Read Achang NYOQNYVNG 18 Bible Online

NYOQNYVNG 18 - Achang bible

NYOQNYVNG 18

¹Hauh thang lhyi loeuswons soeu dvyuk maukhung masyah gyoh los zis ngos nyvng. Nyang mas toeuh zainsmuh bos las, nyah phunk gas nyeisjvng gonh bvng joq.

²Hauh soeu ka thwe zainsmuh yah kuhxing dah Babilon wusmuh gyop gyoh goeus, gyop gyoh goeus. Hauh joqyos gas yius boengh jens dah nyeisgus, ma lhoq ma shang dah dyos jens khaugus yahge ma lhoq ma shang vchoqh vjyot dah nghoq vja ja khaugus bweh tyamp goeus.

³Khasoeh ge lyis dius nyau ja khanghmuh gas hau wus dah yauxi muh mas nyetnau ge dah zvbiq jeis lyis tsain shuk goeus. Nyeisjvng hwankti jens eq, nyang yah dvgeh yauxi muh tsain kuot goeus. Mungkvn mas dah soenghi jens eq nyo dvmsunk dah nyetnau cho gvng mas dis los goeus, ge thwe than yah tsain kaiq.

⁴Hauh thang lhyi maukhung mha thwe dvkoeuq gas, Ngah dius nyau jens eh, thuq los geh, nyah jyank masyah tsain thuq los geh! Nyang yah dvgeh yaunos ma kuot bas jungh, nyang yah hauh joeng zis ma xauh bas jungh.

⁵Khasoeh ge lyis nyah yaunos maukhung jweh shoq zungs toh las, Mangso ka nyah dah lhung cho nyoshoq lyis soh nyeis.

⁶Nyang namoq lyis kuot zis yah dvyhangteh nyang lyis eq doms kuot dyei geh, nyang kuot ya kuot zis yah dvyhangteh aiq huon doms tauh geh, namoq xiklyis kom mha nyang lhaiq dyei dah shuk ja thoq lyis soq aiq huon than shoq nyah kom mha tyink dyei geh.

⁷Vsainnyang gungs lyis nyoqnho ngelang bos goeus, nyeisgis yaplhoq goeus ge nyhoq, nyang lyis shanghsenh cho yahge kuk cho tauh dyei geh. Khasoeh ge lyis nyang gas, Ngos hwankti nyih heimha guon nyeis, ngos chauhmuh ma nghuot. Ngos khanhamp eq kuk zis ma xauh das ge, nyang moengs zo nyeis.

⁸Hauh cho gvng mas yomh, noslom, kukxi cho yahge phanghkhauq gas dvnyeih dvm lyis nyah jyank jweh las nyi yah ngheq tyamp zis xauh das. Khasoeh ge lyis nyang lyis soetuon dah Mangso ka yomsoq bos, ge taiq.

⁹Nyang yah yauxi muh kuot las lhyap lhyi nyetnau dah nyeisjvng hwankti jens gas hauh wus ngeh dah nyikhauh thuq los zis nyvng lyis ngausdyeis ngausnhvp yah kuk nyingh shoh thang tsain thauh das.

¹⁰Nyamoq gas hauh wus joeng cho xauh yvmas nyamoq eq bos xauh joeng das zis gyuk las, we we mas yap uhjyangh, kuhxing zis yah yombos dah Babilon wus eh, mvtanhzoe, mvtanhzoe nghuot goeus nyvng! Nvng gas dvnayi kyingh lyis soetuon zis xauh goeus nyvng, tsain ge das.

¹¹Nyeisjvng thoq mas dah soenghi jens eq, ngausdyeis ngausnhvp yah kuk nyingh shoh thang tsain thauh nyeis. Khasoeh ge lyis nyamoq dah hu hank eq wis lo das zis ma nghuot.

¹²Nyamoq dah hu jens gas ngwis, xing, phauhdap luk, pvleh, jeimuh misyhwiq, khvlhamh buh vwot bos dah misseh, baulo khying yah yoq dah misseh, kyi kyi bvng dah misnes seh, xangh saiq vja ja, cang zwis yah kuot dah vyhang vja ja, phauhdap dah saiq, thunk, thyeq, luk thyoeu kyahsoe vja ja,

¹³maza saiq, conh xangh, xangh ja mura, loban, coeu, zvbiq, ohlhyoq, monh, sunghso chen, noeu, yvng, nyang, nyanglhyingh, jons jens yahge dius jweh shoq tsain nghuot.

¹⁴Soenghi kuot bang gas hau wus lyis, Nvng sain yoeus mes, gis dah vyhang dvnganh gas bi tyamp goeus. Nah zisyos kyahsoe yahge obos phoh dah yungh ja kyahsoe dvnganh eq bi tyamp goeus. Hauh kyahsoe lhyi thang pheh nvng khanhamp eq xauh nyvng lo das zis ma nghuot.

¹⁵Babilon wus lyis nges las hu ungh zis yah dis los dah soenghi jens gas, hauh wus lyis joeng yvmas bos xauh joeng das zis chiqh las we we mas tsain yap joq das. Nyamoq gas ngausdyeis ngausnhvp yah kuk nyingh shoh thang tsain thauh uhjyangh,

¹⁶jeimuh misseh, khvlhamh buh vwot bos dah baulo khying misseh, nes dah dyimis wuot las, xing, phauhdap luk, pvleh jens yah shunk toh wus zainsmuh gas mvtanhzoe, mvtanhzoe nghuot goeus!

¹⁷Dvnayi lyis, yoh dah kyahsoe zisyos dvnganh lyis nyang thyuk tyamp goeus nyvng, ge ngausdyeis ngausnhvp yah kuk nyingh shoh thang tsain thauh das. Sangpho vgyis jens dvnganh yahge houmha bos ji dah gyung suh bang dvnganh, sangpho mas muh zwi bang yah nvmukdra masyah womdau khoeu dah soenghi kuot bang dvnganh gas we we mas tsain yap joq las,

¹⁸hauh wus lyis ngeh nhang, nyilhyam mas dah nyikhauh lyis nyvng lyis, nyamoq gas haih wus iq kuhxing dah gohtoeu wus khanhamp eq ma bos ku lo, ge tsain kaiq.

¹⁹Nyamoq gas vsainnyang dah uhloms mas tsohmop yah lhyauq las, hau kuhxing dah wus gas mvtanhzoe, mvtanhzoe xauh nyvng! Nvmukdra mas sangpho komp bang dvnganh lyis hau zisyos zainsmuh yah tsain dis los nhang dah wus gas dvnayi gyo lyis yoh yah yoh zis somh tyamp goeus nyvng, ge ngausdyeis ngausnhvp kuk nyingh shohthang thauh zis yah tsain kaiq.

²⁰Maukhung eh, hauh wus dyoqbis goeus las gauslaus geh. Mangso dah dius jens eh, lvgyo jens yahge lvpe jens eh, gaus nyeis geh. Khasoeh ge lyis nvng lyis kuot cho dvnganh xiklyis Mangso ka hauh wus lyis soetuon goeus, ge taiq cho ngos xauhgyo.

²¹Hauh thang lhyi yombos dah loeuswons soeu dvyuk gas mhoq iq bos luklom dvkoeuq toeu yoeus las, nvmukdra mas doeuh khyoq kat lyis hauh zis gyoh wvng loh teh kuhxing dah Babilon wus eq doeuh khyoq kat zis xauh das. Thang pheh nyang lyis khanhamp eq xauh nyvng lo das zis ma nghuot.

²²Nvng mas toenk thwe, chungh thwe, khvlhank muot bang yahge lvbuh muot bang dah thwe thang pheh khanhamp eq xauhgyo lo das zis ma nghuot. Joeui vlho yahge soenghi kuot bang thang pheh nvng mas khanhamp eq thuq los lo das zis ma nghuot. Wom mhoq thwe eq thang pheh nvng mas khanhamp eq xauhgyo lo das zis ma nghuot.

²³Nvng mas nyibung dah bvng zis khanhamp eq yoh bvng los das zis ma nghuot lo, loloeu saiq yahge lonyi saiq dah thwe lyis eq nvng mas thang pheh khanhamp eq xauhgyo lo das zis ma nghuot. Nah soenghi jens gas nyeisjvng dah zauguon yomsoq bos thank bang bweh goeus. Nvng gas nyeisjvng mas dah dius jens dvnganh lyis ma jus dah hweq yah mhuih jyomh tyamp goeus nyvng!

²⁴Babilon wus joeng cho xauh zis gas lvpe jens dah suih, Mangso dius nyau jens dah suih yah nghuot goeus. Nyeisjvng thoq mas sat ya sat zis xauh bang dah suih hauh wus mas nyvng goeus las nghuot, ge taiq.