Read Achang 1 YOHAN 4 Bible Online

1 YOHAN 4 - Achang bible

1 YOHAN 4

¹Jyetdap bang eh, dyos xauh yoeus goeus ge bang dvnganh lyis vjingh nyeis goh. Nyamoq xauh yoeus dah dyos gas Mangso jyank masyah gyoh los dah dyos nghuot lah? Kyink yoeuh geh, khasoeh ge lyis Lvpe hwah jens joqyos khyiq khanghmuh mas jweh nyeis goeus.

²Mangso dah dyos nghuot ma nghuot yoh seq das cho ka haih zis nghuot. Yesu Khristu gas cangsoeu dius gungs tsungh las jweh los, ge rhen bang hank laus eq Mangso jyank masyah dyos xauh kham yoeus bang nghuot.

³Nghuot laus eq, Hauh Yesu dah cho lhyi ma rhen bang hank laus eq, Mangso jyank masyah gyoh lyih dah dyos lyis xauh lhom yoeus bang ma nghuot. Nyamoq jyank mas bos dah dyos gas namoq xauhgyo ku goeus zis yah dvyhangteh, jweh los nyeis. Nghuot goeus gvshih yangh nyeisjvng mas lyih nyeis goeus Khristu dah Jeswus dah dyos nghuot.

⁴Lo jens eh, namoq gas Mangso shot pheh bang nghuot las hauh Lvpe hwah jens lyis ung tyamp goeus. Khasoeh ge lyis namoq mas bos dah dyos gas nyeisjvng yah sen bang mas bos dah dyos thoq lyis yomsoq zes bos.

⁵Hauh lvpe hwah jens gas, mungkvn yah sen bang nghuot yvmvyah nyamoq gas mungkvn dah cho tsain taiq. Mungkvn mas nyeis bang eq nyamoq dah dang domsyos tsain gyo.

⁶Nghuot laus eq yang gas Mangso shot pheh zis nghuot. Mangso lhyi seq bang hank laus eq yah dang tsain gyo. Mangso shot pheh ma nghuot bang gas yah dang ma tsain gyo. Heisoeh khyvlyis yah yang gas jyoeng dah dyos lhom yoeus zis yahge ma jyoeng dah dyos lhom yoeus bang dah ma doeusgoh cho lhyi yoh taiq.

⁷Jyetdap bang eh, yang nyang changh nyang jyetdap goh nyeis goh. Khasoeh ge lyis jyetdap ehnyet gas Mangso jyank masyah nghuot. Seq jyetdap soeu hank laus eq, Mangso lo nghuot las Mangso lhyi seq.

⁸Jyetdap ehnyet ma bos soeu ka, Mangso lhyi seq zis ma nghuot: khasoeh ge lyis Mangso ka jyetdap ehnyet nghuot.

⁹Yang gas Lo gvng mas vcaiq vto kang yoh bas jungh ge Mangso ka nyah Loteh lyis mungkvn mas nhang kat zis yah Mangso yang lyis jyetdap ehnyet Chixoeuq.

¹⁰Jyetdap ehnyet ge taiq lyis, yang Mangso lhyi jyet ge yvlyis taiq zis ma nghuot, yah yaunos khyuot dyei das xiklyis gungsthaiq shoh-uh bweh bas jungh ge nyah lo lyis nhang kat zis yah nyang yang lyis jyetdap goeus yvlyis taiq zis dvnghuot.

¹¹Jyetdap bang eh, Mangso ka yang lyis hei iq jyetdap nyeis lyis, yang eq nyang changh nyang jyetdap goh gis.

¹²Mangso lhyi hank khanhamp eq ma nyvng ku: yang nyang changh nyang jyetdap goh nyeis lyis gas, Mangso ka yah jyank mas bos joq yvmvyah, nyah jyetdap ehnyet gas yang mas dyinghjet joq.

¹³Nyah dah dyos yang lyis dyei toh yvmvyah, yang eq nyang mas nyeis las, nyang eq yang mas nyeis yvlyis yang tsain seq.

¹⁴Mungkvn dah khyuot yoeus Yhensain bweh bas jungh ge las Uwus gas hau Lo lyis nhang kat zis gas ngamoq nyvng las kanghjyoeng tsain kat.

¹⁵Yesu gas Mangso dah Lo nghuot ge rhen soeu hank mas laus eq Mangso ka nyang mas nyeis. Nyang eq Mangso mha nyeis.

¹⁶Housoeh las yah thoq mas Mangso jyetdap ehnyet toh toh cho lhyi yang seq las tsain lomsjingh nyeis. Mangso ka jyetdap ehnyet nghuot; housoeh las jyetdap ehnyet mas kang dwis soeu hank laus eq Mangso yah dvdain dvlom nghuot. Mangso eq nyang yah dvdain dvlom nghuot.

¹⁷Ngamoq mas nyah jyetdap ehnyet dyinghjet los las hau soetuon buisnyeis lyis ngamoq womh ehnyet yoh das. Khasoeh ge lyis jyetdap cho lhyi ngamoq mas dyinghjet shoq yoh yhung goeus zis yahge haih mungkvn mas ngamoq gas Khristu yah dvyhangteh kang dwis goeus las ngamoq hau womh cho yoh.

¹⁸Jyetdap ehnyet mas gyuk zis ma bos. Dyinghjet dah jyetdap cho ka gyuk yvlyis khat tyamp. Housoeh lyis gas gyuk ehnyet bos soeu hank mas laus eq jyetdap ehnyet ma yoh dyinghjet. Khasoeh ge lyis gyuk ehnyet gas joeng zis xauh das cho yah sen joq.

¹⁹Mangso ka cangxeih lyis yah yang lyis jyetdap yvmvyah, yang eq nyang lyis jyetdap nyeis.

²⁰Dvyuk yuk, Ngos gas Mangso lhyi jyetdap nyeis ge las nyah vmang vnoeuh lyis hoeng nyeis lyis gas, hauh soeu ka hwah soeu nghuot. Khasoeh ge lyis vsainnyang yoh nyvng dah vmang vnoeuh lyis ma jyetdap lyis gas, vsainnyang ma yoh nyvng dah Mangso lhyi ma yoh jyetdap.

²¹Yang lyis Khristu dyei toh dah tyingtoh dang gas, Mangso lhyi jyetdap soeu ka nyah vmang vnoeuh lyis eq yoh jyetdap das, ge zis nghuot.