Read Achang SOETUON 20 Bible Online

SOETUON 20 - Achang bible

SOETUON 20

¹Housoeh las mautsung pheh Dan wus mas zis mautyi pheh Besheba wus jweh shoq dah Israel jens dvnganh, buisthuq pheh Gilead mau mas bang eq cheq tsain los. Nyamoq gas Mizpa wus, YHENSAIN xikkhonh mas dvdain dvlom tsain zophuom.

²Hai Mangso dah dius jens zophuom yvmas Israel vkoq jens dvnganh dah uhshe bang bos. Houmha jeslo jens nyei sens nghuot.

³Hauh uhlyis Benyamin jens gas, gohtoeu Israel jens dvnganh Mizpa mas zophuom, ge cho xauhgyo. Israel jens nyei zis gas, Hai dius sat yau khasoeh bweh los zis ngamoq lyis taiq kyoh aq, ge.

⁴Nyah nyinhungh sat zis xauh dah Lewi phoq phuk taiq zis gas, Ngos ngah nyinhungh yah dvgeh Benyamin mau Gibea wus mas loh yhet.

⁵Nyenh lyis Gibea dius jens ngos lyis yoeus das ge yhen lhyi los lhaink. Nyamoq ngos lyis sat mes, hauh gungsthaiq ngah nyinhungh lyis shwih yhet las nyang shei goeus.

⁶Ngos nyah mvng lyis yoeus, vdoeus doeus khyoq las Israel dvci aiq koq lyis dvkoq dvkhyiq huon goeus. Haih dius jens ma gis zis kuot goeus, yang mas wotwu dyoq dah muh kuot goeus.

⁷Heimha bang dvnganh gas Israel jens nghuot. Haih cho yang khasoeh kuot das, ge.

⁸Dius jens dvnganh dvgeh toq yap las taiq zis gas, Yang zvng mas nyeis soeu laus eq, yhen mha nyeis soeu laus eq, hank eq ma tauh loh.

⁹Yang kuot das zis gas haih zis nghuot. Gibea lyis loh zan das zis doeugoh zis yah dius khyen das.

¹⁰Israel dvci mha dvyuk gas jesphung lhyi zonoms dyei das. Gohtoeu nyet bang gas Israel mas hai wotwu dyoq cho kuot goeus dah Gibea jens lyis loh joeng das.

¹¹Housoeh las Israel mas bang dvnganh gas Gibea lyis zan das nyhenshang toeuqkhom dvkoeuq yah dvyih dvyot tsain huom.

¹²Israel vkoq jens gas Benyamin mau gonh mas loeus wons bang nhang lha taiq zis gas, Hai namoq kuot dah lhung muh gas cha nghuot?

¹³Gvshih hau Gibea wus mas nyeis hau lhung bang lyis los kyauh geh, nyamoq lyis sat zis yah Israel masyah ma gis zis yoeus tyamp das, ge. Nghuot laus eq Benyamin jens gas gohtoeu Israel jens dah dang ma gyo dyei.

¹⁴Benyamin wus jens dvnganh mas bang gas gohtoeu Israel jens lyis zan das ge Gibea wus mas tsain los.

¹⁵Hauh nyeih lyis nyamoq dah wus jens masyah jeslo aiqmons khyuk khyoengh lui thuq toh. Hauh thoq lyis Gibea dius jens mas loq paih bang lhyenwhei nyhetxo khyen toh. Hauh bang yuk khanghmuh gas cam dvkhvt eq ma i shoq loqpanh luk yoh doeuh bang nghuot.

¹⁶

¹⁷Benyamin jens ma suon, Israel jens mas pot goeus dah jeslo nyei sens los huom toh.

¹⁸Israel jens gas paiq joqyos Bethel mas loh las, houmha Mangso lhyi nyei zis gas, Benyamin lyis cangxeih khah vkoq shih zan chah lah, ge. YHENSAIN phuk taiq zis gas, Yuda vkoq shih zan chah, ge.

¹⁹Housoeh las nungsnvp Israel jens toq las Gibea wus nvm mas dvp thoeng toh.

²⁰Nyamoq gas Benyamin jesphung lhyi zan das zis loh. Jeslo jens gas Gibea wus pheh xoeu lha joqyos yoeus toh.

²¹Benyamin jesphung eq Gibea masyah thuq los las, hauh nyeih buis ma wvng shih lyis Israel jeslo aiq mons aiq khyoengh lyis sat.

²²Hauh thang lhyi Israel jens gas paiq joqyos YHENSAIN xikkhonh mas nyenhthang jweh shoq kuk ngaus. Nyamoq nyei zis gas, Ngamoq dah vnoeuh Benyamin lyis jes vloh doms zan lo das lah, ge. YHENSAIN phuk taiq zis gas, Loh zan aq, ge. Housoeh Israel jesphung ka yom yoh las nyamoq dah jeslo jens lyis cangxeih nyeih lyis dah joqyos doms yoeus.

²³

²⁴Israel jens gas Benyamin dah jesphung yah tyi lha aiq vlhain loh doms zan.

²⁵Aiq vlhain lyis Benyamin jens eq Gibea masyah thuq las zan. Haq lhain eq Israel jens pot goeus dah jeslo dvmons xet khyoengh lyis sat.

²⁶Hauh thang lhyi Israel jens dvnganh gas Bethel mas loh las ngaus. Nyamoq YHENSAIN xikkhonh mas tsung lha nyenhthang jweh shoq wom ma zo. YHENSAIN xikkhonh mas nyenstap jyungshuk phudyei. Doeu gonh ngheq phudyei.

²⁷Hauh zaih lyis Mangso dah Thanghchvp Kwi ka hau Bethel mha joq. Aron lo Eleaza dah lo Phineha ka hauh yvlyis yvwons yoeus. Dius jens YHENSAIN lhyi nyei zis gas, Ngamoq vnoeuh Benyamin jens lyis loh doms zan shih das lah? Somh kham das lah, ge. YHENSAIN taiq zis gas, Zan aq, nvpyo ngos namoq lyis nyamoq thoq mas ung nhang das, ge.

²⁸

²⁹Housoeh las Israel jens gas Gibea wus yvm lhaink yah jeslo jens dvyhamh lyis gauh lhom nhang toh.

³⁰Somh vnyeih lyis nyamoq gas Benyamin jesphung lyis tyi lha jens loh. Nyamoq dah jeslo jens gas xikpheh teh Gibea wus pheh xoeu lha zan loh.

³¹Benyamin jens eq thuq zan lyis wus yah we shoq she loh. Housoeh las xikpheh teh Bethel pheh loh cho yahge Gibea pheh loh cho pazoe mas Israel jens lyis sat xi loh. Nyamoq Israel somhci ko xauh sat.

³²Benyamin jens taiq zis gas, Yang xikpheh teh nyamoq lyis yoh ung goeus, ge. Nghuot laus eq Israel jens gas phang teh kuot las nyamoq lyis wus masyah we shoq talhoeu pheh she loh.

³³Housoeh Israel jesphung vgungs mas she loh las Bal Tamar joqyos mas jeszan uhlyis, gauh lhom nyeis dah Israel jens eq lhom nyei joqyos wus yvm luk mhung yos masyah nyetlos nyettant thuq los.

³⁴Israel dvnganh mas lhyenwhei khyen yoeus bang dvmons Gibea wus mas los zan las hau jeszan zis xungh. Benyamin jens gas nyamoq monh lo bah ge yvlyis ma soh.

³⁵Housoeh YHENSAIN ka Israel lyis Benyamin jesphung thoq mas ung cho dyei. Hauh nyeih lyis Israel jens nyamoq dah jeswus aiqmons oeng khyoengh dvxo sat.

³⁶Benyamin jens gas nyamoq somh goeus yvlyis tsain soh. Israel jens gas nyamoq Gibea wus yvmlhaink lhom nyeis bang lyis loms yvmvyah nyamoq jesphung nyothyang ka Benyamin xikkhonh masyah phang dyei.

³⁷Lhom nyeis bang gas Gibea wus mas lvnyap wuih los; wus vkhau mha dyos nyenh loh zis yah houmha bang dvnganh lyis sat.

³⁸Israel jesphung vgungs yahge lhom nyeis bang mas vlho dvkoeuq tsain toeuq toh. Houka wus masyah nyikhauh nhoenk doq los zis nyvng lyis,

³⁹Israel jens gas jeszan masyah tauh los das. Hauh shishenh lyis Benyamin jens yah Israel somhci sat goeus. Nyamoq taiq zo zis gas, Yang xik pheh teh nyamoq lyis ung goeus, ge.

⁴⁰Hauh thang lhyi hauh vlho thuq los; houka wus masyah nyikhauh bungh thuq los. Benyamin lo jens tauh yoeuh lyis, wus gonh masyah nyilhyam thuq nyeis zis lyis yoeuh mauh.

⁴¹Housoeh Israel jens doms tauh zan lyis, Benyamin jens gas nyamoq mas yaukyenh los goeus yvmvyah nyamoq dyoqbis bah ge goeus yvlyis tsain soh.

⁴²Nyamoq gas Israel masyah mhanhdyvp pheh tsain phang. Nghuot laus eq nyamoq ma luiq. Nyamoq gas hau tauh zan dah jesphung yahge gvshih wus masyah thuq los bang dah jo mas xauh nyhik las, nyamoq mhont tyamp zis xauh.

⁴³Israel jens gas nyamoq dah jeswus lyis nyhamh toh. Nyamoq gas ma no lo chank khat las Gibea buisthuq shot jweh shoq sat.

⁴⁴Benyamin dah jes thoeuqzoe jens dvnganh lyis dvmons xet khyoengh gyoh.

⁴⁵Gohyhamh bang eq tauh las mhanhdyvp cho Rimon luk-uk pheh phang. Hauh cho mha oeng khyoengh sat. Israel jens eq nyet bang lyis Gidom wus jweh shoq tsoq chank khat las aiq khyoengh sat.

⁴⁶Hauh nyeihyo Benyamin jens dvnganh lyis aiqmons oeng khyoengh gyoh. Nyamoq dvnganh gas womh dah jeslo jens nghuot.

⁴⁷Nghuot laus eq mhanhdyvp wus Rimon luk-uk pheh khyukxo yoh phang loh las houmha lhamhmuh nyei khyvp nyeis.

⁴⁸Israel jens eq tauh los las nyet shih dah Benyamin jens lyis zan las vbusbih, vmesbih, loshang jens, gaunyhauq dvnganh lyis eq sat. Houmha dah wus khanghmuh lyis ngheq.