Read Achang 3 YOHAN 1 Bible Online

3 YOHAN 1 - Achang bible

3 YOHAN 1

¹Ngos jyetdap jyoeng dah Gai-u jyank mas— Ngos logis maussauh lhaih kat.

²Ngah dyenschangh phoq eh, nah dyos nyeisgis yaplhoq zis ngos seq, nvng cho khvt khanghmuh mas nyeisgis yaplhoq las nvng yanghzan nyeis bas jungh, ngos vkyuh dung.

³Nvng vjangh yah jyoeng cho mha suh e nyeis zis yah dvyhangteh, hauh jyoeng cho mha nvng kha iq wontang nyeis cho lhyi Khristan vmang vnoeuh moq dvyhamh jweh los las tsain taiq kyoh uhlyis ngos svsoh gaus.

⁴Ngah lo jens, hauh jyoeng cho mha tsain suh e nyeis zis lyis xauhgyo dah gausyis joqyos thoq lyis zes dah gausyis joqyos ngos mas gohtoeu ma bos lo.

⁵Ngah jyetdap buisnoms phoq eh, Khristan vmang vnoeuh moq, nyamoq lvbaus dvnghuot shih lyis nvng kuot dyei dah muhzoh dvnganh gas lomluk dah muh nghuot.

⁶Nyamoq nah jyetdap cho lhyi haih phung mha los tsain taiq kyoh. Nyamoq gyung cho yoh tsoq loh das nyhenshang jyehjuh yah bos jenh pangh kat shih aq. Houka Mangso lyis nhaiqdoeus nhang cho nghuot das.

⁷Khasoeh ge lyis nyamoq gas ma loms ma jingh bang masyah pangh thuk cho ma lhom yoeus yoeus, Khristu dah sasvna muhzoh mas tsain suh e bang nghuot.

⁸Housoeh las hauh jyoeng dah muhzoh mas nyamoq yah muhwons changh yoh bweh bas jungh, yang Khristan jens gas haih dius jens lyis pangh thuk chah.

⁹Hauh phung mha ngos maussauh lhaih kat goeus. Nghuot laus eq nyamoq dah uhjyung duot mes soeu Diotrephe gas ngos taiq kat dah cho jens lyis domsyos gyo das zis ma nghuot.

¹⁰Ngos jweh los lyis nyang kuot tyamp goeus dah cho khvt khanghmuh lyis taiq kyoh das. Nyang gas yang lyis svsoh ma gis dang yahge hwah dang taiq. Nghuot laus eq hauh zis nyah xiklyis ma tham shih las, Khristan vmang vnoeuh moq jweh los lyis nyang ma lhom yoeus thoq lyis ma goh lhom yoeus mes bang lyis eq tomp tyamp las phung masyah eq khat thuq tyamp.

¹¹Ngos jyetdap dah buisnoms phoq eh, ma gis cho lhyi vtoeuq yoeus goh, gis cho lhyi dvtoeuq yoeus geh. Gis dah muh kuot soeu ka Mangso dah zis nghuot. Ma gis dah muh kuot soeu ka Mangso lhyi ma seq.

¹²Dius yuk khanghmuh gas Demetrio dah gis cho lhyi kanghjyoeng tsain kat. Nyang kuot dah muhzoh gas jyoeng dah Mangso dang yah yih joq. Ngamoq eq kanghjyoeng tsoq kat las ngamoq kat dah kanghjyoeng dang gas jus yvlyis nvng seq.

¹³Ngos nvng lyis taiq das cho nyoshoq yoh; nghuot laus eq pen yahge lhaih cheih yah ma mes lhaih lo.

¹⁴Ma nyangh lyis nvng yah yoh xauhgoh das zis ngos nghamhloms nyeis. Hauh uhlyis yah aiq yuk nhuot tsuk xauh taiq goh das.

¹⁵Nvng nyenstap nyeis bas jungh, Nah buisnoms jens dvnganh nvng lyis jeshuh kat. Nvng eq ngamoq dah buisnoms jens dvnganh lyis bos jeshuh dyei aq.