Read Achang 1 YOHAN 1 Bible Online

1 YOHAN 1 - Achang bible

1 YOHAN 1

¹Cangxeih lyis yah nyeis, hauh kang dwis dang dah cho namoq jyank mas ngamoq lhaih kat. Ngamoq hauh zis lyis xauhgyo ku goeus. Nyoqjeih yah eq, nghuot goeus ngamoq nyvng eq nyvng ku goeus, ngamoq loq yah eq tanh ku goeus.

²Hauh kang thuq los uhlyis ngamoq hauh zis lyis nyvng ku goeus. Housoeh las ngamoq hauh cho lhyi kanghjyoeng tsain kat. Uwus yah dvgeh nyeis ku goeus hauh vcaiq vto kang ka ngamoq jyank thuq los las ngamoq hauh kang cho namoq lyis taiq kyoh.

³Ngamoq gas Uwus Mangso yah eq, Lo Yesu Khristu yah eq, zomh ku goeus las namoq eq ngamoq yah dvgeh yoh zomh bas jungh, ngamoq gyo ku, nyvng ku dah cho ngamoq namoq lyis taiq hoeuh.

⁴Ngamoq gas hau gausyis cho namoq mas top jweh los bas jungh oen haih maussauh lhaih kat.

⁵Mangso ka bvng zis nghuot las Nyang mas chuot zis ma bos. Haih Mangso dang lyis nyah lo masyah ngamoq xauhgyo ku goeus gvng mas namoq lyis taiq kyoh.

⁶Yang gas nyang yah yoh zomh nyeis goeus ge las mauchuotdwang mas suh e nyeis shih lyis gas yah dang mas eq, yang kuot dah muhzoh mas eq, yang hwah bang tsain nghuot.

⁷Nghuot laus eq, nyang gas bvng yvmas nyeis teh, yang eq bvng yvmas suh e nyeis lyis gas yang dvyuk yah dvyuk nyang changh zomh goh nyeis bang nghuot las nyah lo Yesu dah suih gas yang mas bos dah yaunos lyis cheihshang tyamp dyei goeus.

⁸Yang yobos ma bos ge taiq lyis gas, yah gungs lyis yvnyang hwah bang tsain nghuot las yang gas dan cho ma bos bang tsain nghuot.

⁹Nghuot laus eq, yah yaunos lyis Mangso xikkhonh mas Chixoeuq las rhen zis yah shangphu lhyi ka, nyang gas nyah dangthoengh mas doengs joq las hauh dan dah muhzoh lyis kuot soeu nghuot gvng mas, yah yaunos lyis khyuot tyamp dyei das zis yahge kuot cu cho dvnganh masyah cheihshang tyamp dyei das.

¹⁰Yang yaunos ma kuot ge taiq lyis gas, yang Mangso lhyi hwah soeu kuot nhang lha Mangso dah dang eq yah jyank mas ma bos.