Read Achang 1 PETRU 5 Bible Online

1 PETRU 5 - Achang bible

1 PETRU 5

¹Phung lhyi shwih uhshe soeu dvyuk khyvlyis phung lhyi yoeuh nyeis soeu ngos gas phung uhshe bang mas bos dah namoq lyis khyoeuq kat. Ngos gas Khristu kham dah shanghsenh lyis nyvng dah kanghjyoeng dvyuk khyvlyis yah eq, thuq los das phunk lyis namoq yah dvgeh xauh kham das oen nghamhloms nyeis soeu khyvlyis eq ngos namoq lyis khyoeuq kat.

²Mangso namoq lyis kyauh toh dah yvng phung dah yvng yoeuh bang teh Mangso namoq lyis kuot nhang mes khyvlyis yah dvyhangteh, tsoengh kuot nhang zis xauh dah ehnyet teh ma nghuot, gausyis zis yah vlhomuh yoeuh gomh nyeis geh: uhkung phauh ngwis yoh das nyhenshang kyingh ma nghuot, kuot dyei mes dah ehnyet yah phuqsoe geh.

³Namoq yoeuh gomh das nyhenshang kyauh toh dah phung lhyi guon mes ehnyet yah ma nghuot, hau yvng phung xiklyis gis dah yikhyoh duot nyeis geh.

⁴Hau yvng yoeuh uhjyung thuq los uhlyis namoq gas khanhamp eq ma shen loh dah phunk bos buismuk xauh yoeus das.

⁵Houyah dvyhangteh wotyamh jens eh, nyenhkyi kuh bang dah o mha gyoh nyeis geh. Namoq nyang changh phuqsoe goh das xiklyis namoq dvnganhmoq ehnyet nyhen mha gyoh ge dah huhyhauh lyis wuot chi geh: khasoeh ge lyis Lhaihtoh dang mas, Mangso ka khwank bang lyis kyamp toh laus eq, ehnyet nyhen mha gyoh bang lyis jyehjuh dyei las nyoqnho yoh nhang, ge bos.

⁶Housoeh las Mangso ka nyah dah gis shishenh jweh lyis namoq lyis toeu toq bas jungh nyah dah yomzains loq o mha namoq ehnyet nyhen mha gyoh nyeis geh.

⁷Namoq dah chiqh cho dvnganh nyang lyis kyauh toh geh: khasoeh ge lyis Nyang namoq lyis loqzamh zwi nyeis.

⁸Namoq jyoeng zaih zis yah zungh nyeis geh: namoq dah jeswus ge dah Satan ka, khayuk lyis yoh nyhau tyamp das lah, ge nyings yenh dah khangkhyi teh lhaink yenh.

⁹Namoq gas namoq lhom yoeus goeus dah lomsjingh cho lhyi goeng toenk nhang lha hau jeswus lyis thoenk zan geh. Khasoeh ge lyis mungkvn mas nyeis namoq dah lomsjingh boekyis eq housoeh teh shanghsenh xauh nyeis cho lhyi namoq seq.

¹⁰Nghuot laus eq namoq dvdvm shanghsenh thang lhyi, jyehjuh dvnganh dah Mangso ka namoq lyis Khristu mas dvdain dvlom bweh nhang lha vcaiq vto phunk mas xauh wvng bas jungh, namoq lyis khi yoeus dah Yhensain nyang namoq lyis dyinghjet cho, goeng toenk cho, yom yahge goeng dah vpom dyei das.

¹¹Nyang mas yomsoq vcaiq vto bos joq bas jungh. Amen.

¹²Ngos haih maussauh lyung lyis Sila bos pangh zis yah lhaih kat; ngos nyang lyis wontang dah Khristan vmang vnoeuh oen suon yoeus. Heika jyoeng dah Mangso jyehjuh nghuot cho ngos namoq lyis yomdyei zis yahge kanghjyoeng kat das xiklyis, haih maussauh lhaih kat. Houmha goeng goeng yap joq geh.

¹³Babilon wus[2] mas nyeis, namoq lyis teh khyen yoeus zis xauh dah phung ka namoq lyis jeshuh kat. Ngah lo Makho eq namoq lyis jeshuh kat.

¹⁴Namoq nyang changh jyetdap vlho ge, bvlot tanh zis yah jeshuh goh geh. Khristu dah dius jens dvnganhmoq mas nyenstap zis joq bas jungh.