Read Achang 2 PETRU 2 Bible Online

2 PETRU 2 - Achang bible

2 PETRU 2

¹Lai loh goeus shishenh lyis dius jens mas lvpe hwah tsain thuq los zis yah dvyhangteh, namoq mas eq ma jus dah jyauh bang thuq los das. Nyamoq gas thyoqpi cho, ma jus dah jyauh cho gauh chi hwank las vsainnyang lyis khyuot yoeus goeus dah Yhensain lhyi eq peq tyamp das. Housoeh nyamoq gas nyamoq thoq mas nyetlos nyettant dyoqbis cho jweh los nhang das.

²Housoeh bweh laus eq dius nyoshoq gas nyamoq dah ma gis wotwu cho mha chank loh das. Nyamoq housoeh kuot yvmvyah jyoeng cho lhyi ma gis khyvlyis tsain taiq jwangh das.

³Hai ma jus dah jyauh bang gas nyamoq dah nyoqnoq ehnyet yah kuot yoeus dah mvnyei taiq las vmyat xo das. Nyamoq lyis joeng das soetuon soeu ka, gohlhain yah yangh cicont kuot toh goeus, nyamoq lyis mhont das soeu ka yhet muih joq zis ma nghuot.

⁴Mangso ka, yaunos kuot dah loeuswons bang lyis yangh khyamhsa ma dyei, nyamoq lyis munyi thomh mas khyoq las, hau soeng soeng noq yvmas shamjvng yah twih las soetuon das buisnyeis lyis langh nhang toh.

⁵Mangso ka gohlhain caiq lyis dah mungkvn lyis eq khyamhsa ma dyei, gywes so lhyi ma phauh nyang dah mungkvn lyis dvjeis lhyi nhang. Dan cho lhyi taiq kyoh soeu Noa yahge gohtoeu dius nyhet yuk lyis gas khyuot yoeus.

⁶Mangso ka Sodom yahge Gomora aiq wus lyis eq nyi yah mhont las gywes ma tsungh bang khasoeh bweh los das cho yikhyoh toh.

⁷Nyang gas lyi ma chi, wotwu dyoq dah dius jens gvng mas nhaiqkuk yomgyau nyeis soeu ge dah Lot lyis gas lhuiq kat.

⁸Hauh dan soeu ka nyamoq yah dvgeh nyeis dah uhlyis dvnyeih dvnyeih nyamoq kuot dah ma gis muh lyis nyvng, xauhgyo gvng mas nyah ehnyet mas shanghsenh nyung daus nyeis.

⁹Housoeh yvmvyah Mangso ka gywes so lhyi phauh nyang bang lyis nyamoq xauh nyeis dah shiwu cho mhayah khasoeh lhuiq kat das zis yahge lhung bang lyis soetuon buisnyeis jweh shoq khasoeh joeng das zis seq.

¹⁰Zes las vchoqh vlhauq gungsshoh dah nyetnau cho mha tsain suh e las, Mangso dah toeuh lyis maphauh madanh kuot bang gas housoeh teh cho xauh das. Hai ma jus dah jyauh bang gas svsoh womh las lhoq lhoq teh nyhang mha dah phunk bos bang lyis phauh nyang cho ma Chixoeuq, nyamoq lyis ma phauh gis kuot.

¹¹Hai ma jus dah jyauh bang thoq lyis yom yahge yomsoq zes tsain bos dah Loeuswons bang yangh Yhensain xikkhonh mas nyamoq lyis ma phauh gis zau ma kauq.

¹²Nghuot laus eq haih dius jens gas, nyhik yoeus las sat das xiklyis nyeis dyos dah gaunyhauq lamh jens teh, nyamoq yangh ma seq dah soengh choenk ehnyet yah ma phauh gis kuot. Nyamoq gas yewus yhangteh mhont tyamp zis xauh das.

¹³Nyamoq gas nyamoq yah gohyuk lyis xauh nhang dah shanghsenh cho tauh dyei zis xauh das. Nyeihgungs lyis yangh nyamoq dah gungs shoh pyo cho lhyi tyink das xiklyis gas nyamoq dah pyo cho nghuot. Nyamoq gas namoq yah dvgeh zo shuk huom mha bos wvng yvmvyah namoq xiklyis vxoq vcaiq, nyoqnho gyoh cho bweh nhang nyeis. Nyamoq gas mhuih cho lhyi tsain ngwis.

¹⁴Nyamoq gas nyi shuot lvng shuot muh yoh kuot das toeuh xo thoq lyis gohtoeu cha lhyi eq ma mes yoeuh. Nyamoq yaunos kuot las xauh kham dah whitau lhyi nhaiq ma thoq shei. Nyamoq dah ehnyet lyis nyoq noq o seq bos das xiklyis xik toh goeus. Nyamoq gas Mangso dah nhoengh zis xauh nyeis.

¹⁵Nyamoq gas cho dan lyis toh tyamp las cho whang loh: Beora dah lo Balam chank dah cho mha chank loh goeus. Balam gas ma jus dah muh kuot las yoh dah uhkung phauh lyis obos soeu nghuot.

¹⁶Balam gas nyang kuot dah yaunos gvng mas nyho lha jyauh zis xauh. Nyah mauhlyihzoe gas dius nyingh yah dang taiq los las lvpe dah huonh muh lyis tomp tyamp.

¹⁷Haih dius jens gas jeis kanh dah jeisthuq dwang yahge lyeis jyang yah muot tangh los dah jyommauh teh tsain nghuot. Mangso ka soeng soeng noq yvmas nyamoq xiklyis noq thank joqyos dvkoeuq sont toh dyei.

¹⁸Nyamoq gas shuot dah kang dwis cho mhayah vsaiq yoh luiq los bang lyis vkom mha moengs dang taiq zis yah gungs shoh dah nyetnau cho mha chuq yoeus las cho shwih whang loh.

¹⁹Nyamoq gas nyamoq nyang dyoqbis dah wotwu dah jons tsain duot toh las gohyuk lyis lhuiq cho das ing toh. Khasoeh ge lyis dius dvyuk gas nyang lyis yoh ung dah vyhang dvnganh dah jons nghuot.

²⁰Dius jens gas namoq dah khyuot yoeus soeu Yhensain Yesu Khristu lyis yoh seq gvng mas, mungkvn dah vchoqh vjyot yomsoq masyah luiq los thang lhyi, tsai dvlhain vchoqh vjyot cho yah ung tyamp zis xauh lyis gas, thang thank lyis hauh bang dah bweh cho ka cangxeih thoq lyis zes xungh.

²¹Dan cho lhyi seq lho lha, nyamoq lyis kyauh toh, gyingshang dah tyingtoh dang lyis lhyweq tyamp thoq lyis, hauh cho lhyi ma seq seq nyeis das zis gas dvzes gis shih.

²²Lvkhuih gas nyang duk yvlyis doms zo, wuq eq cheih dyei thang lhyi thomh boengh mas doms lhoeuh, ge dah sangkhyangh gas nyamoq xiklyis jus joq.