Read Achang SOETUON 3 Bible Online

SOETUON 3 - Achang bible

SOETUON 3

¹Housoeh YHENSAIN ka Khanan mau mas jes muh ma seq dah Israel jens lyis kyink das xiklyis vnyau dvyhamh nyhet toh.

²Nyang heisoeh kuot zis gas, Israel jens nyang caiq nyang mas jeszan cho jyauh das, zes las xik pheh jes ma zan ku bang lyis jyauh das xiklyis kyingh nghuot.

³Hauh mau mas nyet joq bang gas Philisti jens oeng wus, Khanan jens dvnganh, Sidon jens, Bal Hermon boms masyah Hamat langhwuq jweh shoq dah Lebanon boms mas nyeis dah Hiwi jens nghuot.

⁴Nyamoq gas YHENSAIN Moshe lhyi yah Israel dah phauh thyeih moq lyis dyei toh dah tyingtoh dang lyis chank kuot das, ma chank kuot das zis lyis xo kyink das xiklyis nghuot.

⁵Housoeh las Israel jens gas, Khanan, Hiti, Amori, Perizi, Hiwi yahge Yebusi moq yah dvgeh nyeis loh.

⁶Nyamoq yah nyiyoeus yhenloh goh las nyamoq dah mangso jens lyis bos paiq.

⁷Israel jens gas YHENSAIN, nyamoq dah Mangso lhyi tohnyhik tyamp las, nyang yah tyi lha Bala yahge Ashera phvra lyis paiq zis yah yaunos kuot.

⁸Housoeh las YHENSAIN ka Israel jens lyis nhaiqyo. Housoeh nyang gas Mesopotamia hwankti Khushan Rishathaim lhyi yah nyamoq lyis ung nhang. Housoeh Israel jens nyah loq o mha xet zvn nyeis.

⁹Hauh uhlyis Israel jens gas YHENSAIN lhyi kaiq lui las nyang gas nyamoq lyis khyuot yoeus das soeu dvyuk nhang kat. Houka Khaleb dah vnoeuh Kenaz lo Otniel nghuot.

¹⁰YHENSAIN dah Dyos nyah thoq mas jweh las, nyang Israel jens dah uhshe soeu bweh los. Otniel jeszan loh lyis YHENSAIN ka nyang lyis Mesopotamia hwankti Khushan Rishathaim lhyi yoh zan ung nhang.

¹¹Hauh mau mas nyeici zvn nyenstap joq. Hauh thang lhyi Otniel shei.

¹²Israel jens gas YHENSAIN yah tyi lha yaunos doms kuot. Haih gvng mas YHENSAIN ka Moab hwankti Eglon lyis Israel thoq lyis yom zes bos shoq kuot.

¹³Eglon gas Amon yahge Amalek dius jens yah tsoq las Israel lyis ung zis yah Dyoms zains wus ge Yerikho wus lyis sain yoeus.

¹⁴Housoeh Israel jens gas Moab hwankti Eglon dah loq o mha dvci xet zvn nyeis.

¹⁵Hauh thang lhyi Israel jens YHENSAIN lhyi lui las nyang nyamoq lyis lhuiq kat das soeu dvyuk nhang kat dyei. Houka Benyamin vkoq mas dah Gera lo, loqpaih soeu Ehud nghuot. Israel jens gas nyang lyis Moab hwankti Eglon jyank mas jyungshuk yah dvgeh nhang kat.

¹⁶Ehud gas dvpe dvkhyamh ko xing lha aiq shot zuk dah sham dvkoeuq kuot. Nyang hauh yvlyis nyah loqyos shot dyi khau mha nyhap chi.

¹⁷Housoeh nyang gas Eglon jyank mas jyungshuk yoeus loh dyei. Eglon gas svsoh coeu soeu nghuot.

¹⁸Jyungshuk dye dyei lyis Ehud gas jyungshuk wons bang lyis yhen pheh tauh loh nhang.

¹⁹Ehud eq tauh loh las Giga nvm, lukboms mas jweh lyis Eglon jyank pheh doms tauh loh. Nyang taiq zis gas, Hwankti eh, ngos nvng lyis gauh taiq das dang yoh, ge. Housoeh las hwankti ka nyah jyeidwis jens lyis jhank das zis vmingh dyei las nyamoq dvnganhmoq thuq loh.

²⁰Housoeh hwankti ka yhenkhung mha dah nyah yvp jyamh mas nyang kyingh tsung toh. Ehud gas nyah jyank mas loh las, Ngos nah xiklyis Mangso jyank masyah loeus bos, ge. Hauh uhlyis hwankti ka toq yap.

²¹Ehud gas nyah loqpaih loq yah, loqyos shot pheh dah sham she lha hwankti womdau thauh phuk dyei.

²²Hauh sham ka shamtsomh eq cheq bos wvng loh. Hauh yvlyis coeu yah nghop las nyah womdau masyah ma yoh she lo, nyah khyei jo nunghkhung pheh thuq loh. [5]

²³Ehud gas nghe pheh thuq las nyang lyis khomh nyheih lhunk lho lha suh suh toh khoq las loh.

²⁴Jyeidwis jens los lyis khomh suh toh zis nyvng laus eq nyamoq gas, Hwankti ka vkhau mha nghe loh nyeis soh bos ge dvtsain nghamh.

²⁵Nyamoq nghamh zis dye ko nyhank langh laus eq hau khomh ma phank shih, nyamoq suhshih yoeus las phank lyis, nyamoq dah yhensain thyangh mas lains shei joq.

²⁶Nyamoq langh nyeis uhlyis Ehud gas phang khoq. Nyang luk cuk toh joqyos lai las Seir pheh phang luiq loh.

²⁷Nyang houmha jweh lyis Ephraim boms mau mas lvbuh muot las Israel jens jeszan das xiklyis kyoh kat. Housoeh nyang boms masyah nyamoq lyis shwih gyoh loh.

²⁸Nyang gas nyamoq lyis, Ngah thang mha chank los geh, YHENSAIN ka namoq lyis namoq dah jeswus Moab jens thoq mas ung nhang goeus, ge. Nyamoq eq Ehud thang mha chank gyoh loh las Moab jens Yodan lvng goeu dah joqyos lyis yoeus tyamp las dvyuk lyis eq ma goeu loh nhang lo.

²⁹Hauh nyeih lyis duot thank dah Moab jeslo jens dvmons ko lhyi dvyuk eq ma luiq lo shoq sat.

³⁰Hauh nyeih lyis Israel jens Moab jens lyis ung tyamp. Hou mhayah hauh mau mas xetci zvn moeng dvm joq.

³¹Hauh thang lhyi dah uhshe soeu ka Anat dah lo Shamgar nghuot. Nyang gas noeu khat dunghkuq yah Philisti khyukxo sat zis yah Israel lyis khyuot kat.[6]