Read Achang NYOQNYVNG 16 Bible Online

NYOQNYVNG 16 - Achang bible

NYOQNYVNG 16

¹Tsai, hauh loeuswons nyhet yuk lyis, Thuq e lha Mangso dah nhaiqlom dyis zis yah dyingh dah kom nyhet koeuq lyis nyeisjvng thoq mas huot khyoq kat geh, ge hauh yhenmuh masyah nyings thuq los dah thwe zainsmuh lyis ngos xauhgyo.

²Hauh uhlyis cangxeih dah loeuswons soeu thuq e lha nyah kom lhyi nyeisjvng mas huot khyoq kat. Hauh uhlyis yewus dah loqsoh tap zis xauh bang yahge nyah gungslho lhyi paiq bang mas gyukphoh yahge xunghxent dah nos dvm bweh thuq los.

³Hauh thang lhyi loeuswons aiq vyuk gas nyah kom lhyi nvmukdra mas huot khyoq kat. Hauh uhlyis nvmukdra jeis gas dius shei dah suih teh bweh tyamp las, nvmukdra khau mas kang dwis ya dwis zis dvnganh tsain shei tyamp.

⁴Tsai, loeuswons somh vyuk gas nyah kom lhyi jeislvng yahge jeisthuq dwang jens mas huot khyoq kat: hauh uhlyis suih bweh tyamp.

⁵Hauh uhlyis jeis zungh das loeuswons soeu ka, Gvshih caiq, gohlhain caiq, goeng toenk joq dah gyingshang Uwus eh, nvng soetuon zis gas dan, ge.

⁶Nyamoq gas Mangso dah dius yahge lvpe jens dah suih lyis huot tyamp yvmvyah nvng nyamoq lyis suih doms shuk nhang. Hauh zis gas nyamoq mas xauh vvng lha xauh zis nghuot, ge taiq zis ngos xauhgyo.

⁷Hauh thang lhyi phon mas dah thwe dvkoeuq eq, Maukhung Jesphung Yhensain Mangso eh; nah soetuon cho ka jyoengh jus las dan, ge taiq zis ngos xauhgyo

⁸Tsai, loeuswons nyei vyuk gas, nyah kom lyis buis mas huot kat. Hauh uhlyis buis gas dius jens lyis svsoh ngeh zis yah ngheq jyomh tyamp das toeuh lyis yoh.

⁹Housoeh las dius jens gas svsoh ngeh zis yah ngheq jyomh tyamp zis xauh las, yomh lyis guon dah Mangso nyings lyis eq loeusmus soq tsain zo. Nghuot laus eq nyamoq gas nhaiqlom ma thaiq, zes thank dah Mangso phunk lyis eq ma tsain chungh.

¹⁰Hauh thang lhyi loeuswons oeng vyuk nyah kom lhyi yewus hwankti tank mas huot khyoq kat. Hauh uhlyis yewus dah munghdan gonh mas soeng soeng noq tyamp. Hauh dius jens nos khih las nyamoq dah lhyo ngat chink loh.

¹¹Housoeh nyamoq nos zis yahge dyingsjyen nos dvm bos gvng mas nyamoq gas maukhung Mangso lhyi tsain nhoengh. Nghuot laus eq, nyamoq nyang dah ma gis wotwu masyah nhaiqlom ma tsain thaiq.

¹²Hauh thang lhyi loeuswons khyuk vyuk nyah kom lhyi Uphrat lvng mas huot khyoq. Hauh uhlyis buisthuq mau mas dah hwankti jens yoh los das cho bangh das xiklyis hauh jeismuh lvng kanh tyamp.

¹³Hauh uhlyis puh teh ma lhoq ma shang dah sidyos somh koeuq lyis ngos nyvng. Nyamoq gas, mvnjung dah nhuot, yewus dah nhuot, lvpe hwah dah nhuot masyah tsain thuq los.

¹⁴Nyamoq gas vlho yoh chixoeuq dah yius jens dah dyos tsain nghuot. Hauh dyos somh koeuq gas Maukhung Jesphung Mangso dah buisnyeis zainsmuh soetuon nyeih lyis jeszan das xikyis, nyeisjvng gonh dah hwankti jens lyis tsainh yoeus das ge tsain thuq loh.

¹⁵Yoeuh aq, khauh soeu teh ngos jweh los das, housoeh svbih xikkhonh mas shohchen yenh las xoq ma phuh bas jungh, phuksohlhaiq mus las, vsainnyang dah dyimis lyis tsomh nyeis soeu ka ngelhoq.

¹⁶Hauh yius jens gas hwankti jens lyis Hebre nyingh pheh yah Armagedon ge dah joqyos mas khi tsainh toh.

¹⁷Hauh thang lhyi loeuswons nyhet vyuk nyah kom lyeis mas huot lhank kat. Hauh uhlyis, Muhzoh dye tyamp goeus, ge yhenmuh khau, hwankti tank masyah thwe zainsmuh thuq los.

¹⁸Hauh shishenh lyis maunyoq nyik, thwe nyings huomh toh, maujau jau, gyukphoh dah maunyeis dwis los, nyeisjvng mas dius vsaiq gvnkhanh nyeih masyah houteh kuh las svsoh than dah maunyeis dwis zis khanhamp eq ma bweh ku.

¹⁹Housoeh las hauh kuhxing dah wusmuh gas somh khyamh gyoh tyamp. Mau khanghmuh mas dah wus jens eq tsain lains gyop tyamp. Mangso ka Babilon wusmuh lyis soh las nyah dah nhaiqlom dyis ge kom mha dah zvbiq jeis lyis shuk nhang.

²⁰Goeujo jens dvnganh dyuk loh las boms jens eq ma tsain joq los.

²¹Hauh uhlyis maukhung masyah dvlom lyis nyeici joi ko bos dah gyutomp maulhung thungh dius jens thoq mas tsain wus gyuon. Hau gyu mau yah joeng gvng mas dius jens gas Mangso lhyi tsain nhoengh. Khasoeh ge lyis hau joeng cho ka gyukphoh nghuot.