Read Achang NYOQNYVNG 11 Bible Online

NYOQNYVNG 11 - Achang bible

NYOQNYVNG 11

¹Hauh thang lhyi loeuswons soeu ka keq ja wuseh teh zis dvseh ngos lyis dyei las, Toq aq. Mangso dah yhenmuh lyis eq, phon lhyi eq, keq aq. Yhenmuh mas paiq nyeis bang lyis eq suon yoeuh aq.

²Nghuot laus eq hau yhenmuh dah nghe pheh gas vkeq. Khasoeh ge lyis hau zis gas gohnyau bang lyis dye kyauh tyamp goeus las, lhamhmuh nyeici aiq khyvp top tsain nang nheh tyamp das.

³Tsai ngah kanghjyoeng aiq yuk lyis ngos nhang kat das nghuot las nyah aiq yuk gas yanghthung dyi wuot zis yah buisnyeis 1,260 nyeih top Mangso dah dang lyis tsain taiq das.

⁴Hauh kanghjyoeng aiq yuk gas nyeisjvng dah Yhensain xikkhonh mas cuk toh dah tsanlun saiq aiq zains yahge nyi tuonh gus aiq koeuq tsain nghuot.

⁵Dius dvyuk yuk nyah aiq yuk lyis jes sont bah ge uhlyis, nyah zomh nhuot masyah nyi thuq los las jes jens lyis ngheq tyamp nhang. Nyamoq lyis jes sont das xiklyis yomkat ya kat bang dvnganh lyis heisoeh sat zis tsain xauh das.

⁶Nyah aiq yuk gas Mangso dah dang taiq kyoh das buisnyeis gyo lyis, mau ma wus das xiklyis, maukhung lhyi nyheih tyamp das toeuh tsain yoh. Jeis lyis suih yoh duot nhang dah toeuh eq, nyamoq mas chah dah shishenh khanghmuh mungkvn lyis yomh vja ja yah shanghsenh nhang das toeuh eq, tsain yoh.

⁷Nyah aiq yuk vsainnyang dah taiq kyoh muhzoh dye thang lyis dwangchukbuiq masyah thuq los dah yewus gas nyah aiq yuk lyis zan ung lha sat zis xauh das.

⁸Nyah aiq yuk dah mvng gas nyah aiq yuk dah Yhensain taplhangh sat zis xauh dah wusmuh talhoeu cho mha joq joq das. Hauh wus lyis vlho khyvlyis nyhink dah nyings gas Sodom wus, nghuot ya Egutu wus nghuot.

⁹Hauh uhlyis vnyau vhuh, nyingh vja ja kat bang yahge munghdan khanghmuh mas dah dius nyau jens gas nyah aiq yuk dah mvng lyis nyhop das toeuh ma tsain dyei das.

¹⁰Nyeisjvng mas nyeis dah dius jens gas, hauh loeuswons aiq yuk shei gvng mas, svsoh tsain gaus zis yah nyang changh nyang jyungshuk tsain thaiq goh, ung cho yoh dah pwe eq tsain kuot. Khasoeh ge lyis hauh loeuswons aiq yuk gas nyeisjvng mha dah dius nyoshoq lyis svsoh tsain shoeuhshih goeus.

¹¹Gvshih hauh buisnyeis somh nyeih dvkhyauq lai thang lyis Mangso jyank masyah dwis nhang dah kang soq nyah aiq yuk jyank mas wvng los las nyah aiq yuk gas zungh zungh tsain yap joq. Nyah aiq yuk lyis nyvng bang gas svsoh tsain gyuk nvn.

¹²Hauh thang lhyi loeuswons aiq yuk gas, Heimha doq los aq, ge maukhung mas dah lui thwe zainsmuh dvkoeuq tsain xauhgyo. Nyah aiq yuk dah jes jens zungh yoeuh nyeis lyis jyommauh ji las maukhung pheh tsain doq loh goeus.

¹³Hauh shishenh lyis maunyeis dwis zainsmuh dwis los las hauh wus ciboms dvboms gyop tyamp, dius eq nyhet khyoengh bos shei tyamp. Nyet joq bang gas tsain gyuk dvn zis yah, maukhung Mangso dah kuhxing nyoqnho ngelang lyis tsain chungh.

¹⁴Mvtanhzoe aiq vkoeuq lai loh goeus. Nghuot laus eq mvtanhzoe somh vkoeuq lvnyap jweh los das.

¹⁵Hauh thang lhyi loeuswons nyhet vyuk nyah lvbuh muot kat. Hauh uhlyis maukhung mha thwe zainsmuh thuq los zis gas, Mungkvn mas dah munghdan jens lyis guon dah toeuh gas yah Yhensain yahge nyah Meshia dah loq mas nghuot goeus yvmvyah nyang gas vcaiq vto guon nyeis lo das, ge.

¹⁶Hauh uhlyis Mangso xikkhonh, nyamoq nyang hwankti tank mas tsung toh dah logis aiqci nyei yuk gas, nyeisjvng mas gop zis yah Mangso lhyi paiq las taiq zis gas,

¹⁷Gohlhain caiq, gvshih caiq, thang caiq lyis eq nyeis dah Maukhung Jesphung Yhensain Mangso eh, nvng gas nah zau guon yomsoq chi lha mungkvn lyis guon nyeis goeus yvmvyah ngamoq nvng lyis chungh.

¹⁸Nvng nhaiqyo das vyoq shishenh eq, shei bang lyis soetuon das vyoq shishenh eq, gvshih shishenh jweh goeus las dius nyau jens nhaiqlom tsain dyis nyeis goeus. Nah jyeidwis lvpe jens lyis eq, nah dius nyau jens lyis eq, nvng lyis tsain gyukwoms las phauh nyang nyeis dah ngislo kuhlo lyis eq phauh shangh das zis yahge, nyeisjvng lyis mhont bang lyis mhont tyamp das buisnyeis jweh los, ge.

¹⁹Hauh uhlyis maukhung mha Mangso dah yhenmuh phank hanh los las, yhenmuh mas Thanghchvp Kwi lhyi ngos nyvng. Hauh thang lhyi maunyoq nyik, nyings huomh toh thwe, maujau jau, maunyeis dwis zis yah gyu mau lhungthungh bweh los.