Read Achang SOETUON 13 Bible Online

SOETUON 13 - Achang bible

SOETUON 13

¹Israel jens gas YHENSAIN lhyi tyi dah yaunos doms kuot. Housoeh las YHENSAIN ka nyamoq lyis Philisti jens yah nyeici zvn guon nhang.

²Hauh uhlyis Zora wus mas Manoa ge soeu dvyuk nyeis. Nyang gas Dan vkoq mas zis nghuot. Nyah yhensain nyhiq gas lo ma bos dius thonh bweh nyeis.

³YHENSAIN dah loeuswons soeu nyah jyank mas thuq los las taiq zis gas, Nvng lo ma bos dius thonh bweh nyeis laus eq ma nyangh lyis nvng ung mha loshang chi lha, yukgis lo khoeu das.

⁴Housoeh las nvng zaih aq, zvbiq vshuk, yhei vshuk, tung toh zonoms vzo.

⁵Yukgis lo khoeu los lyis nyang lyis uh khanhamp eq ma gis yuk dyei. Khasoeh ge lyis nyang khoeu los masyah Naziri dius[16] khyvlyis Mangso lhyi kyauh toh. Nyang gas Israel jens lyis Philisti loq masyah khyuot xi das, ge.

⁶Hauh vmesbih nyah yhensain phoq lyis loh taiq kyoh. Mangso dah dius dvyuk ngah jyank mas los. Nyang gas Mangso dah loeuswons soeu teh gyukphoh nghuot. Nyang khalhye yah los zis eq ngos ma nyei yoeuh. Nyang nyah nyings eq ma taiq kyoh.

⁷Nghuot laus eq ngah ung mha loshang chi lha yukgis lo yoh das. Nvng zvbiq vshuk, yhei vshuk, tung toh zonoms cha eq vzo: khasoeh ge lyis hauh loshang ka nyang dwis nyeis dvchank Naziri dius khyvlyis Mangso lhyi kyauh toh, ge nyang ngos lyis taiq.

⁸Housoeh las Manoa gas YHENSAIN lhyi dung. YHENSAIN eh, hau nvng nhang ku dah Mangso dius lyis ngamoq jyank mas doms jenh nhang kat las, hauh yukgis lo khoeu los lyis ngamoq khasoeh kuot das zis taiq nhang aq, ge.

⁹Mangso eq Manoa dung zis kuot dyei. Hauh vmesbih yos mas tsung toh lyis loeuswons soeu nyah jyank mas doms los. Nyah yhensain phoq gas nyang yah dvgeh ma nyeis jus.

¹⁰Housoeh nyang nyah yhensain phoq lyis lvnyap loh taiq kyoh. Hounyeih ngah jyank mas los soeu doms thuq los, ge.

¹¹Manoa eq toq las nyah yhensain nyhiq thang mha chank loh. Nyang hauh soeu jyank mas loh nyei zis gas, Nvng ngah yhensain nyhiq lyis jis soeu vnghuot lah, ge. Nyang eq, Nghuot, ge toeuh.

¹²Manoa gas, housoeh lyis nvng taiq dang bweh los lyis, hauh loshang cha kuot chah? Nyang kang khasoeh dwis chah, ge nyei.

¹³YHENSAIN dah loeuswons soeu Manoa lyis taiq zis gas, Ngos nah yhensain nyhiq lyis kuot aq oen taiq toh zis dvnganh kuot chah.

¹⁴Nyang zvbiq nwis mas zis cha eq ma gis zo. Zvbiq ma gis shuk, yhei ma gis shuk, tung toh zonoms cha eq vzo. Ngos nyang lyis taiq toh zis dvnganh kuot chah, ge.

¹⁵Manoa gas hauh zis YHENSAIN dah loeuswons soeu nghuot zis ma seq las, nyang lyis, Vjenh loh shih. Ngamoq nvng lyis beqlo dvdoeu sat jyauq tsoh mes, ge. Nghuot laus eq loeuswons soeu taiq zis gas, Ngos nyeis laus eq nah zonoms ma zo das. Nvng ba dyei mes lyis YHENSAIN lhyi jyungshuk khyvlyis ngheq dyei aq, ge.

¹⁷Manoa toeuh zis gas, Nah nyings taiq aq. Housoeh nah dang nyuk los lyis nvng lyis yoh chungh das, ge.

¹⁸Loeuswons soeu ka, Nvng ngah mauhphoh nyings lyis chamus seq mes, ge nyei.

¹⁹Housoeh Manoa beqlo yoeus, zonoms jyungshuk eq ba las luk phon thoq mas mauhphoh muh kuot dah YHENSAIN lhyi phudyei.

²⁰Hauh phon mhayah nyilhyam doq loh uhlyis YHENSAIN dah loeuswons soeu eq hauh nyilhyam yah maukhung pheh doq loh yvlyis Manoa vzomh nyvng. Housoeh hauh soeu ka Mangso dah loeuswons soeu nghuot yvlyis Manoa soh las nyah vzomh gas nyeisjvng mas dupaiq. Nyamoq hauh loeuswons soeu lhyi khanhamp eq ma doms nyvng ku lo.

²²Manoa nyah yhensain nyhiq lyis taiq, Yang Mangso lhyi nyvng goeus yvmvyah yang jyoengh shei das, ge.

²³Nghuot laus eq nyah yhensain nyhiq toeuh zis gas, YHENSAIN yang lyis sat mes lyis gas, nyang yah jyungshuk eq ma lhom yoeus lo. Haih shishenh lyis Nyang hai dvnganh eq yang lyis ma chixoeuq lo. Hai dvnganh eq yang lyis ma taiq lo, ge.

²⁴Hauh vmesbih eq yukgis lo khoeu lha nyang lyis Samson ge nyhink. Hauh lo bes los las YHENSAIN nyang lyis shvmanh dyei.

²⁵Nyang Zora yahge Eshtaol jo Dan dah thoenggus mas nyeis uhlyis YHENSAIN dah yomsoq gas nyang lyis yombos xi los nhang.