Read Achang SOETUON 19 Bible Online

SOETUON 19 - Achang bible

SOETUON 19

¹Israel mas hwankti ma bos shih zaih lyis, Ephraim boms mau mas Lewi dvyuk nyeis. Nyang gas Yuda mau Betlehem mas dah nyelo dvyuk lyis nyinhungh yoeus.

²Nyah nyinhungh gas nyang yah nhaiqyo goh las, Yuda mau Betlehem nyah uwus yhen mha lhamhmuh nyei khyvp loh nyeis.

³Hauh thang lhyi hauh soeu ka nyah nyinhungh lyis loh doms jyoeuq shwih yoeus das ge nghamh thyet. Nyang nyah jyeidwis eq, mauhlyihzoe dvzomh eq cheq toq loh. Hauh soeu lhyi nyvng lyis gaus gaus yis yis lhom yoeus.

⁴Yukphoq gas lomoq lyis tungh tomp las nyang houmha somh nyeih nyeis. Nyah aiq yuk gas houmha zo shuk las yhet.

⁵Nyei vnyeih nvp lyis noq yah toq las loh das dyens sont. Nghuot laus eq yukphoq Lewi lyis taiq zis gas, Wom shih zo las yombos shoq nyeis geh vkhoeuq yoh loh, ge.

⁶Housoeh las nyah aiq yuk dvgeh tsung lha zo shuk. Yukphoq taiq zis gas, Khvnyens pyo pyo jenh yhet khoq shih geh, ge.

⁷Lewi gas loh das xiklyis toq laus eq, yukphoq yomdyei las houmha dvnyens doms yhet.

⁸Oeng vnyeih nvpsangh noq yah thuq das ge toq laus eq yukphoq taiq zis gas, Zonoms jenh zo shih geh. Buis gam loh shoq langh geh, ge. Housoeh aiq yuk yah dvgeh doms zo shuk nyeis.

⁹Hauh dius yuk gas nyah nyinhungh yahge jyeidwis yah toq das ge dvlhain doms sont lyis, nyah yukphoq nyang lyis taiq zis gas, Yoeuh aq. Gvshih nyenhthang zoh vluk nghuot goeus, mauchuot bah ge goeus, heimha yhet las pyo pyo nyeis geh, nvpyo noq yah toq las yhen pheh loh geh, ge.

¹⁰Nghuot laus eq hauh soeu ka dvnyens ma mes yhet lo. Housoeh las nyang yahge nyah nyinhungh gas gyung toq loh. Nyamoq mas tu eq cheq dah mauhlyihzoe aiq doeu bos. Nyamoq Yerusalem wus ge Yehu nvm mas jweh lyis nyenhthang nghuot goeus. Housoeh las jyeidwis gas nyah svra lyis, Haih Yebusi wus mas thoeng lha chamus ma yhet, ge.

¹²Nyah svra nyang lyis taiq zis gas, Yang Israel jens nyeis dah wus ma nghuot lyis ma thoeng das. Yang dvtsiq loh shih las Gibea, nghuot ya Rama mas yhet goh, ge.

¹⁴Housoeh nyamoq Yebu lai las gyung tsoq loh. Benyamin yah sen dah Gibea wus nvm mas jweh lyis buis wvng goeus.

¹⁵Gibea mas yhet das ge, cho mhayah wus pheh wvng loh. Nyamoq wus mas wvng las wus cho mha tsain tsung toh. Nghuot laus eq hank eq nyamoq yhen mha yhet goh ge ma yus.

¹⁶Nyamoq houmha nyeis lyis yos masyah lokhoq dvyuk los. Nyang gas Ephraim boms mau mas soeu nghuot. Gvshih gas Gibea mas nyeis. (Gohtoeu houmha nyeis bang gas Benyamin vkoq nghuot.)

¹⁷Hau lokhoq gas wus cho mha gyung suh soeu lhyi nyvng las nyei zis gas, Nvng khapheh yah los, khapheh loh das, ge.

¹⁸Hau Lewi phuk taiq zis gas, Ngamoq Yuda mau Betlehem wus mas loh khoq. Gvshih gas ngamoq dah yhen[25] Ephraim boms mau pheh loh gyung cho mha nghuot. Ngamoq lyis hank eq ma shwih yhet.

¹⁹Ngamoq mas mauhlyihzoe jens xiklyis huhyau yahge zonoms bos. Ngos yahge ngah nyinhungh, ngah jyeidwis nyhenshang ohlhyoq eq zvbiq eq bos. Ngamoq yhung chah zis dvnganh yoh, ge.

²⁰Lokhoq taiq zis gas, Ngos nvng lyis ngah yhen mha boengh lhom. Ngos nvng lyis dyangh das, nvng wus cho mha ma yhet noh, ge.

²¹Housoeh las nyang nyah yhen mha shwih loh, nyah mauhlyihzoe jens lyis tsoh dyei. Nyah boenghwus jens khyei cheih thang lhyi tsain zo shuk.

²²Housoeh nyamoq pyo pyo nyeis lyis, hauh wus mas dah dius lhung dvjens yhen lhyi nyetlos nyettant los lhaink las khomh lyis tsain bat. Nyamoq hau lokhoq lyis taiq zis gas, Nvng yah dvgeh los dah hau yukgis lyis shwih thuq los aq, ngamoq nyang yah yhet goh mes, ge.

²³Lokhoq phauh nyamoq jyank mas thuq e lha taiq zis gas, Dyenschangh jens eh, housoeh ma nghuot, hou iq ma gis cho vjenh kuot goh. Vjenh lhung goh, haih soeu ka ngah boenghwus dvnghuot.

²⁴Yoeuh aq, heimha ngah lonyi gyingh eq, nyah nyinhungh eq nyeis. Gvshih ngos nyah aiq yuk lyis shwih thuq dyei bah, nyah aiq yuk lyis namoq o nyhoq kuot geh, haih vbusbih lyis gas lhung khyvlyis vjenh kuot goh, ge.

²⁵Nghuot laus eq hauh bang gas ma gyo. Housoeh las Lewi phoq gas nyah nyinhungh nyamoq lyis shwih thuq dyei. Nyamoq eq dvnyens gonh maubuh shoq ma no lo nyang lyis nos nhang.

²⁶Maubuh los lyis hauh vmesbih los las nyah yhensain phoq nyeis hau lokhoq dah yhen khomhdwang mas lains joq. Nyoq nyvng lyis eq nyang houmha dvnghuot shih.

²⁷Nvp lyis nyah yhensain phoq toq las loh lo bah ge khomh phank lyis, nyah nyinhungh gas yhen ganthoq mas khomh mas loq tuont zis lains joq yvlyis nyvng.

²⁸Yhensain phoq gas, Toq aq, loh lo goh, ge. Nghuot laus eq, nyang ma phuk taiq lo. Housoeh las yhensain phoq gas nyah mvng lyis mauhlyihzoe thoq mas vtyi kih thuq las nyah yhen pheh loh.

²⁹Yhen mha jweh lyis nyang yhen khau mha sham wvng yoeus. Nyah nyinhungh mvng lyis dvci aiq doeus khyiq las Israel jens dvci aiq koq lyis dvkoq dvkhyiq khyiq gvm kat.

³⁰Hauh zis nyvng soeu khanghmuh taiq zis gas, Ngamoq heiteh zis khanhamp eq ma xauhgyo ku. Israel jens Egutu masyah thuq los masyah heiteh zis khanhamp eq ma bweh ku. Haih zis lyis yang dvja gas kuot chah. Cha bweh das lah, ge.