Read Achang 2 PETRU 3 Bible Online

2 PETRU 3 - Achang bible

2 PETRU 3

¹Ngos jyetdap dah dyenschangh jens eh, heika ngos namoq lyis aiq vlhain huon maussauh nghuot. Hai aiq koeuq mas namoq dah shangkyei ehnyet vpom yah seq nghamh yoeuh das xiklyis haih cho jens lyis taiq kyingh kat.

²Gyingshang dah lvpe jens gohnhamp taiq khoq dang lyis eq, namoq dah lvgyo jens dah loq cho yah, namoq xauh yoeus dah khyuot yoeus soeu Yhensain tyingtoh dang lyis eq ngos namoq lyis doms soh nhang mes.

³Hau thang thank buisnyeis lyis vsainnyang dah gungs shoh nyetnau khyvlyis chank zis yah kang dwis bang thuq los das yvlyis cangxeih seq toh chah. Nyamoq gas namoq lyis jwangh zis yah, Yhensain doms jweh los das ge dangthoengh dyei toh ma nghuot lhyeh? Gvshih nyang khalhye gah?

⁴Ngamoq uwus moq shei loh goeus: nghuot laus eq vyhang dvnganh gas mungkvn lyis gvnkhanh dah shishenh yah dvyhangteh dvnghuot joq nyvng, ge los das.

⁵Mangso ka cangxeih lyis maukhung yahge nyeisjvng lyis nyah dang yah gvnkhanh toh goeus yvlyis eq, nyeisjvng lyis jeis khau mhayah jeis yah she thuq toh goeus yvlyis eq,

⁶tsai nyeisjvng vcauh lyis jeis yah dvjeis lhyi lha thyoq tyamp goeus yvlyis eq nyamoq pa i tohnyhik tyamp.

⁷Nghuot laus eq Mangso ka gvshih joq dah maukhung yahge nyeisjvng lyis nyi yah mhont tyamp das xiklyis gohlhain dah hau dang yah nyang shung toh. nyamoq lyis gywes ma tsungh bang yah dvgeh soetuon lha mhont das buisnyeis jweh shoq toh shih das.

⁸Nghuot laus eq jyetdap dyenschangh jens eh, hai dvcho lhyi vtohnyhik goh, Yhensain xikkhonh mas buisnyeis dvnyeih yahge khyoengh zvn gas cha ma shaih, nyah xiklyis hau aiq ja gas dvyhangteh dvnghuot.

⁹Dius dvyhamh nghamh teh Mangso ka nyang dangthoengh toh goeus dah cho lhyi kuot tyink das xiklyis sheq nyeis zis ma nghuot; dvnganhmoq yaunos masyah lhain los las hank eq dyoqbis zis ma xauh bas jungh, nyang o nyeis yvmvyah nyang namoq lyis jhen nyeis zis dvnghuot.

¹⁰Yhensain dah buisnyeis gas khauh soeu teh jweh los das. Hauh buisnyeis lyis maukhung nyings huomh toh thwe yah dyuk loh das. Maukhung vyhang dvnganh eq nyi ngeh las dyoqbis tyamp das; nyeisjvng yahge houmha nyeis ya nyeis zis gas bi tyamp das.

¹¹Vyhang dvnganh heisoeh mhont tyamp zis xauh das lyis gas, namoq khasoeh teh dius jens nghuot chah das lah? Namoq dah kang dwis cho ka gyingshang lha Mangso mha kyauh toh dah kang dwis cho nghuot chah das.

¹²Namoq gas Mangso dah buisnyeis lyis langh nyeis cho mha lvnyap jweh los bas jungh gis thank khyvlyis yomkat zis yah langh nyeis geh. Hauh buisnyeis lyis maukhung ka ngeh las dyoqbis tyamp das; maukhung vyhang jens eq ngeh yvmvyah yings tyamp das.

¹³Nghuot laus eq yang gas Mangso dangthoengh dyei toh goeus, dan bang nyeis das yhen ge maukhung vsaiq yahge nyeisjvng vsaiq lyis nghamhloms las dvlangh nyeis.

¹⁴Housoeh las ngah dyenschangh jens eh, namoq hauh buisnyeis lyis langh nyeis shishenh lyis Mangso xikkhonh mas namoq dah ehnyet shangkyei lha yaunos ma dap bas jungh oen zis yahge nyang mas nyenstap zis yah yoh nyeis das xiklyis yomkat ohhont nyeis geh.

¹⁵Yang jyetdap dah vmang vnoeuh Paulo eq, Mangso dyei dah joeui yhung lha namoq jyank mas lhaih kat goeus zis yah dvyhangteh, yang Mangso lhyi ehnyet xing xing yah langh nyeis zis gas khyuot yoeus xauh das xiklyis toeuh nghuot yvlyis seq geh, nyvng geh.

¹⁶Paulo ka haih cho yah sen lha nyang huon maussauh mas hei yah dvyhangteh lhaih xoeuq toh. Nyah maussauh mas bos dah cho dvkhamh gas seqgyo nanh las joeui ma seq bang yahge ehnyet ma gying bang gas shuot khyvlyis vjyuk tsain phant yoeus. Dius jens gas gohtoeu lhaihtoh dang jens lyis shuot khyvlyis vjyuk phant yoeus. Housoeh nyamoq dah dyoqbis cho lhyi nyamoq nyang kuot yoeus goeus.

¹⁷Nghuot laus eq dyenschangh jens eh, namoq gas heinyhoq lyis tsain seq toh goeus. Housoeh yvmvyah namoq gas lyi ma chi bang dah shuot cho pheh shwih loh yvpheh ma bos das zis yahge gau dah kang dwis cho mhayah ma gyoh tyamp das xiklyis zaih nyeis geh.

¹⁸Namoq gas yah khyuot yoeus Yhensain Yesu Khristu dah jyehjuh yahge seq cho mha tsoq las kuhxing jebais los geh. Gvshih eq, vcaiq vto eq Yesu Khristu mas phunk bos bas jungh. Amen.