Read Achang 2 YOHAN 1 Bible Online

2 YOHAN 1 - Achang bible

2 YOHAN 1

¹Ngos jyetdap jyoeng dah vmesbih yahge nyah lo jens[1] jyank mas --- Ngos logis maussauh lhaih kat. Nvng lyis ngos kyingh ma nghuot, jyoeng cho lhyi seq bang dvnganhmoq eq nvng lyis tsain jyetdap.

²Khasoeh ge lyis, hauh jyoeng cho yah jyank mas bos las yang yah dvgeh vcaiq vto nyeis das xiklyis nghuot.

³Uwus Mangso yahge Uwus dah Lo Yesu Khristu jyank masyah jyehjuh, nhaiqnyen zis yahge nyenstap zis gas jyoeng yvmas eq, jyetdap yvmas eq, yang yah dvgeh nghuot bas jungh.

⁴Nah lo jens dvyhamh gas Uwus Mangso yang lyis tyingtoh goeus zis yah dvyhangteh, hauh jyoeng cho mha kang dwis nyeis zis nyvng las ngos svsoh gaus.

⁵Housoeh las jyetdap dah vmesbih eh, yang dvyuk yah dvyuk jyetdap goh nyeis das xiklyis ngos nvng lyis khyoeuq kat. Gvshih ngos lhaih kat dah cho ka tyingtoh dang vsaiq ma nghuot, cangxeih lyis yah yang xauh yoeus toh goeus dah tyingtoh dang dvnghuot.

⁶Gvshih ngos taiq nyeis dah jyetdap ge zis gas Mangso dah tyingtoh dang lyis domsyos gyo las chank kuot zis yah kang dwis nyeis cho nghuot. Cangxeih lyis yah namoq dvnganh xauhgyo ku goeus dah tyingtoh dang gas namoq dvnganh jyetdap yvmas kang dwis das cho nghuot.

⁷Yesu Khristu gas cangsoeu gungs tsungh zis yah jweh lyih yvlyis ngoek dah mhuih jyomh bang nyoshoq gas, mungkvn gonh mas tsain thuq gyoh loh goeus. Hou teh bang gas mhuih jyomh bang, Khristu dah jeswus nghuot.

⁸Ngamoq kuot toh dah muhzoh lyis namoq ma chithyuk thyuk namoq phauh shangh zis dyingh dyingh yoh bas jungh, vsainnyang zaih nyeis geh.

⁹Khristu dah jyauh cho mha ma nyeis, hauh yvlyis lai toh khoq soeu hank laus eq Mangso lhyi ma yoh. Hauh jyauh cho lhyi chank nyeis soeu hank laus eq, Uwus lyis eq, Lo lyis eq yoh.

¹⁰Haih jyauh cho ma chi los soeu dvyuk yuk namoq jyank jyweh los lyis, namoq yhen mha vlhom yoeus goh, nyenstap bas jungh oen yangh vsang goh.

¹¹Khasoeh ge lyis hauh soeu lhyi lhom jeshuh soeu hank laus eq, nyah dah ma gis muhzoh mas bos goeus.

¹²Ngos namoq lyis lhaih kat das cho nyoshoq yoh. Nghuot laus eq maussauh mas lhaih ja cheih yah lhaih toh mes zis ma nghuot. Yang dvnganhmoq mas gauslaus cho dyingh shoq xauh yoeus das xiklyis namoq jyank mas jweh las, nhuot tsuk xauh taiq goh das zis lyis ngos nghamhloms nyeis.

¹³Mangso khyen yoeus zis xauh soeu, nvng jyetdap vbi dah lo jens[2] gas nvng lyis jeshuh kat.