Read Achang SOETUON 16 Bible Online

SOETUON 16 - Achang bible

SOETUON 16

¹Dvnyeih gas Samson ka Philisti wus Gaza pheh loh. Nyang houmha nghe nyhiq dvyuk yah xauhgoh las nyang yah wvng yhet.

²Gaza bang gas Samson houmha nyeis zis nyvng. Nyamoq gas hauh joqyos lyis lhaink las wus khomh mas dvnyens gonh zungh nyeis. Nyamoq gas dvnyens gonh tsingtsam nghuot joq. Nyamoq nghamh zis gas, Yang nyoq nyvng shoq zungh goh. Housoeh yang nyang lyis sat das, ge.

³Nghuot laus eq Samson ka gungsgvm jweh shoq yhet lho lha, wus khomh lyis zains eq, khomh kyank eq cheq nyah kvtoq mas toq nuot wuq las Hebron wus twi twi dah jing thyoh mas loh toh.

⁴Hauh thang lhyi Samson ka Delila ge dah vmesbih yah ngwis goh. Hauh soeu ka Sorek langhkhau mha nyeis.

⁵Philisti hwankti jens oeng yuk moq Delila jyank mas e lha taiq zis gas, Samson ka chamus hei iq yombos, nyang lyis khasoeh yoh ung das zis mhuih nyei dyei aq. Ngamoq nyang lyis khasoeh yoh twih das cho xo dyei aq. Ngamoq nvng lyis ngwis kyvp dvyuk dvkhyoengh dvxo xo dyei das, ge.

⁶Housoeh las Delila gas Samson lhyi, Nvng lyis yom cha yah bos nhang zis ngos lyis jenh taiq kyoh aq. Dvyuk yuk nvng lyis twih mes lyis, nyang khasoeh kuot lyis nvng yomnhuk das lah, ge.

⁷Samson phuk taiq zis gas, Nyamoq ngos lyis ma kyuk shih dah lyeityiq twih jen nyhet khvt yah twih lyis ngos gohyuk teh yomnhuk das, ge.

⁸Housoeh las Philisti hwankti jens Delila lyis lyeityiq twih saiq vjen nyhet khvt chi los dyei las nyang Samson lhyi twih toh.

⁹Nyang gohyvp mas dius jens lyis langh nhang toh. Housoeh nyang gas, Samson eh, Philisti jens los goeus, ge kaiq kat. Nghuot laus eq nyang gas hau lyeityiq twih lyis khying lhyi nyi tanh teh lang thyet tyamp. Housoeh las nyamoq Samson dah yom zauh toh zis ma yoh seq shih.

¹⁰Delila Samson lhyi taiq zis gas, Nvng ngos lyis hwah las zeh nyeis. Jyoeng zis ma taiq. Nvng ngos lyis dvyuk yuk yah khasoeh twih das zis jenh taiq kyoh aq, ge.

¹¹Nyang Delila lyis taiq zis gas, Nyamoq ngos lyis khanhamp eq ma yhung ku shih dah twih saiq yah twih lyis ngos gohyuk teh yomnhuk das, ge.

¹²Housoeh las Delila gas twih saiq yah nyang lyis twih lho lha, Samson eh, Philisti jens los goeus, ge kaiq. Dius jens gas gohtoeu dvyvp mas langh nyeis. Nghuot laus eq Samson ka nyah loqyom mas twih lyis khying soeh lang thyet tyamp.

¹³Delila Samson lhyi taiq zis gas, Nvng ngos lyis jus zis ma taiq dvzeh nyeis shih. Dvyuk yuk nvng lyis khasoeh yoh twih das, ge. Samson nyang lyis taiq zis gas, Nvng ngah cam nyhet shuk lyis yoqshoh mas bos yoq kat las duon yah kyenh toh aq housoeh lyis ngos gohyuk teh yomnhuk das, ge.

¹⁴Hauh thang lhyi Delila gas Samson lhyi sop shet lho lha nyah cam nyhet shuk yoeus las yoqgan mas kat yoq. Nyang hauh yvlyis duon yah goeng goeng tap toh lho lha, Samson eh, Philisti jens los goeus, ge kaiq. Nghuot laus eq Samson soh los las, nyah cam lhyi yoqshoh masyah lang she yoeus.

¹⁵Housoeh las nyang Samson lhyi taiq, Nvng ngos lyis yangh ma loms zis, Nvng ngos lyis jyet, oen khasoeh yoh sang lah? Heika nvng ngos lyis zeh zis somh vlhain nghuot. Nvng lyis cha yah yombos nhang zis ma taiq shih.

¹⁶Nyang nyeih yau nyeih nyei nyeis. Hauh cho nyang lyis nyei thauqkhyi nyeis las nyang shei mes shoq nyungdaus nyeis.

¹⁷Thang thank lyis nyang jyoeng cho lhyi taiq thuq tyamp. Nyang taiq zis gas, Ngah cam khanhamp eq ma thyet ku. Ngos gas khoeu los lyis yah Mangso lhyi Naziri khyvlyis kyauh toh soeu nghuot. Ngah cam yuk tyamp lyis, ngah yomnhuk las gohyuk teh nghuot das, ge.

¹⁸Housoeh nyang jyoeng cho taiq goeus yvlyis Delila soh lyis nyang Philisti hwankti jens lyis loeuskyoh kat. Nyang jyoeng cho taiq goeus, dvlhain doms los geh, ge. Hauh uhlyis nyamoq ngwis chi lha tsain los.

¹⁹Delila gas Samson lyis nyah tanghbauh thoq mas sop shet. Nyang uhyuk soeu lhyi khi lha[22] Samson dah cam nyhet shuk yuk tyamp nhang. Housoeh nyang Samson dah yom lyis nhuk loh nhang. Samson dah yom eq nhuk loh goeus.

²⁰Hauh thang lhyi nyang kaiq zis gas, Samson eh, Philisti jens los goeus, ge. Samson soh los las nghamh, Ngos luiq loh shoq vjangh kuot teh kuot bah! ge.YHENSAINka nyang lyis tyamp khoq goeus zis nyang ma seq.

²¹Philisti jens gas nyang lyis nyhik las, nyah nyoqjeih tsain thuiq tyamp dyei. Nyang lyis Gaza pheh shwih loh. Houmha nyang lyis thunk jvngchoh yah twih las thung mha mhoq lang nhang toh.

²²Nghuot laus eq nyah cam doms yuk zoh los nyeis.

²³Philisti hwankti jens dvgeh huom lha, nyamoq dah Dagon mangso lhyi phudyei pwe zainsmuh tsain kuot. Ngamoq dah mangso ka ngamoq jeswus Samson lhyi ung nhang goeus, ge lvkhyank tsain kat.

²⁴Nyamoq gas tsain pyo nyeis. Nyamoq taiq, Samson lhyi khi los geh, yang lyis lhoq pyo nhang goh, ge. Samson lhyi thung mhayah shwih thuq los lyis nyamoq lyis lhoq pyo nhang[23] lho lha nyang lyis Dagon yhenmuh khungzains jo mas yap nhang toh. Nyamoq gas nyang lyis nyvng lyis, nyamoq dah mangso lhyi tsain chungh. Ngamoq dah mangso ka ngamoq mau lyis lhoq mhont, ngamoq nyoshoq lyis sat dah jeswus thoq mas ung cho dyei goeus, ge.

²⁶Samson ka nyang lyis she dah loloeu lo lyis, Yhen lhyi toeu toh dah zains lyis tanh nhang aq. Ngos houmha nges toh mes, ge.

²⁷Hauh yhenmuh mas vmesbih vbusbih jens dyingh nhoenk joq. Philisti hwankti oeng yuk moq eq dvnganh houmha bos. Samson lhoq pyo yvlyis yoeuh nyeis bang vmesbih vbusbih dvnganh eq hauh yhenkhung mha dius somh khyoengh ko nyeis.

²⁸Hauh thang lhyi Samson shvmanh dung zis gas, Yomzains YHENSAIN eh, ngos lyis jenh soh dyei aq. Mangso eh, ngos lyis hai dvlhain yom jenh bos nhang shih aq. Housoeh las haq lhain ngah nyoq aiq jeih yoeus tyamp dyei dah Philisti jens lyis lvto yoh phuk bas jungh, ge.

²⁹Samson ka yhenmuh khungzains aiq koeuq jo mas zains lyis dvshot dvloq zwi las yomkat duon las,

³⁰kaiq zis gas, Ngos lyis Philisti jens yah dvgeh shei nhang aq, ge yomkat duon kat las, hauh yhen lains gyop loh. Hauh zis hwankti oeng yuk yahge yuk khanghmuh lyis nhiq sat. Samson nyang shei uhlyis sat zis gas nyang dwis nyeis shih yoq lyis sat thoq lyis zes nyo.

³¹Nyah boekyis yahge nyah yhenbang gas nyah mvng lyis e yoeus. Nyang lyis Zora yahge Eshtaol vjo, nyah uwus Manoa lop mas nyhop. Nyang gas Israel dah uhshe soeu aiqci zvn kuot khoq.