Read Achang 1 PETRU 4 Bible Online

1 PETRU 4 - Achang bible

1 PETRU 4

¹Khristu gas gungsshoh mas shanghsenh zis xauh goeus las nyang mas bos dah nghamh cho yah dvyhangteh, namoq eq vsainnyang gungs lyis yom hont geh. Khasoeh ge lyis gungs shoh shanghsenh kham goeus soeu ka yaunos yah cha ma sen lo.

²Housoeh las gvshih masyah haih mungkvn mas namoq kang dwis das xiklyis nyet shih dah shishenh gyo lyis dius dah gungsshoh o mes khyvlyis ma chank, Mangso dah ehnyet khyvlyis joeu yvmas kang dwis chah.

³Namoq gas lai loh goeus caiq lyis gvgis lo nyangh shoq gohnyau bang kuot mes cho lhyi tsain kuot khoq goeus. Namoq gas lyi ma chank dah muh, ma yungh ma shop dah muh, nyetnau, yhei shuk pwe kuot zis yah vchoqh vlhauq muh, silho paiq cho kuot zis yah kang dwis lai loh goeus.

⁴Gvshih gas nyamoq yah dvgeh ye las zau ma guon dah kang dwis cho mha namoq ma bos lo gvng mas nyamoq mauh las namoq lyis ma phauh gis dang taiq.

⁵Nghuot laus eq nyamoq gas dwis nyeis bang yahge shei goeus bang lyis soetuon das zis cicont toh soeu Mangso dah xikkhonh mas nyamoq nyang dah cho comh toh zis Chixoeuq chah das.

⁶Haih cho gvng mas shei goeus bang lyis eq gausyis dang taiq kyoh goeus. Nyamoq gas gungsshoh khyvlyis kang dwis nyeis uhlyis dius yuk khanghmuh lyis soetuon teh nyamoq soetuon zis xauh goeus bang nghuot. Nyamoq lyis taiq kyoh cho ka Mangso dwis nyeis teh nyamoq dah dyos mas dwis nyeis das xiklyis nghuot.

⁷Vyhang dvnganh dah thang thank shishenh jweh los nyeis. Housoeh las namoq gas shvmanh yoh dung das nyhenshang vsainnyang gungs lyis joeu las phuk soh lhaiq mus geh.

⁸Dvnganh thoq lyis, namoq nyang changh jyetdap goh yvmas shvnanh khying twih toh geh: khasoeh ge lyis jyetdap cho ka yaunos nyoshoq lyis nghop tyamp.

⁹Ma lop lop namoq nyang changh boengh daih goh nyeis geh.

¹⁰Namoq dvyuk dvyuk Mangso jyank masyah lhyenwhei jyehjuh jyungshuk lyis xauh yoeus zis yah dvyhangteh Mangso dah jyehjuh vja ja lyis yvwons yoeus dah lvgungh teh nyang changh nyang gis dah vkyuh xiklyis yhung geh.

¹¹Dvyuk yuk loeus taiq kyoh lyis gas, Mangso dah dang taiq kyoh bas jungh. Dvyuk yuk phuqsoe lhyi ka Mangso dyei toh dah yom yah dvyhangteh phuqsoe nyeis bas jungh. Housoeh lyis nyang kuot muhzoh dvnganh gas Yesu Khristu gvng mas Mangso dah phunk lyis chungh cho bweh das. Yesu Khristu mas phunk yahge yomsoq vcaiq caiq bos joq. Amen.

¹²Jyetdap bang eh, namoq xauh kham zo nyeis, svsoh nos dah shiwu cho ka xikpheh ma bweh ku, gohtseq dah cho jeis nghuot teh vmauh nyeis goh.

¹³Mauh nyeis das gungsthaiq, namoq gas Khristu dah shanghsenh yvlyis Khristu yah dvgeh wvng kham yoeus nyeis yvmvyah gaus nyeis geh. Housoeh lyis nyang nyah phunk thuq jyweq xoeuq uhlyis, namoq svsoh gausyis zis yah dyingh los das.

¹⁴Namoq Khristu thang chank bang nghuot yvmvyah ma phauh gis kuot zis xauh kham lhyi namoq ngelhoq. Houka phunk bos dyos ge Mangso dah Dyos gas namoq mas bos dah vjyuk nghuot.

¹⁵Namoq mas dvyuk yuk shanghsenh xauh lyis houka dius sat soeu, khauh soeu, ma gis ma shop las soetuon zis xauh soeu, svbih dah soe mha bos khank yenh soeu nghuot yvmvyah xauh dah shanghsenh cho ma xauh bas jungh.

¹⁶Nghuot laus eq Khristan nghuot yvmvyah shanghsenh xauh lyis gas, hauh yvlyis vxoq; hauh gungsthaiq Khristu dah nyings xauh kham yoeus las Mangso dah jyehjuh lyis chungh nyeis aq.

¹⁷Soetuon xi das shishenh jweh los nyeis las Mangso dah yhenbang shih soetuon zis xauh das. Yang hau soetuon zis cangxeih xauh lyis gas Mangso dah gausyis dang lyis ma lomsjingh bang dah nyhenshang ka khasoeh nghuot das lah?

¹⁸Lhaihtoh dang mas, Dius gis jens dah xiklyis khyuot yoeus zis xauh das nyhenshang yau lyis gas gywes ma tsungh dah yaunos wons bang gas cha bweh los das lah, ge toh.

¹⁹Housoeh las nyamoq xiklyis Mangso dah ehnyet yah dvyhangteh shanghsenh zis xauh bang gas gis dah muhzoh kuot zis yah, vjangh wontang, nyamoq dah Gvnkhanh Soeu lhyi loms toh bas jungh.