Read Achang NYOQNYVNG 14 Bible Online

NYOQNYVNG 14 - Achang bible

NYOQNYVNG 14

¹Hauh thang lhyi ngos yoeuh kat lyis hauh yvnglo gas Zion boms thoq mas yap joq zis ngos nyvng. Nyah nyings yahge nyah uwus dah nyings lyis nyamoq dah ngelang mas tap toh dah dius 144,000 gas Yvnglo yah dvgeh tsain nyeis.

²Tsai, maukhung mha dah jyvthyangh jeis gyoh sam gyo zis yahge maujau lhapzainstain teh dah thwe lyis ngos xauhgyo. Hauh thwe ka toenk khvlhank lyes bang toenk bat kat lyis nyings thuq los dah thwe teh nghuot.

³Hauh dius 144,000 gas hwankti tank xikkhonh mas eq, yewus nyei doeu yahge logis jens xikkhonh mas eq, yap uhjyangh Chungh Dang vsaiq tsain chungh nyeis. Nyeisjvng mas dah cangsoeu dius nyau dvnganh masyah wis las khyuot zis xauh goeus dah dius 144,000 masyah lai las hauh Chungh Dang lyis hank eq ma yoh tsain xuq.

⁴Hauh bang gas vmesbih jens yah vwot v-oeu ma kuot yoeuh ku dah yukgis lo jens nghuot. Nyamoq gas Yvnglo khapheh loh khapheh tsain chank loh. Nyamoq gas nyet joq dah cangsoeu dius nyau jens masyah wis las khyuot zis xauh las, Mangso yahge Yvnglo jyank mas cangxeih kyauh toh bang nghuot.

⁵Nyamoq khanhamp eq hwah dang ma taiq ku. Yobos huon chank ma bos bang nghuot.

⁶Hauh thang lhyi maulvt mas dang jyon yenh dah loeuswons soeu dvyuk ngos nyvng. Nyang gas dius nyau, dius koq khanghmuh, nyingh vja ja yahge munghdan khanghmuh lyis taiq kyoh das vcaiq vto dah gausyis dang lyis chi lyih.

⁷Hauh loeuswons soeu ka cangsoeu dius nyau khanghmuh lyis soetuon das shishenh jweh goeus. Housoeh las Mangso lhyi gyukwoms nyeis geh, nyah vcaiq vto kuhxing dah phunk lyis chungh nyeis geh, maukhung nyeisjvng, nvmukdra yahge jeisthuq dwang jens lyis gvnkhanh toh soeu lhyi paiq nyeis geh, ge thwe zainsmuh yah taiq nyeis.

⁸Tsai, loeuswons soeu aiq vyuk gas, xiklyis dah loeuswons soeu thang mha thuq los las Babilon wus zainsmuh gyop gyoh goeus, gyop gyoh goeus. Hauh wus gas yauxi muh mas nyetnau ge yet dah zvbiq dius nyau dvnganh lyis shuk nhang goeus, ge.

⁹Tsai, loeuswons soeu somh vyuk gas cangxeih dah loeuswons aiq yuk thang mha thuq los las, hauh yewus yahge nyah gungslho lhyi paiq las vsainnyang ngelang, nghuot ya loq mas loqsoh tap yoeus bang hank eq,

¹⁰Mangso dah nhaiqlom dyis ge dah kom mha dyingh shoq huot kat toh, svsoh yet nhaiqlom dyis ge dah zvbiq xauh shuk das. Hauh thoq ma goh, nyamoq gas gyingshang dah loeuswons bang xikkhonh mas eq, hau Yvnglo dah xikkhonh mas eq, nyi yah kant duk nyeis yvmas vshoh vjyen shoeuhshih zis xauh das.

¹¹Nyamoq lyis vshoh vjyen shoeuhshih yvmas yah nyikhauh gas vcaiq vto nhoenk doq loh nyeis. Hauh yewus yahge nyah gungslho lhyi paiq bang yahge, nyah nyings dah loqsoh tap zis kham yoeus bang dvnganh gas, nyeih nyenh dvtsiq eq sunghhuq das zis ma nghuot, ge thwe zainsmuh yah kaiq nyeis.

¹²Mangso dah tyingtoh dang lyis chank tyink las, Khristu mas wontang ge, Mangso dah duis jens gas haih cho mha jhen cho bos chah.

¹³Hauh thang lhyi maukhung mhayah, Lhaih toh aq; gvshih masyah Yhensain dah muh wons wuq zis yah shei loh bang gas ngelhoq, ge dah thwe dvkoeuq lyis ngos xauhgyo. Dyos eq, nghuot goeus! Nyamoq xauh no das. Khasoeh ge lyis nyamoq kuot dah muhzoh vkyuh gas nyamoq mas chank yenh, ge.

¹⁴Tsai, ngos yoeuh kat lyis, jyommauh thyoeu dvkoeuq nyvng. Hauh jyommauh thoq mas dius teh doeus soeu dvyuk tsung toh. Nyah uhloms mas xing buismuk tsungh toh las, nyah loq mas zuk dah banlyenh dvchamh chi toh.

¹⁵Hauh thang lhyi gohtoeu loeuswons soeu dvyuk hauh yhenmuh masyah thuq los las, jyommauh thoq mas tsung toh soeu lhyi, nyeisjvng mas guk nyhink gyop loh goeus. Guk yet shishenh jweh goeus las, guk yet das xiklyis nah banlyenh chi lha yet yoeus aq, ge thwe zains yah kaiq kat.

¹⁶Housoeh jyommauh thoq mas tsung toh soeu ka nyah banlyenh lyis nyeisjvng mas lhwih kat las nyeisjvng mas dah jyo ka dye yhomh goeus.

¹⁷Hauh thang lhyi gohtoeu loeuswons soeu dvyuk gas maukhung yhenmuh khau masyah thuq los zis ngos nyvng. Nyang eq zuk dah banlyenh dvchamh chi toh.

¹⁸Hauh thang lhyi nyi lyis guon dah gohtoeu loeuswons soeu dvyuk gas phon masyah thuq los las, zuk dah banlyenh chi toh soeu lhyi, nyeisjvng mas zvbiq shih nyhink joq goeus yvmvyah nah banlyenh yoeus las zvbiq shih tsain yet yoeus aq, ge thwe zainsmuh yah kaiq las taiq.

¹⁹Housoeh las hau loeuswons soeu ka nyeisjvng mas nyah banlyenh lhwih kat las zvbiq nwis dah vshih lyis tsainh yoeus las Mangso dah nhaiqlom dyis ge dah zvbiq nyhet zwvng mas huot kat.

²⁰Zvbiq shih lyis wus nghe mha nyhet zwvng yah nyhet las, hou mhayah yaus thuq dah suih lvng gas xing choeu main aiqxo, noq pheh nyang lungthungh nyhank bos.