Read Achang SOETUON 5 Bible Online

SOETUON 5 - Achang bible

SOETUON 5

¹Hauh nyeih lyis Debora yahge Abinoam lo Barak gas haih chunghthwe kat.

²YHENSAIN lhyi chungh! Israel jens zan das ge thyet lyis dius jens gaus gaus yis yis xihhonh los.

³Hwankti jens eh, gyo geh! Guon bang eh, kamp gyo geh! Ngos YHENSAIN, Israel dah Mangso lhyi toenk khvlhank yah chungh das.

⁴YHENSAIN eh, nvng Seir boms masyah gyoh los, Edom pa mhayah thuq los uhlyis nyeisjvng gas nvn las maukhung mhayah eq mau wus gyoh, jyommauh masyah mau shuon gyoh.

⁵Sina boms dah YHENSAIN xikkhonh mas boms jens gas nonh nyeis, YHENSAIN, Israel dah Mangso xikkhonh mas boms jens yangh nvn nyeis.

⁶Anat dah lo Shamgar zaih yahge Yael dah buisnyeis lyis hauh mau mha soenghi jens hank ma suh lai lo, gyung suh bang eq cho khyoh dvyhung.

⁷Debora eh, Israel wus jens gas tyamp toh. Nvng thuq los shoq vkom dvjoq. Nvng gas Israel ungwes teh thuq los.

⁸Nyamoq mangso jens vsaiq khyen yoeus lyis hauh mau mas moeng dyoq. Israel nyei mons mas gos dvkoeuq, lham dvkoeuq vchi lah?

⁹Ngah nhaiqlom gas xihhonh zis yah kuot dah gausyis bang Israel dah zau jens yah dvgeh nghuot. YHENSAIN lhyi chungh!

¹⁰Dis dah Mauhlyihzoe thyoeu ji bang, anhzoe mas tsung bang, nyungs las khyei cho suh e bang eh, taiq[8] geh.

¹¹Jeis dwang yvmlhaink yah dius phung hoeu thwe gyo geh! Nyamoq gas YHENSAIN dah ung cho, Israel dius jens dah ung cho taiq nyeis. Hauh thang lhyi YHENSAIN dah dius jens nyamoq dah wus[9] masyah tsain jens gyoh los.

¹²Uhshe aq, Debora eh uhshe aq! Uhshe aq! chunghthwe kat aq. Abinoam lo Barak eh, xik pheh loh aq, yoh nyhik shwih los bang lyis shwih loh aq.

¹³Hauh thang lhyi nyet shih bang gas nyamoq dah uhshe bang jyank mas gyoh los; YHENSAIN dah dius jens gas nyah jyank mas[10] jeszan das zis cicont los.

¹⁴Nyamoq gas Ephraim boms masyah langhkhau pheh los. Nyah thang mha ka Benyamin vkoq yahge nyah dius jens nghuot. Zauzains jens gas Makir vhuh masyah nghuot las zau jens gas Zebulun mas zis nghuot.

¹⁵Isakha dah uhshe bang gas Debora yah los. Isakha los lyis Barak eq bos los. Nyamoq gas langhkhau pheh nyah thang mha chank los. Ruben vkoq gas gang goh loh las los das ge ma yoh thyet.

¹⁶Nyamoq chamus yvng yah nyeis khoq? Yvng yoeuh bang yvng phung lhyi lui yvlyis gyoh nyeis lhyeh? Nghuot goeus, Ruben vkoq gas gang goh loh las nyamoq los das ge ma yoh thyet.

¹⁷Gad vkoq gas Yodan lvng buisthuq tvp pheh nyeis. Dan vkoq eq sangpho yvm mas tsain nyet joq. Asher vkoq gas thomh yvm mas nyeis las thomh jyankyvm chank yah goeukhanh mas tsain nyet joq.

¹⁸Nghuot laus eq Zebulun yahge Napthali dius jens gas jeszan jang mas nyamoq kang lhyi dyei las zan goeus.

¹⁹Hwankti jens gas Megido jeislo lvng yvm Tanak wus mas los zan. Khanan hwankti jens, los zan laus eq ngwis ma tsain yoeus loh.

²⁰Kyi jens gas maukhung mhayah zan dyei. Nyamoq gas maukhung mha ywi loh zis yah Sisera lyis zan.

²¹Kishon lvng, jeis je yvmas nyamoq lyis khyuot she loh. Ngos gas yombos bos jens loh das.

²²Nyang jens gas pant gyoh los; nyamoq dah khyeikhu nyeisjvng mas thungh.

²³YHENSAIN dah loeuswons soeu taiq, Meroz wus lyis nhoengh geh. Houmha nyeis bang lyis nhoengh geh. Nyamoq gas YHENSAIN lhyi ma los pangh, nyah xiklyis jeslo jens khyvlyis ma los bos zan.

²⁴Ken dius Hazo dah yhensain nyhiq Yael gas vmesbih jens mas ngelhoq thank soeu nghuot. Zvng mas nyeis dah vmesbih jens mas ngelhoq thank soeu nghuot.

²⁵Sisera jeis sang lhyi nyang gas nauh dyei, khuq yungh masyah nauh chi los dyei.

²⁶Nyang zvng jywangh dvloq, muh zwi soeu dah doeus dvloq yoeus chi lha los. Hauh zis Sisera dah uhloms mas battsuk dyei.

²⁷Nyang gyuis gyoh las Yael dah khyeiyang mas lains gyoh loh. Nyang Yael dah khyeiyang mas lains joq goeus, nyang nyeisjvng mas lains shei joq.

²⁸Sisera dah ungwes gas khomhbaiq cho yoeuh las khomhgos khau mhayah gop las taiq zis gas, Nyah jes lhyingh los zis chamus hei iq thang gyoh au? Nyah nyang jens tauh los zis chamus hei iq phyiq au, ge.

²⁹Joeui bos thank lonyi jens nyang lyis puk taiq dyei, nyang doms taiq, doms taiq zo zis gas,

³⁰Nyamoq zan ung los dah lvnyhvp gvm goh nyeis. Jeslo dvyuk lonyi dvyuk aiq yuk, Sisera xiklyis cauh yungh misseh, hwankti nyhiq dah lainzain xiklyis cauh las khoh kat dyimis gvm goh nyeis, ge.

³¹Housoeh las YHENSAIN eh, nah jeswus jens housoeh shei loh bas jungh. Nghuot laus eq nah buisnoms jens gas canh los dah buis teh tso bas jungh, ge. Housoeh hauh mau mas nyeici zvn nyenstap joq.