Read Achang SOETUON 18 Bible Online

SOETUON 18 - Achang bible

SOETUON 18

¹Hauh zaih lyis Israel mas hwankti ma bos. Hauh yoq lyis Dan vkoq gas nyamoq sang lha nyeis loh das vso vlho maunyeis tsain xo. Khasoeh ge lyis hauh yoq jweh shoq Israel vkoq jens mas nyamoq nyang dah vso maunyeis ma xauh yoeus shih.

²Housoeh las mau loh yoeuh, loh xo, joh loh yoeuh das zis Dan vkoq yhenbang mas kank bos[24] dah dius oeng yuk khyen. Nyamoq lyis taiq shet cho kuot lho lha Zora yahge Eshtaol wus masyah nhang kat. Nyamoq Ephraim boms mau mas jweh lyis Mikha yhen mha thoeng.

³Nyamoq houmha nyeis uhlyis, hau Lewi loyvm phoq dah thwe lhyi seq las nyamoq nyang lyis loh nyei zis gas, Nvng heimha cha kuot nyeis, nvng lyis heimha hank shwih los, ge.

⁴Nyang phuk taiq zis gas, Ngos lyis Mikha nyah phudyei soeu khyvlyis phuqsoe das xiklyis muh toeuq dyei toh.

⁵Nyamoq taiq zis gas, Ngamoq loh cho ung das, ma ung das zis Mangso lhyi bos jenh nyei dyei aq, ge.

⁶Phudyei soeu phuk taiq zis gas, Namoq cha chiq chank ma bos. YHENSAIN ka namoq loh gyung cho mha yoeuh gomh nyeis, ge.

⁷Housoeh las hau oeng yuk moq toq loh las Laish wus mas jweh. Houmha bang gas Sidon bang teh jes ma bos nyeis tam nyeis yvlyis nyvng. Nyamoq gas hank yah eq ma taiq phyen-goh, nyens nyens tap tap nyeis bang nghuot. Nyamoq chah zis dvnganh yoh. Sidon bang yah eq we goh. Gohtoeu dius jens yah eq ma zomh goh bang nghuot.

⁸Hau oeng yuk moq Zora yahge Eshtaol wus mas tauh jweh lyis nyamoq mau mas bang gas nyamoq lyis nyamoq cha xo nyvng cho nyei.

⁹Nyamoq phuk taiq, Lyoh geh, Laish lyis loh zan-goh. Ngamoq hauh mau lyis nyvng goeus, hauh mau svsoh gis. Heimha mvgon vnyeis goh. Lvnyap mus geh, yang loh sain yoeus goh!

¹⁰Namoq houmha jweh lyis dius jens lvlaihsoe dvnyeis zis yahge dvm joq dah mau lyis nyvng das. Dius o zis dvnganh joq dah maunyeis nghuot las, Mangso eq hauh zis namoq lyis dyei goeus, ge.

¹¹Housoeh las Dan vkoq mas dah dius khyukxo ka Zora yahge Eshtaol masyah jeszan das zis cicont tsain toq.

¹²Nyamoq doq loh las Yuda mau, Kiriat Yearim dah buiswvng pheh dvp thoeng toh. Housoeh las hauh joqyos lyis Dan Dvp ge lui shih.

¹³Nyamoq hou mhayah tsoq loh lyis Ephraim boms mau, Mikha yhen mha jweh loh.

¹⁴Housoeh Laish wus vyvm vwi boms mau mas joh loh yoeuh khoq bang oeng yuk, nyamoq dah dyenschangh jens lyis taiq zis gas, Heimha dah yhen dvyhen mha ngwis shauq toh dah saiq phvra joq zis vseq lah? Gohtoeu phvra jens eq phudyei ephod eq joq. Khasoeh kuot gis oen nghamh goh, ge.

¹⁵Housoeh las nyamoq gas hau Lewi loyvm nyeis dah Mikha yhen mha wvng loh. Nyamoq gas hau Lewi dius lyis, Nvng khasoeh gah, ge nyei.

¹⁶Hauh uhlyis jeszan das zis cicont nghuot dah Dan jeslo jens khyukxo ka khyam khomh mas tsain yap joq.

¹⁷Hau joh loh yoeuh khoq bang oeng yuk gas yhen khau mha dan wvng loh las, ngwis shauq toh dah saiq phvra, gohtoeu phvra jens yahge phudyei ephod yoeus nyeis uhlyis hau phudyei soeu ka jes gungs chi bang khyukxo yah dvgeh khyam khomh mas yap joq.

¹⁸Dius jens Mikha yhen mha wvng las hau gyingshang vyhang yoeus nyeis lyis phudyei soeu nyamoq lyis nyei zis gas, Namoq cha kuot goh, ge.

¹⁹Nyamoq taiq, Nvng samlo nyeis aq, dang dvkhonh eq vtaiq, ngamoq yah chank los las ngamoq lyis joeui dyei soeu yahge ngamoq dah phudyei soeu duot aq. Nah xiklyis Israel dvkoq gonh dah phudyei soeu duot das zis zes gis lah? Dvyuk dah yhen xiklyis kyingh kuot lyis zes gis lah, ge.

²⁰Houka phudyei soeu lhyi svsoh gaus nhang. Housoeh las nyang gyingshang vyhang yoeus las nyamoq yah chank loh.

²¹Nyamoq nungs phuk las, nyamoq dah loshang jens, gaunyhauq yahge nyamoq sain zis nyamoq xik pheh kat loh.

²²Mikha nyah yhenkyoh bang lyis jes bos zan das zis lui thuq nyeis uhlyis nyamoq gas hauh yhen mhayah gvgis lo we loh goeus. Mikha moq gas Dan jens lyis chank duons.

²³Nyamoq Dan jens lyis kaiq lyis, Dan jens lhain yoeuh las Mikha lhyi, Nvng chah soe bos las hounyhoq moq yah los, ge nyei.

²⁴Mikha phuk taiq, Nvng chah soe bos lah, ge zis cha ge lah? Namoq ngos kuot dah phvra jens yoeus, ngah phudyei soeu lhyi shwih loh. Ngos mas cha joq lo lah, ge.

²⁵Dan jens nyang lyis taiq, Nvng cha ma taiq lo lyis zes gis, ma nghuot lyis haih dius jens nhaiqyo las nvng lyis zan las nvng eq nah yhenbang dvnganh shei das, ge.

²⁶Dan jens gas tsoq loh. Mikha ka nyamoq gas nyah xiklyis yom sunk bos yvlyis nyvng las nungs phuk zis yah nyah yhen pheh tauh loh.

²⁷Dan jens gas Mikha kuot toh vyhang yoeus, nyah phudyei soeu lyis shwih thang lhyi, loh las Laish wus lyis zan. Hauh wus gas Bet Rehob langhkhau mha joq. Hauh wus gas nyenstap, houmha nyeis bang eq sam. Dan jens gas houmha nyeis bang lyis sat, wus lyis eq nyi ngheq. Laish wus gas Sidon yah we goh joq. Nyamoq hank yah eq buisnoms ma tsoq toh yvmvyah nyamoq lyis hank ma khyuot yoeus. Dan jens gas houmha wus doms soq kuot las nyeis.

²⁹Hau Laish wus lyis Yakop lo, nyamoq dah phauh thyeih Dan lyis chank las Dan, ge thaiq nyhink.

³⁰Dan jens gas nyamoq paiq das xiklyis hau phvra toh. Moshe nyeilo, Gershom dah lo Yonathan ka Dan jens dah phudyei soeu khyvlyis phuqsoe. Nyah vnyau vshih jens eq, dius jens jonsdoeus loh buisnyeis jweh shoq Dan jens dah phudyei bang khyvlyis phuqsoe.

³¹Mangso dah gyingshang Zvng Shilo wus mas joq dvchank, hau Mikha dah phvra houmha joq.