Read Achang NYOQNYVNG 10 Bible Online

NYOQNYVNG 10 - Achang bible

NYOQNYVNG 10

¹Hauh thang lhyi, Yombos dah gohtoeu loeuswons dvyuk maukhung masyah gyoh los zis ngos nyvng. Nyang gas jyommauh lyis wuot chi lha nyah uhloms yvmlhaink yah sainyvng yoqgan chent toh. Nyah nyoqnho ka buis yah doeus. Nyah khyei ka nyi zains teh nghuot.

²Nyah loq khau mha phank toh dah sauhdain lo dvkoeuq lyis chi toh. Nyah loqyos khyei ka nvmukdra thoq mas, loqwi khyei ka tungyos mas nang toh las,

³khangkhyi nyings teh, thwe zainsmuh yah yomkat kaiq kat. Nyang kaiq kat lho lhyi maujau jau dah thwe zainsmuh nyhet koeuq yah tsain toeuh thuq los.

⁴Hauh maujau thwe taiq thuq kat yah dvyih ngos lhaih comh das sont nyeis. Nghuot laus eq maukhung mha dah hai maujau thwe nyhet koeuq taiq thuq cho lhyi nghop shung toh aq. Vlhaih toh ge dah thwe ngos xauhgyo.

⁵Hauh thang lhyi nvmukdra yahge tungyos mas yap joq, ngos nyvng dah loeuswons soeu ka nyah loqyos loq lyis maukhung pheh tuonh las,

⁶vcaiq vto dwis nyeis las maukhung, nyeisjvng, nvmukdra mas bos ya bos zis gvnkhanh toh dah Mangso nyings lyis yoeus las maukhi zis gas, vyoq shishenh sheq toh das cho ma bos lo.

⁷Nghuot laus eq loeuswons nyhet vyuk lvbuh muot kat lyis Mangso ka nyah jyeidwis jens ge, lvpe jens lyis taiq toh goeus zis yah dvyhangteh nyah dah noq thank nghamh toeuq cho lhyi tyink das, ge.

⁸Hauh thang lhyi maukhung mhayah ngos xauhgyo ku dah thwe, ngos lyis doms taiq zis gas, nvmukdra yahge tungyos mas yap joq dah loeuswons loq mas phank toh dah maussauh lyis e yoeus aq, ge.

⁹Hauh uhlyis loeuswons jyank mas ngos e lha, Hauh sauhdain lo ngos lyis dyei aq, oen dung. Nyang gas, Yoeus las zo aq. Hauh zis gas nah womdau mas khoh das, nghuot laus eq nhuot mas gas dyoyhei teh chau das, ge ngos lyis taiq.

¹⁰Hauh uhlyis hau sauhdain lo lyis ngos yoeus las zo. Houka ngah nhuot mas dyoyhei teh chau, nghuot laus hauh yvlyis dye nyhau lhyi ngah womdau mas khoh.

¹¹Hauh thang lyis loeuswons soeu ka dius nyau nyoshoq, munghdan nyoshoq mas dah nyingh nyoshoq yahge hwankti nyoshoq yah sen Mangso dah dang lyis nvng doms xauh taiq das, ge ngos lyis taiq.