Read Achang NYOQNYVNG 19 Bible Online

NYOQNYVNG 19 - Achang bible

NYOQNYVNG 19

¹Hounyhoq thang lhyi, maukhung mha moqphung zainsmuh dvkoeuq dah nyings thwe yhangteh doeus dah thwe ngos xauhgyo. Nyamoq gas Mangso lhyi chungh geh! Khyuot yoeus cho phunk yahge yomsoq gas yah Yhensain Mangso sain toh.

²Nyah soetuon cho jyoeng las dan joq. Vsainnyang dah yauxi muh yah nyeisjvng gonh lyis lhoeu thyoq nhang dah nghe nyhiq lyis, nyang dang thang thyet goeus. Yhensain dah jyeidwis jens lyis sat gvng mas Mangso ka nyang lyis joeng goeus ge taiq zis ngos xauhgyo.

³Nyamoq doms kaiq zis gas, Mangso lhyi chungh geh, hauh wusmuh lyis ngeh tyamp nhang dah nyilhyam jens dah nyikhauh gas vcaiq vto nhoenk doq loh, ge.

⁴Hauh uhlyis logis aiqci nyei yuk yahge kang dwis yewus nyei doeu gonh gas, phvluk zomhgyuis gop las hwankti tank mas tsung toh Mangso lhyi paiq zoh lyis yah, Amen! Mangso lhyi chungh, tsain ge.

⁵Tsai, hwankti tank masyah nyings thuq los dah thwe dvkoeuq gas, Mangso dah jyeidwis jens dvnganh yahge nyang lyis gyukwoms bang ngislo kuhlo dvnganh, yah Mangso lhyi chungh paiq geh, ge.

⁶Hauh thang lhyi somhlohmoq jens dah thwe teh thwe, jyvthyangh gyoh teh thwe yahge maujau jau thwe teh zis thuq los yvlyis ngos xauhgyo. Hauh thwe ka, Mangso lhyi chungh geh! Khasoeh ge lyis hauh Yhensain ka yah Yomzains Mangso ge dah Hwankti nghuot.

⁷Hauh Yvnglo dah nyihwank pwe shishenh jweh goeus las yang gauslaus zis yah gausyis nyeis goh. Nyah kuhxing cho lhyi tsain chungh nyeis goh. Nyah lonyi saiq gas nyah gungs lyis dye shunk goeus.

⁸Thyoeu lha shang dah jeimuh dyi yah vsainnyang gungs lyis shunk das toeuh nyang yoh. Hauh jeimuh dyi gas Mangso dius jens dah gis wotwu yahge muhzoh lyis taiq zis nghuot.

⁹Hauh thang lhyi loeuswons soeu ka, Hauh Yvnglo dah nyihwank pwe mha khi yoeus zis xauh bang gas ngelhoq, oen lhaih toh aq. Haih dang gas Mangso dah jyoeng dang nghuot, ge ngos lyis taiq.

¹⁰Hauh uhlyis ngos nyang lyis paiq das oen, nyah khyeiyang mas phvluk zomhgyuis. Nghuot laus eq hauh loeuswons soeu ka, Housoeh vkuot! Ngos gas nvng yah eq, nah boekyis yah eq dvgeh Yhensain Yesu chixoeuq dah jyoeng dang lyis chank las zwi zains toh bang dah jyeidwis loeuzomh dvnghuot. Mangso lhyi paiq aq, khasoeh ge lyis Yhensain Yesu kanghjyoeng chixoeuq dah hauh jyoeng dang nyang lvpe jens lyis gywes tsungh so tsungh dyei.

¹¹Hauh thang lhyi maukhung khomh phank hanh toh zis ngos nyvng, houmha nyang thyoeu dvdoeu nyeis las houmha ji soeu ka, Wontang yahge Jyoeng ge soeu nghuot. Nyang gas dan khyvlyis soetuon zis yah jeszan.

¹²Nyah nyoqjeih gas nyilhyam teh tsain bvng joq, nyah uhloms mas buismuk nyoshoq tsungh toh. Nyang masyah lai las gohyuk hank eq ma bos seq dyei dah nyings nyah thoq mas lhaih tap toh.

¹³Nyang suih mas jen dah dyimis wuot toh. Nyah nyings gas Mangso Dang ge zis nghuot.

¹⁴Maukhung mha jesphung jens eq, nyang thyoeu ji las tsingh-kan dah jeimuh dyi thyoeu wuot zis yah nyah thang mha tsain chank loh.

¹⁵Dius nyau jens lyis ung tyamp das xiklyis nyah nhuot masyah zuk dah moengsa thuq nyeis. Nyang gas nyamoq lyis thyeq lhamloq yah guon das, Maukhung Jesphung Mangso dah nhaiqlom dyis ge dah zvbiq nyhet zwvng mas nyang nang las nyhet das.

¹⁶Nyah dyi yahge tanghbauh mas hwankti jens dah Hwankti, yhensain jens dah Yhensain ge lhaih tap toh.

¹⁷Hauh thang lhyi loeuswons dvyuk buis thoq mas yap joq zis ngos nyvng. Nyang gas maudang nghoq jens lyis, Mangso dah zo shuk pwe zainsmuh mas los zop geh.

¹⁸Los geh, hwankti jens dah shoh, jeszau, jeslo jens dah shoh, nyang jens dah shoh, nyang ji bang dah shoh, luiq bang yahge jons jens ngislo kuhlo dah shoh lyis namoq xauh zo das, ge thwe zainsmuh yah kaiq.

¹⁹Hauh thang lhyi hauh yewus eq, nyeisjvng mas dah hwankti jens yah nyamoq dah jesphung jens eq, hauh nyang ji soeu yahge nyah jesphung lhyi zan das xiklyis tsain huom toh zis ngos nyvng.

²⁰Hauh yewus yah dvgeh nyah xikkhonh mas vlho kuot xoeuq dah lvpe hwah gas nyhik yoeus zis xauh goeus. Nyang gas hau vlho chixoeuq zis yah yewus dah loqsoh dap bang yahge yewus dah gungslho lhyi paiq bang lyis mhuih jyomh soeu nghuot. Hauh yewus yahge lvpe hwah gas hwank ngeh nyeis dah nyithomh mas vdwis khyoq kat zis tsain xauh.

²¹Nyamoq dah jesphung jens gas nyang ji soeu dah nhuot masyah thuq dah moengsa yah sat zis xauh las nyamoq dah shoh lyis, nghoq dvnganh gas nyamoq yoh zo nyhoq jo shoq tsain zo.