Read Achang 2 PETRU 1 Bible Online

2 PETRU 1 - Achang bible

2 PETRU 1

¹Yesu Khristu dah jyeidwis yahge lvgyo duot soeu, ngos Simon Petru gas, yah Mangso yahge khyuot yoeus Yhensain Yesu Khristu dah dan cho mha, ngamoq teh phauhdap dah lomsjingh cho xauh yoeus bang lyis dang tying kat.

²Mangso yahge yah khyuot yoeus soeu Yesu Khristu lyis namoq seq gvng mas namoq gas jyehjuh yahge nyenstap cho dyinghjet shoq xauh kham yoeus bas jungh.

³Nyah phunk yahge gis cho lhyi chomp kham yoeus das nyhenshang namoq lyis lui yoeus dah Khristu lyis seq gvng mas Mangso dah gywes so yomsoq gas jyoeng dah lomsnoq cho mha kang yoh dwis nyeis das xiklyis yang mas chah nyeis cho dvnganh dyei goeus.

⁴Haih cho khyvlyis svsoh kuhxing lha phauhdap dah jyehjuh jyungshuk yah sen dah dangthoengh yang lyis dyei toh goeus. Housoeh las haih jyehjuh gvng mas yang gas mungkvn mas dah dyoqbis loh nhang dah nyetnau cho mhayah yoh luiq las soengh choenk gywes tsungh so tsungh bang yoh bweh los.

⁵Haih cho gvng mas namoq lomsjingh cho mha gis cho, gis cho mha seq cho lhungh kat geh.

⁶Seq cho mha vsainnyang gungs lyis joeu cho, vsainnyang gungs lyis joeu cho mha jhen cho, jhen cho mha gywes so lhyi phauh nyang cho,

⁷Gywes so lhyi phauh nyang cho mha vmang vnoeuh sain teh nhaiqbos goh cho, hou mhayah jyetdap sainhnos goh cho lhungh kat geh.

⁸Heinyhoq gas namoq mas bos chah dah kank bos cho tsain nghuot. Haih cho namoq mas magons magoh bos nghuot lyis gas namoq dah Yhensain Yesu Khristu lyis namoq seq zis yah kang dwis cho mha thyvdvng siq siq yah vkyuh bweh nhang das.

⁹Nghuot laus eq hauh kank bos cho lhyi ma yoh soeu ka, we we ma nyvng nyoqjet soeu nghuot las, gohnhamp nyah yaunos masyah cheihshang kat zis xauh cho lhyi tohnyhik tyamp.

¹⁰Housoeh las ngah boekyis eh, namoq lyis Mangso khi lha khyen yoeus cho lhyi vjangh xauh kham das xiklyis yomkat nyeis geh. Housoeh kuot nyeis lyis gas, namoq dah lomsjingh cho lhyi khanhamp eq ma tyamp[1] das.

¹¹Hauh cho chank nyeis lyis gas, yah Yhensain yahge khyuot yoeus soeu Yesu Khristu dah vcaiq vto munghdan mas yoh wvng das toeuh, namoq lyis dyingh dyingh dyei das.

¹²Housoeh las namoq haih cho lhyi tsain seqgyo las lhom yoeus toh goeus dah jyoeng cho mha vpom goeng goeng kuot toh goeus laus eq ngos namoq lyis vjangh taiq kyingh nyeis das.

¹³Ngos kang dwis nyeis shih yoq lyis haih cho yah sen lha namoq lyis taiq kyingh zaih nhang zis gas ngos kuot vvng dah muh nghuot oen nghamh.

¹⁴Yah Yhensain Yesu Khristu ngos lyis bvng bvng taiq toh goeus zis yah dvyhangteh, hai seq shei dah gungs ma nyangh lyis ngos haih gungs lyis toh tyamp das zis seq.

¹⁵Housoeh las ngos shei thang lhyi haih cho lhyi dvcho cho yah namoq vjangh soh nyeis das xiklyis ngos yomkat ohhont das.

¹⁶Yah Yhensain Yesu Khristu dah yomzains yah jweh los cho ngamoq namoq lyis seq nhang das xiklyis ngamoq gas dius yah kuot taiq dah mvnyei mas ma nges, nyah kuhxing cho lhyi ngamoq nyoqjeih yah nyvng goeus.

¹⁷Nyang lyis Uwus Mangso jyank masyah nyoqnho ngelang yahge phunk dyei uhlyis, zes thank dah phunk nyoqnho ngelang khau mhayah nyah jyank mas jweh los dah thwe ka, Haih soeu ka ngos jyetdap Lo nghuot, ngos nyang lyis nhaiqdoeus, ge taiq uhlyis eq ngamoq houmha nyang yah dvgeh nghuot.

¹⁸Ngamoq Yhensain yah dvgeh hau gyingshang boms thoq mas nyeis uhlyis maukhung mhayah nyings thuq los dah thwe lhyi ngamoq nyang xauhgyo.

¹⁹Housoeh yvmvyah ngamoq gas lvpe jens taiq toh dah nyoqnyvng dang lyis zes yoh nghamhnywe. Namoq hauh Dang lyis vlhomuh gyo nyeis geh. Khasoeh ge lyis houka namoq dah ehnyet mas bvng los las buhnyhiq thuq los shishenh jweh shoq soeng soeng noq yvmas bvng joq dah nyibung teh nghuot.

²⁰Nghuot laus eq hank laus eq vsainnyang o khyvlyis lhaihtoh dang mas bos dah lvpe dang lyis vjyuk ma yoh phant yvlyis cangxeih comh toh chah.

²¹Khasoeh ge lyis lvpe dang kha khonh eq dius dah ehnyet o khyvlyis bweh los zis ma nghuot. Gyingshang Dyos yah bos jyonh zis xauh bang gas Mangso jyank masyah jweh los dah dang lyis tsain taiq.