Read Achang SOETUON 12 Bible Online

SOETUON 12 - Achang bible

SOETUON 12

¹Ephraim jens gas jeszan das zis sont. Nyamoq gas Yodan lvng goeu las Zaphon wus Yeptha jyank mas loh taiq, Nvng Amon jens lyis loh zan lyis, nvng lyis pangh das zis ngamoq lyis ma shwih chamus maukyo lai? Ngamoq nvng eq cheq nah yhen lhyi nyi ngheq das, ge.

²Nghuot laus eq Yeptha nyamoq lyis taiq, Ngos yahge ngah dius jens gas Amon jens yah yomkat zan-goh uhlyis ngos namoq lyis khi laus eq namoq ngos lyis nyamoq loq masyah ma khyuot yoeus, ge.

³Namoq ngos lyis ma pangh cho nyvng seq lyis, ngos shei lhyi yangh lyis maukyo lai las Amon jens lyis loh zan goeus. YHENSAIN eq ngos lyis nyamoq thoq mas ung cho dyei goeus. Housoeh lyis gvshih namoq ngos lyis chamus los zan-goh lah, ge.

⁴Housoeh Yeptha ka Gilead bang dvnganh lyis shwih lha Ephraim lhyi zan las ung. (Ephraim jens gas, Namoq Gilead bang gas Ephraim yahge Manase masyah dyos thuq loh bang dvnghuot, ge ku.)

⁵Ephraim jens ma yoh phang luiq bas jungh ge, Gilead bang gas Yodan lvng goeu joqyos mas tsain lhom. Hauh joqyos gas Ephraim mau pheh loh cho tsain nghuot. Phang luiq mes dah Ephraim ka, Ngos lyis goeu nhang aq, ge. Gilead bang gas, Nvng Ephraim dius vnghuot lah, ge. Nyang gas, Ma nghuot, ge lyis,

⁶nyamoq gas, Nvng Shibolet oen sang yoeuh aq, ge. Nyang nyingh ma dyeh las Sibolet ge. Housoeh ge lyis nyang lyis dap nyhik las Yodan lvng goeu yvmas sat. Hauh lhain lhyi Ephraim dius nyei mons aiq khyoengh sat xauh.

⁷Yeptha ka Israel lyis khyuk zvn shwih khoq. Hauh thang lhyi nyang shei lha, nyang lyis Gilead mau, nyah yhen joq wus mas nyhop.

⁸Yeptha thang lyis Betlehem mas dah Ibzan gas Israel lyis shwih.

⁹Nyang mas loloeu somhci, lonyi somhci bos. Lonyi somhci lhyi goh koq lyis dyeizo las nyah loloeu jens xiklyis goh koq masyah lonyi somhci yoeus. Nyang Israel lyis nyhet zvn shwih.

¹⁰Ibzan shei lhyi Betlehem mas nyhop.

¹¹Ibzan thang lyis Zebulun vkoq mas dah Elon gas Israel lyis dvci zvn shwih.

¹²Hauh thang lhyi nyang shei lha Zebulun mau, Aiyalon wus mas nyhop.

¹³Elon thang lhyi Pirathon mas Hile lo Abdon gas Israel lyis shwih.

¹⁴Nyang mas loloeu nyeici, nyeilo somhci bos las, nyamoq gas mauhlyihzoe nyhetci ji. Nyang gas Israel lyis nyhet zvn shwih.

¹⁵Nyang shei lhyi Amalek boms mau, Ephraim dah maunyeis Pirathon mas nyhop.