoq toh las, Hauh yvlyis lomsjingh soeu hank laus eq yom ma gyau das. ge bos.

⁷Namoq lomsjingh bang xiklyis haih luk gas phauhdap. Nghuot laus eq ma lomsjingh bang xiklyis gas, Yhen tsuk bang vkyuh ma bos ge peq tyamp dah luklom gas Yhaugyen dah yhenthunk lukzains bweh goeus, ge.

⁸Tsai gohtoeu lhaihtoh dang dvkoeuq mas Haih luk gas dius jens lyis thungh lains nhang das; nyamoq lyis dyetgyoh nhang dah lukmuh lom eq duot das, ge taiq toh. Nyamoq gas hau Dang lyis ma lomsjingh yvmvyah thungh lains: housoeh tsain bweh zis gas nyamoq xiklyis Mangso dah ehnyet o cho nghuot.

⁹Nghuot laus eq namoq gas, khyen yoeus dah vnyau, hwankti phudyei bang, gyingshang dius nyau yahge Mangso nyang sain nyeis bang nghuot. Housoeh khyen yoeus cho ka namoq lyis soeng soeng noq masyah nyah mauhphoh bvng yvmas khi hwank soeu dah phunk bos muhzoh lyis hoeuh kat dyei das xiklyis nghuot.

¹⁰Namoq eq lai loh goeus shishenh lyis Mangso dius nyau ma tsain nghuot, gvshih gas nyah dius nyau tsain nghuot los goeus. Xik pheh Mangso nhaiqnyen zis ma xauh kham yoeus, gvshih gas nhaiqnyen zis tsain xauh kham yoeus goeus.

¹¹Ngos jyet kang bang eh, namoq gas mungkvn mas gyung suh boenghwus yahge khau nyeis bang teh nghuot las, gungs dyos yah zan goh nyeis, gungsshoh obos cho lhyi khanhamp eq vsomh ma dyei das xiklyis ngos namoq lyis dung kat.

¹²Gohnyau bang gas namoq lyis ma gis zis kuot bang nghuot ge tsuk lyis namoq dah gis muhzoh nyvng las Yhensain doms jweh lyih buisnyeis lyis Mangso lhyi yoh chungh bas jungh, nyamoq xikkhonh mas namoq wotwu gis gis kuot geh.

¹³Yhensain dah nyoqnho lhyi yoeuh las dius jens mas toeuh yoh bang dah o mha gyoh nyeis geh; nyhang thank toeuh yoh dah hwankti o mha laus eq,

¹⁴ma shop muh kuot bang lyis shoenk zis yahge gis dah muh kuot bang lyis chungh das xiklyis, toeuq kat toh zis xauh dah mungh zau jens dah o mha laus eq gyoh nyeis geh.

¹⁵Khasoeh ge lyis namoq gis dah muh khanh gvng mas seq cho ma bos vkoh vpaq ge taiq los dah dang lyis yoh sam nhang das zis gas Mangso o nyeis.

¹⁶Namoq gas luiq bang teh nyeis geh; nghuot laus eq ma gis cho lhyi nghop gos tyamp das xiklyis namoq dah luiq toeuh lyis vyhung goh. Namoq gas Mangso yah sain toh dah jyeidwis jens teh kuot nyeis geh.

¹⁷Yuk khanghmuh lyis phauh geh: namoq dah lomsjingh vmang vnoeuh lyis jyetdap geh; Mangso lhyi gyukwoms nyeis geh; hwankti lhyi phauh nyang geh.

¹⁸Jyeidwis jens eh, namoq dah yhensain o mha yoh gyoh nyeis das. Nhaiqbos las seq nghamh yoeuh bang lyis kyingh ma nghuot, thung thot bang lyis eq phauh nyang cho vlhomuh Chixoeuq geh.

¹⁹Namoq gas Mangso o cho lhyi tsain seq nyeis las namoq ma kham vvng dah shanghsenh xauh kham nyeis lyis gas Mangso ka hauh nyhenshang namoq lyis shvmanh dyei das.

²⁰Namoq gas namoq nyang kuot shuot dah yobos gvng mas kham vvng dah yobos lyis kham nyeis lyis gas cha chungh chank bos lah! Nghuot laus eq jyoeng cho lhyi kuot nyeis goeus lyis eq shanghsenh zis kham lha nos zain nyeis lyis gas Mangso ka namoq lyis hauh nyhenshang shvmanh jyehjuh dyei das.

²¹Housoeh chank kuot das nyhenshang Mangso ka namoq lyis khi yoeus goeus. Khasoeh ge lyis Khristu nyang eq namoq xiklyis shanghsenh xauh zis yahge namoq nyah beszoh mas yoh chank nang bas jungh ge namoq xiklyis yikhyoh toh dyei.

²²Nyang gas yaunos kuot ku zis ma nghuot; nyah nhuot mas mhuih dang hank khanhamp eq ma xauhgyo ku.

²³Nyang lyis ma phauh gis kuot lyis nyang ma doms tauh kuot; nyang shanghsenh kham uhlyis nyang kyuk tant cho cha ma kuot, jyoeng dah soetuon soeu Mangso loq mas nyah dah nghamhloms cho kyauh toh.

²⁴Yang gas yaunos toh tyamp las dan yvmas kang yoh dwis nyeis bas jungh, Khristu nyang hau saiqzains thoq mas, yah yaunos nyah gungs mas wons tyamp dyei goeus: nyah dvm gvng mas namoq gas lhoq gis zis xauh goeus.

²⁵Namoq gas chowhang loh yvng jens teh nghuot. Gvshih gas hau Yvng yoeuh soeu yahge namoq dah gungs dyos lyis tsomh soeu dah thang chank das nyhenshang nyah jyank mas shwih tauh jweh los goeus.