Read Achang SOETUON 2 Bible Online

SOETUON 2 - Achang bible

SOETUON 2

¹YHENSAIN dah loeuswons soeu Giga masyah Bokhim mha los las Israel jens lyis taiq. Ngos namoq lyis Egutu masyah namoq dah phauh thyeih moq lyis dangthoengh toh dah mau mas shwih los goeus. Ngos namoq yah toh dah thanghchvp lyis khanhamp eq ma thyoq das oen taiq goeus.

²Namoq haih mau mas nyeis bang yah thanghchvp ma gis toh. Namoq nyamoq dah phon lhyi tsain thyoq khyoq chah oen taiq goeus. Nghuot laus eq namoq ngos taiq khyvlyis ma kuot, namoq houyah tyi khyvlyis dvkuot.

³Housoeh las gvshih ngos taiq bah, ngos namoq jweh dah mau mas bang lyis ma khat tyamp dyei lo das. Nyamoq gas namoq dah jeswus duot las, nyamoq dah mangso lhyi paiq cho ka namoq dah lhyik duot das, ge.

⁴Loeuswons soeu haih zis taiq lyis Israel jens dvnganh tsain ngaus.

⁵Housoeh yvmvyah nyamoq hauh joqyos lyis ngaus ge vjyuk yah Bokhim[4] ge nyhink las nyamoq houmha YHENSAIN lhyi phudyei.

⁶Yoshua gas Israel jens lyis pont kat las, yuk khanghmuh vsainnyang yah sen dah vso mau sain das zis tsain loh.

⁷Yoshua kang dwis nyeis dvchank Israel jens gas YHENSAIN lhyi tsain phuqsoe. Nyang shei thang lhyi eq YHENSAIN Israel jens lyis kuot dyei dah muh zains lyis nyvng dah logis jens kang dwis nyeis dvchank YHENSAIN lhyi tsoq phuqsoe.

⁸YHENSAIN dah jyeidwis, Nun lo Yoshua gas nyenhkyi dvxo dvci zvn bos lyis shei.

⁹Nyang lyis Ephraim boms mau Gash jing mautsung pheh nyah vso maunyeis Timnat Here mas nyhop.

¹⁰Hauh caiq mas bang dvnganh eq shei lha gohcaiq mas bang gas YHENSAIN lhyi tohnyhik, Israel xiklyis nyang kuot dyei dah muh lyis eq ma seq lo.

¹¹Housoeh Israel jens gas YHENSAIN yah tyi lha Bala phvra lyis tsain phuqsoe zis yah yaunos kuot.

¹²Egutu masyah nyamoq lyis shwih los, phauh thyeih moq dah YHENSAIN Mangso lhyi paiq cho no las, vyvm vwi bang dah phvra shot pheh chank loh, bos paiq zis yah YHENSAIN lhyi nhaiqyo nhang.

¹³Nyamoq gas YHENSAIN lhyi ma paiq lo Bala yahge Ashtarot phvra lyis tsain phuqsoe.

¹⁴Housoeh las YHENSAIN ka Israel jens lyis nhaiq svsoh yo las, nyamoq lyis Zan las thyoq das bang lyis nhang kat. Vyvm vwi mas dah jes jens gas nyamoq lyis ung lha, nyamoq gungs lyis nyamoq nyang ma yoh gos zo lo.

¹⁵YHENSAIN nghuot das ge taiq toh goeus vgus, nyamoq jeszan loh khanghmuh YHENSAIN ka nyamoq yah tyi toh. Housoeh las nyamoq svsoh shanghsenh.

¹⁶Hauh thang lhyi nyamoq lyis ung bang loq masyah khyuot yoeus das xiklyis YHENSAIN ka Israel uhshe bang dyei los.

¹⁷Nghuot laus eq Israel jens gas nyamoq uhshe bang dah dang lyis eq ma gyo. YHENSAIN lhyi lom ma luk, gohtoeu mangso jens lyis paiq loh. Nyamoq dah uwus moq gas YHENSAIN dah tyingtoh dang lyis domsyos gyo. Nghuot laus eq hai dius caiq vsaiq mas bang gas domsyos gyo cho lvnyap no tyamp.

¹⁸YHENSAIN Israel jens lyis uhshe soeu dyei khanghmuh nyang gas hauh uhshe soeu dwis nyeis dvchank nyang lyis pangh zis yah nyamoq lyis jeswus loq masyah khyuot kat. Khasoeh ge lyis nyamoq zaiq zis xauh las noskyingh lyis YHENSAIN ka nyamoq lyis nhaiqnyen.

¹⁹Nghuot laus eq uhshe soeu shei thang lhyi dius jens gas nyamoq dah cho cauh pheh tauh loh las xik lyis dah dius caiq thoq lyis ma gis shoq kuot. Nyamoq gas gohtoeu phvra lyis paiq phuqsoe loh. Nyamoq dah ehnyet than zis yah nyamoq dah ma gis cho pheh tsoq loh.

²⁰YHENSAIN Israel jens lyis nhaiq svsoh yo los las taiq zis gas, Haih dius nyau gas ngos nyamoq dah phauh thyeih moq lyis tsomh toh nhang dah thanghchvp lyis tsain thyoq. Nyamoq ngah domsyos ma gyo yvmvyah,

²¹ngos eq, Yoshua shei uhlyis hauh mau mas nyet joq shih dah khah dius nyau lyis eq nyamoq masyah ma khat tyamp dyei lo.

²²Ngos nyamoq lyis yhung lha Israel jens nyamoq dah phauh thyeih moq YHENSAIN dah cho chank teh, chank das, ma chank das zis kyink das, ge.

²³Housoeh las YHENSAIN ka hauh dius nyau jens lyis, Yoshua loq mas eq ma kyauh, Yoshua shei thang lhyi eq lvnyap ma khat tyamp, hauh mau mas nyhet toh.