Read Achang SOETUON 10 Bible Online

SOETUON 10 - Achang bible

SOETUON 10

¹Abimelek shei thang lhyi Dodo nyeilo, Pua lo Tola thuq los las Israel lyis lhuiq kat. Nyang gas Isakha vkoq mas zis nghuot las Ephraim boms mau Shami mas nyeis.

²Nyang gas Israel lyis aiqci somh zvn uhshe khoq. Hauh thang lhyi nyang shei lha Shami mas nyhop.

³Tola thang mha Gilead masyah Yair thuq los. Nyang Israel jens lyis aiqci aiq zvn shwih uhshe.

⁴Nyang mas mauhlyihzoe somhci ji dah loloeu somhci yuk bos. Nyamoq gas Gilead mau mas wus somhci eq yoh. Hauh yvlyis Yair dah wukhau jens ge lui nyeis shih.

⁵Yair gas shei lha Kamon mas nyhop zis xauh.

⁶Tsai, Israel jens gas Bala, Ashtarot phvra, Siria mau, Sidon, Moab, Amon, Philisti mau mas dah mangso jens lyis tsain paiq zis yah YHENSAIN lhyi tyi dah yaunos tsain kuot. Nyamoq gas YHENSAIN lhyi tyamp las paiq phuqsoe cho no loh.

⁷Housoeh las YHENSAIN ka Israel jens lyis nhaiqyo las nyamoq lyis Philisti jens yahge Amon jens lyis yah los ung tyamp nhang.

⁸Housoeh Yodan lvng buisthuq tvp Gilead mau Amori jens nyeis yvmas dah Israel jens dvnganh lyis dvci xet zvn zaiq las shoeuhshih.

⁹Amon jens gas, Yodan lvng goeu las Yuda vkoq, Benyamin vkoq yahge Ephraim jens lyis los zan. Housoeh Israel jens shanghsenh zainsmuh xauh.

¹⁰Hauh uhlyis Israel jens YHENSAIN lhyi kaiq ngaus zis gas, Ngamoq nvng ngamoq dah Mangso lhyi tyamp las Bala lyis paiq phuqsoe zis yah yaunos kuot goeus.

¹¹YHENSAIN Israel jens lyis toeuh zis gas, xik pheh namoq lyis Egutu dius, Amori, Amon yahge Philisti jens,

¹²Sidon dius, Amalek yahge Maon jens zaiq las namoq ngos lyis kaiq lui las ngos namoq lyis nyamoq loq masyah ma khyuot yoeus lhyeh?

¹³Nghuot laus eq namoq ngos lyis toh khoq las gohtoeu mangso jens lyis dvpaiq loh. Housoeh las ngos namoq lyis ma doms khyuot lo das.

¹⁴Namoq khyen yoeus dah mangso jens lyis loh kaiq ngaus geh. Namoq yaukyenh uhlyis nyamoq khyuot bas jungh, ge.

¹⁵Nghuot laus eq Israel jens YHENSAIN lhyi taiq zis gas, Ngamoq yaunos kuot goeus, ngamoq lyis nvng o khyvlyis kuot aq, laus eq khvnyhik ngamoq lyis jenh khyuot yoeus aq, ge.

¹⁶Housoeh nyamoq gas lvbaus mangso jens lyis shang tyamp las YHENSAIN lhyi tsain paiq. Nyang eq Israel jens dah shanghsenh cho lhyi sainhnos.

¹⁷Hauh thang lhyi Amon jens jesphung jeszan das zis sont las Gilead mas dvp los thoeng toh. Israel jens eq zop los las Gilead mau Mizpa mas dvp thoeng.

¹⁸Gilead mas Israel vkoq jens dah uhshe bang nyang changh taiq goh zis gas, Amon jens lyis jes shwih zan das zis hank? Nyang gas Gilead bang dvnganhmoq dah uhshe soeu duot das, ge.