Read Achang NYOQNYVNG 12 Bible Online

NYOQNYVNG 12 - Achang bible

NYOQNYVNG 12

¹Hauh thang lhyi maukhung mha mauhphoh dah vlho zainsmuh dvkoeuq thuq los zis gas, vmesbih dvyuk buis lyet chi lha lhamhmuh lyis nang zis yah kyi dvci aiq lom dap dah buismuk lyis tsungh toh.

²Nyang gas loshang gungs lyis chi lha lokhoeu das xiklyis lokhoeu nos nos yvmvyah kaiq ngaus nyeis.

³Tsai, maukhung mha mauhphoh dah gohtoeu vlho zainsmuh dvkoeuq thuq los. Uhloms nyhet lom dap las khyau dvci lom yuk nes dah mvnjung zainsmuh dvdoeu gas, nyah uhloms jens mas buismuk nyang koeuq nyang tsain tsungh toh.

⁴Nyang gas maukhung mha dah kyi somh boms dvboms lyis nyah lhyank yah khyom yoeus las nyeisjvng mas khyoq kat. Hauh mvnjung gas lo khoeu bah ge dah vmesbih xikkhonh mas yap joq las, vmesbih lo khoeu yah dvyih hauh lo lyis kui nyhau tyamp das ge langh nyeis.

⁵Hauh vmesbih gas dius nyau khanghmuh lyis thyeq lhamloq yah guon das yukgis lo khoeu. Nghuot laus eq nyah lo lyis Mangso yahge nyah hwankti tank xikkhonh mas chot she toqh yoeus zis xauh.

⁶Hauh vmesbih gas nyah xiklyis Mangso sont toh dyei dah mhanhdyvp pheh phang loh, hau joqyos mas nyang lyis buisnyeis 1,260 nyeih jweh shoq khoeu tsoh das.

⁷Hauh thang lhyi maukhung mha jeszan goh nyeis. Mikhael yahge nyah loeuswons bang gas hauh mvnjung yah zan goh nyeis. Hauh mvnjung eq nyah jyeidwis jens yah doms zan goh.

⁸Nghuot laus eq mvnjung somh gvng mas, nyang yah nyah jyeidwis jens maukhung mha nyeis das toeuh ma tsain yoh lo.

⁹Hauh uhlyis mungkvn gonh lyis mhuih jyomh tyamp yius yahge Satan ge gohlhain dah lhangnyis nghuot dah mvnjung zainsmuh gas nyah jyeidwis jens yah dvgeh nyeisjvng mas khat khyoq tyamp zis tsain xauh.

¹⁰Hauh thang lhyi maukhung mas dah thwe zainsmuh dvkoeuq gas, Gvshih yah Mangso dah khyuot yoeus cho ka jweh los goeus. Gvshih Mangso ka hwankti nghuot cho nyah yomsoq chixoeuq. Gvshih nyah Meshia gas nyah dah zau guon yomsoq lyis chixoeuq goeus. Khasoeh ge lyis yah boekyis lyis yah Mangso xikkhonh mas nyeih nyenh yobos xo, tyi xo soeu lhyi maukhung masyah khat khyoq tyamp goeus.

¹¹Nyamoq gas Yvnglo dah suih yahge nyamoq kanghjyoeng kat nyeis, dan dah Mangso dang gvng mas nyang lyis yoh ung tyamp. Nyamoq gas shei shoq vsainnyang kang lhyi tsain kyauh tyamp.

¹²Housoeh yvmvyah maukhung jens yahge houmha bos joq bang eh, tsain gauslaus nyeis geh. Nghuot laus eq nyeisjvng yahge nvmukdra gas mvtanhzoe tsain xauh. Khasoeh ge lyis Satan ka nyah buisnyeis dvtsiq dvnyet lo zis seq yvmvyah nhaiqlom dyis zis yah namoq jyank pheh gyoh lyih goeus, ge tsain taiq zis lyis ngos xauhgyo.

¹³Hauh mvnjung gas nyang lyis nyeisjvng mas khyoq kat cho seq goeus ya yukgis lo khoeu kat dah vmesbih lyis nyhik das ge chank xo.

¹⁴Hauh uhlyis vmesbih gas mvnjung dah jeswus masyah luiq las, mhanhdyvp masyah nyang nyeis dah joqyos mas yoh dang loh das xiklyis zonsmuh dah dungs aiq koeuq xauh yoeus. Nyang gas hauh joqyos mas somh zvn lhamhmuh khyuk khyvp mvnjung dah jes sont cho lhyi ma gyuk noh, gomh kat zis xauh das.

¹⁵Mvnjung gas hau vmesbih lyis jeisbaus yah nyhoeuh kat das ge nyah nhuot mas dah jeis lyis jeislvng teh hauh vmesbih jyank mas muot kat.

¹⁶Nghuot laus eq nyeisjvng gas hauh vmesbih lyis wons kat. Nyeisjvng gas nyah nhuot haq las hau mvnjung nhuot masyah muot kat dah jeislvng lyis nyhau tyamp dyei.

¹⁷Hauh uhlyis mvnjung gas hau vmesbih lyis nhaiqlom dyis las, vmesbih dah nyet joq vnyau vshih ge Mangso dah tyingtoh dang chank zis yahge Yhensain Yesu chixoeuq dah jyoeng dang mas wontang chank nyeis bang lyis zan tyamp das xiklyis thuq loh.

¹⁸Hau mvnjung gas nvmukdra dah jyankyvm dah sihmuis yos mas yap joq.