Read Achang NYOQNYVNG 13 Bible Online

NYOQNYVNG 13 - Achang bible

NYOQNYVNG 13

¹Hauh uhlyis nvmukdra masyah Yewus dvdoeu thuq los yvlyis ngos nyvng. Nyang mas khyau dvci lom yahge uhloms nyhet lom dap. Hauh khyau koeuq khanghmuh mas buismuk tsain tsungh las uhloms koeuq khanghmuh mas Mangso dah nyoqnho ngelang lyis khoengh lhoq shomh dah nyings tsain dap.

²Hau ngos nyvng dah Yewus gas lutyoeuh yah doeus las nyah khyei ka woms khyei teh, nyah nhuot gas khangkhyi nhuot teh nghuot. Mvnjung gas nyah phunk, nyah tank yahge nyah dah kuh thank vmingh lyis eq, hau Yewus lyis dyei.

³Yewus dah uhloms jens masyah uhloms dvlom gas shei das iq dvmdap teh mus nyeis. Nghuot laus eq hauh dvm gas gis tyamp goeus. Nyeisjvng gonh gas hauh yewus dah cho tsain mauh hangh las nyah thang tsain chank nyeis.

⁴Mvnjung gas yewus lyis nyah dah vmingh kyauh goeus las, dius yuk khanghmuh hauh mvnjung lyis tsain paiq. nyamoq hauh yewus lyis eq tsain paiq zis yah hai yewus yah hank yoh doeus? Nyang lyis hank yoh khyank zan das lah, tsain ge.

⁵Hauh yewus gas, khwank zis yahge Mangso lhyi loeusmus soqzo dang taiq das zis eq, lhamhmuh nyeici aiq khyvp top toeuh lyis yoh yhung nhang.

⁶Nyang gas, Mangso yahge Yhensain dah nyings lyis eq, Mangso nyeis dah maukhung lyis eq, maukhung mha nyeis bang dvnganh lyis eq, loeusmus soqzo dang taiq nyeis.

⁷Nyang gas Mangso dah dius jens lyis zan las ung das toeuh eq, mau khanghmuh mas nyeis, nyingh vja ja kat dah dius nyau khanghmuh lyis guon das toeuh eq dyei toh zis xauh soeu nghuot.

⁸Sat tyamp zis xauh goeus Yvnglo dah kang maussauh buk mas nyeisjvng ma xi shih lyis yah nyings lhaih toh zis xauh goeus mungkvn dius jens masyah lai las nyeisjvng mas nyeis dah dius jens dvnganh hauh yewus lyis tsain paiq das.

⁹No dap soeu ka xauhgyo bas jungh.

¹⁰Nyhik zis xauh das soeu ka nyhik zis jyoengh xauh das. Moengsa yah shei das soeu eq moengsa yah shei das. Heika Mangso dah lo jens mas jhen zis yah lomsjingh cho bos chah zis taiq kyoh.

¹¹Hauh thang lhyi nyeisjvng khau masyah thuq los dah yewus gohtoeu dvdoeu lyis ngos nyvng. Nyang mas Yvnglo dah khyau teh dah khyau aiq lom dap las mvnjung teh dang taiq nyeis.

¹²Nyang gas cangxeih yewus dah vmingh dvnganh lyis hauh yewus dah xikkhonh mas yhung lha shei bah ge shoq dah dvm gis goeus, cangxeih yewus lyis nyeisjvng yahge houmha nyeis bang dvnganh lyis tsain paiq nhang.

¹³Hauh yewus aiq vdoeu gas mauhphoh vlho zainsmuh tsain chixoeuq nyeis. Dius nyoshoq dah xikkhonh mas maukhung masyah nyeisjvng mas nyi gyoh los nhang.

¹⁴Nyang gas xik lyis dah yewus xikkhonh mas chixoeuq nhang dah vlho jens lyis chixoeuq las, nyeisjvng mas nyeis dius jens dvnganh lyis mhuih khwangh tyamp. Hauh yewus gas moengsa yos dvmdap laus eq ma shei doms gis los dah yewus lyis chungh zis yah nyah gungs lho kuot das xiklyis nyamoq lyis jyeinhang toh.

¹⁵Hauh yewus dah gungslho dang yoh taiq das xiklyis eq, hauh yewus dah gungslho lhyi ma paiq paiq nyeis yah nyeis bang lyis sat das zis eq, yewus aiq vdoeu gas hauh gungslho mha soq muot kat dyei das toeuh eq yoh.

¹⁶Hauh yewus gas cangsoeu dius dvnganh ngislo kuhlo, dis bang nyungs bang, luiq bang yahge jons jens dvnganh lyis vsainnyang dah loqyos loq mas nghuot ya ngelang mas nyah dah loqsoh tsoengh tap nhang.

¹⁷Hauh yewus dah nyings nghuot ya hauh gungsthaiq sonzoh ge dah loqsoh dvkoeuq koeuq ma dap soeu hank laus eq vyhang ungh das, wis das toeuh ma tsain yoh.

¹⁸Haih cho yah sen lha joeui bos chah. Joeui bos soeu ka hauh yewus dah sonzoh vjyuk lyis daq phui yoeus. Khasoeh ge lyis hauh sonzoh gas dius dvyuk dah nyings nghuot. Nyah sonzoh gas 666 nghuot.