Read Achang SOETUON 9 Bible Online

SOETUON 9 - Achang bible

SOETUON 9

¹Gideon dah lo Abimelek gas nyah ungwes dah boekyis jens nyeis dah Shekhem mas loh las taiq zis gas,

²Gideon dah lo jens nyhetci namoq lyis guon das zis o lah? Dvyuk kyingh guon das zis o lah, oen Shekhem bang lyis nyei yoeuh geh. Ngos Abimelek gas namoq dah suih gyingh shoh gyingh nghuot yvlyis soh geh, ge.

³Nyah ungwes dah boekyis eq nyah xiklyis hauh dang dvnganh Shekhem jens lyis bos taiq kyoh dyei. Housoeh nyang gas nyamoq dah buisnoms nghuot yvmvyah Shekhem jens gas Abimelek dah thang chank das xiklyis tsain nghamh thyet.

⁴Housoeh Shekhem jens gas Abimelek lyis nyamoq Bala-berit yhenmuh masyah ngwis nyhetci kyvp nyang lyis dyei. Abimelek gas hauh ngwis yah dius lamh jens lyis nyang yah tsoq goh das xiklyis nghoh.

⁵Housoeh nyang gas Ophra wus mas joq, nyah uwus yhen mha loh las Gideon loloeu jens, nyah vmang vnoeuh nyhetci lhyi luk dvlom thoq mas sat. Nghuot laus eq Gideon dah lothank Yotham ka tamh yvmvyah ma sat jus.

⁶Hauh thang lhyi Shekhem jens dvnganh yahge Bet-Milo mas nyeis bang dvnganh huom lha Shekhem wus, gyingshang wons zains pa mha Abimelek lyis hwankti toq.

⁷Hauh cho Yotham xauhgyo lyis nyang Gerizim boms thyoh mas loh yap las dius jens lyis kaiq zis gas, Shekhem jens eh, ngah dang gyo geh. Housoeh lyis namoq dang Mangso gyo dyei mvbeh.

⁸Gohlhain saiqzains jens gas nyamoq lyis guon das hwankti khyen das ge loh. Nyamoq gas Tsanlun zains lyis, Nvng ngamoq hwankti duot aq, ge.

⁹Tsanlun zains toeuh zis gas, Ngos namoq thoq mas guon das zis, mangso jens lyis eq, dius lyis eq nyoqnho ngelang gyangh dyei dah coeu thuq los nhang zis no toh chah goeus, ge.

¹⁰Tsai, saiqzains jens gas Maiphang zains lyis, Nvng ngamoq thoq mas hwankti los guon aq, ge.

¹¹Nghuot laus eq maiphang zains toeuh zis gas, Ngos namoq lyis guon das zis gis las chau dah ngah shih thuq los nhang cho no toh chah goeus, ge.

¹²Housoeh las saiqzains jens gas zvbiq nwis lyis, Ngamoq thoq mas hwankti los guon aq, ge.

¹³Nghuot laus eq zvbiq nwis toeuh zis gas, Ngos namoq lyis guon das zis gas mangso jens yahge dius lyis shvpyo dah zvbiq thuq los nhang cho no toh chah goeus, ge.

¹⁴Housoeh las saiq dvnganh gas zoeu gyomh lyis, Nvng ngamoq thoq mas hwankti los guon aq, ge.

¹⁵Zoeugyomh toeuh zis gas, Jyoengh ngos lyis namoq dah hwankti kuot mes lyis gas, ngah buisshen mha los khau geh. Ma los khau lhyi ka, ngah zoeu ko masyah nyi thuq las Lebanon mas dah arit zains tsain ngeh tyamp das, ge.

¹⁶Housoeh Yotham tsoq taiq zis gas, Namoq Abimelek lyis hwankti toq uhlyis jyoengh gyingh las lomluk luk kuot lhyeh? Gideon yahge nyah yhenbang lyis gis khyvlyis kuot las, nyamoq kuot dah jyehjuh lyis mon-yih khyvlyis tauh nghuot lyis gas gis.

¹⁷Ngah uwus gas namoq xiklyis jeszan zis soh geh. Nyah kang lhyi ma yu, namoq lyis Midian loq masyah khyuot yoeus.

¹⁸Nghuot laus eq khvnyhik namoq gas ngah uwus dah yhenbang lyis tyixo lha nyah lo jens nyhetci yuk lyis luk dvlom mas sat. Nyah jyeidwis nyhiq dah lo Abimelek gas namoq dah buisnoms nghuot yvmvyah nyang lyis Shekhem hwankti kuot.

¹⁹Gvshih gas khvnyhik namoq Gideon yahge nyah yhenbang lyis gyingh las lomluk luk kuot nghuot lyis, namoq gas Abimelek yah pyo das, nyang eq namoq yah pyo das.

²⁰Housoeh ma nghuot lyis gas Abimelek masyah nyi thuq las Shekhem jens yahge Betmilo jens lyis ngeh jom tyamp bas jungh. Shekhem yahge Bet-Milo jens masyah nyi thuq las Abimelek lyis ngeh jom tyamp bas jungh, ge.

²¹Housoeh Yotham ka nyah vmang Abimelek lyis gyuk las Beer mas loh phang nyeis.

²²Abimelek gas Israel lyis somh zvn guon.

²³Mangso ka Abimelek yahge Shekhem jens jo mas jes bweh nhang lha, Shekhem jens gas Abimelek lyis gomloeus toq.

²⁴Heisoeh bweh zis gas Abimelek gas Shekhem bang yomdyei pangh zis yah Gideon lo jens nyhetci lhyi sat dah yobos lvto phuk das xiklyis nghuot.

²⁵Shekhem bang gas Abimelek lyis lhom das xiklyis boms thyoh mas dius tsain toh. Hauh bang gas houmha suh lai bang yuk khanghmuh lyis lhuot zo. Hauh cho Abimelek lyis tsain taiq kyoh.

²⁶Hauh thang lhyi Ebed dah lo Gal gas nyah vmang vnoeuh moq yah dvgeh Shekhem mha jweh los. Shekhem jens eq nyang lyis nghamhnywe.

²⁷Nyamoq dvnganh gas nyamoq dah zvbiq khyam mha wvng las zvbiq shih thyoq, zvbiq nang nyhet, pwe kuot. Nyamoq dah phvra yhen mha wvng zo shuk las Abimelek lyis nhoengh.

²⁸Ebed lo Gal taiq zis gas, Ngamoq Shekhem mha chah ja dius nghuot? Abimelek dah muh chamus wons das? Nyang hank nghuot? Nyang gas Gideon lo ma nghuot lhyeh? Zebul gas nyah muh wons soeu ma nghuot lhyeh? Nghuot laus eq ngamoq nyang lyis chamus phuqsoe das? Shekhem dah vpom xi soeu phauh thyeih Hamor dah vhuh lyis dang jings nyeis geh.

²⁹Ngos haih dius jens dah uhshe soeu duot mes. Ngos Abimelek lyis shang tyamp das, ge. Ngos Abimelek lyis, Nah jesphung nyo nhang lha thuq zan aq oen sang mes, ge.[15]

³⁰Wus guon soeu Zebul gas Ebed lo Gal dah dang xauhgyo lyis nhaiqyo.

³¹Nyang gas Aruma mas nyeis Abimelek jyank loeuskyoh bang gauh nhang lha taiq zis gas, Ebed lo Gal gas nyah boekyis yah Shekhem mha los las nyamoq gas nvng lyis wus vkhau mha ma wvng nhang das.

³²Housoeh las gvshih nvng nah dius jens yah dvgeh nyenh lyis cheh las mhanhdyvp mas tamh joq geh.

³³Nvpyo toq las buis canh los lyis wus lyis nyetlos nyettant zan geh. Housoeh Gal yahge nyah dius jens namoq lyis thuq zan lyis namoq yoh zan nyhoq zan geh, ge.

³⁴Housoeh las Abimelek yahge nyah dius jens gas nyenh lyis cheh las jes nyei gvm khyoq zis yah Shekhem wus nghe pheh tamh joq.

³⁵Ebed lo Gal thuq las wus khomh mas yap yvlyis, Abimelek yahge nyah dius jens nyvng lyis nyamoq gas tamh joqyos masyah tsain thuq los.

³⁶Gal hauh bang lyis nyvng las Zebul lyis, Yoeuh aq, boms thyoh masyah dius tsain gyoh los, ge. Zebul gas, Hauh zis dius ma nghuot, boms dah siyet dvtsain nghuot, ge.

³⁷Gal doms taiq, Yoeuh aq, dius jens jing thyoh masyah gyoh los, dvphung ka loq yoeuh soeu dah dyoms zains cho chank los nyeis, ge.

³⁸Zebul nyang lyis taiq, Ngamoq Abimelek lhyi chamus phuqsoe chah lah, ge nyei soeu nvng nghuot. Nvng moengs zis khapheh loh goeus? Haih soeu ka nvng nyhap soeu nghuot, Gvshih nvng thuq las nyamoq lyis zan aq, ge.

³⁹Gal gas Shekhem bang lyis shwih las Abimelek lyis thuq zan.

⁴⁰Abimelek nyang lyis chank khat las nyang phang loh. Nyah dius jens nyoshoq dvmdap, wus khomh mas yangh joq.

⁴¹Abimelek gas Aruma mas nyeis las Zebul eq Gal yahge nyah boekyis lyis Shekhem mhayah khat tyamp las nyamoq houmha ma nyeis lo.

⁴²Nungsnvp, Shekhem jens gas pa pheh thuq loh das zis toeuq yvlyis Abimelek xo nyvng.

⁴³Housoeh las Abimelek gas nyah dius jens lyis somh phung gvm las pa mha lhom nyeis. Nyang dius jens wus masyah thuq los zis nyvng lyis hau lhom masyah thuq las, nyamoq lyis sat.

⁴⁴Abimelek gas nyah dius dvphung wus khomh mas loh wuih zungh nyeis uhlyis gohtoeu aiq phung ka pa mha nyeis bang dvnganh lyis zan zis yah sat.

⁴⁵Abimelek gas dvnyeih gonh tsoq zan las nyang hauh wus lyis xauh yoeus. Nyang wus mas bang lyis sat. Wus lyis thyoq khyoq las coh yah nghop tyamp.

⁴⁶Shekhem tyoeuqzvm mas dah uhshe bang dvnganh hauh cho xauhgyo lyis, nyamoq gas gau thoenkgus jesdvp xo lha, thanghchvp kuot toh dah Bala yhenmuh mas tsain zain nyeis.

⁴⁷Nyamoq houmha zain nyeis cho Abimelek lyis tsain taiq kyoh.

⁴⁸Housoeh las nyang gas nyah dius jens yah Zalmon boms mas doq loh. Nyang houmha wuzung yoeus, saiqko choeu lha kvtoq mas kih wuq zis yah nyah dius jens lyis, Ngos kuot teh lvnyap chank kuot geh, ge.

⁴⁹Housoeh las yuk khanghmuh saiqko zan wuq las Abimelek thang mha chank loh zis yah hauh zis hauh thoenkgus jesdvp mas boms las nyi ngheq kat. Housoeh hauh thoenkgus jesdvp khau mha dius jens dvnganh shei loh. Vbusbih vmesbih dvkhyoengh ko shei.

⁵⁰Hauh thang lhyi Abimelek gas Thebez wus lyis lhaink zis yah yoh zan yoeus.

⁵¹Nghuot laus eq wus vkhau mha goeng dah tyoeuqzvm dvkoeuq bos. Hauh yvmas wus mas dah uhshe bang eq bos dah vbusbih vmesbih tsain phang wvng las khomh nyheih lho lha yhenkhung pheh loh nyeis.

⁵²Abimelek hauh tyoeuqzvm lyis zan das zis nyi ngheq das ge khomh pheh loh uhlyis,

⁵³vmesbih dvyuk mhoq dvshan nyah uhloms mas doeuh khyoq las nyah uhloms gwi tyamp.

⁵⁴Housoeh nyang nyah kyonhkhyi wons soeu loyvm lyis lvnyap khi lha, Nah sham she lha ngos lyis sat aq. Vmesbih yah ngos lyis sat ge zis ngos ma o, ge. Housoeh las nyah loyvm lo nyang lyis thauh las nyang shei.

⁵⁵Israel jens Abimelek shei zis nyvng seq lyis nyamoq dvnganh nyamoq yhen pheh loh lo.

⁵⁶Housoeh Abimelek gas nyah vmang vnoeuh nyhetci lhyi sat zis yah nyah uwus lyis shuot yvmvyah, Mangso ka nyah dah dius sat yobos lyis lvto phuk dyei zis nghuot.

⁵⁷Shekhem bang kuot dah lhung cho gvng mas eq Mangso ka nyamoq lyis shanghsenh nhang. Housoeh Gideon lo Yotham nhoengh zis yah dvyhangteh nyamoq xauh kham.