Read Achang NYOQNYVNG 20 Bible Online

NYOQNYVNG 20 - Achang bible

NYOQNYVNG 20

¹Hauh thang lhyi loeuswons soeu dvyuk gas dwangchuk buiq dah suhshih yahge svsoh lyei shamjvng twih dvkvt lyis nyah loq mas chi lha, maukhung mhayah gyoh los zis ngos nyvng.

²Nyang gas hauh yius Satan nghuot, gohlhain dah lhangnyis ge mvnjung lyis nyhik yoeus las dvkhyoengh zvn jweh shoq lhunk toh das xiklyis twih toh.

³Hau loeuswons soeu ka mvnjung lyis dwangchuk buiq mas khyoq kat toh las, hauh joqyos lyis nyheih lho lha zvnlom dvkhyoengh dyingh shoq dius nyau jens lyis ma yoh mhuih jyomh bas jungh, kyihau thungh tap toh. Zvnlom dvkhyoengh dyingh lyis nyang lyis dvsoq phui kat das.

⁴Hauh thang lhyi hwankti tank jens lyis ngos nyvng. Hauh hwankti tank jens mas tsung toh bang gas, soetuon das toeuh dyei toh zis tsain xauh bang nghuot. Hauh thoq lyis Yhensain Yesu chixoeuq dah dan cho lhyi eq, Mangso dah dang lyis kanghjyoeng kat las sat zis xauh bang yah, hauh yewus lyis eq, nyah gungslho lyis eq, ma paiq, vsainnyang dah ngelang yahge loq jens mas hau Yewus dah loqsoh ma kham yoeus bang dah dyos lyis ngos nyvng. Nyamoq gas kang doms dwis los las hwankti jens teh Yhensain Yesu yah dvgeh zvnlom dvkhyoengh dyingh shoq tsain guon nyeis das.

⁵(Nyet joq shih dah shei bang gas, hauh dvkhyoengh zvn ma thank shih gyo lyis ma yoh dwis toq los,) heika cangxeih vlhain dwis toq cho nghuot.

⁶Housoeh shei masyah cangxeih dwis toq los bang dah caiq mas xauh wvng bang gas ngelhoq las nyoshoq dah shvmanh jyehjuh tsain xauh kham yoeus. Aiq vlhain shei cho ka nyamoq thoq mas yomsoq ma bos. Nyamoq gas Mangso yahge Khristu dah phudyei bang nghuot das las zvnlom dvkhyoengh dyingh shoq Khristu yah dvgeh xauh guon nyeis das.

⁷Hauh zvnlom dvkhyoengh lai lyis Satan ka thung mhayah phank kat zis xauh das las,

⁸nyeisjvng gonh dyos nyeis dah Gog yahge Magog ge dah dius nyau jens lyis mhuih jyomh das xiklyis thuq los das. Satan ka moeng zan das xiklyis nvmukdra mas dah sihsho nyhoq nyo dah nyah dius jens lyis khi huom toh das.

⁹Nyamoq gas nyeisjvng goms shoq nyenh loh las Mangso dah dius jens thoenggus yahge yhensain jyetdap dah wus lyis tsain lhaink toh. Nghuot laus eq maukhung masyah nyi gyoh los las nyamoq lyis ngeh jom tyamp.

¹⁰Hauh thang lhyi, nyamoq lyis mhuih jyomh dah Yius eq nyi yahge hwank dap nyeis dah thomh mas khyoq kat zis xauh: houmha hauh yewus yahge lvpe hwah eq xiklyis yah tsain bos las nyamoq gas nyeih nyenh vcaiq vto shoeuhshih zis xauh das.

¹¹Hauh thang lhyi kuhxing dah hwankti tank thyoeu eq, houmha tsung toh soeu lhyi eq ngos nyvng. Hauh Yhensain xikkhonh mas dah maukhung yahge nyeisjvng gas dyuk loh las hauh aiq ja gonh lyis ma nyvng lo.

¹²Hwankti tank xikkhonh mas shei bang ngislo kuhlo tsain yap joq zis ngos nyvng. Sauhbuk jens tsain phank toh, kangbuk ge gohtoeu sauhbuk eq dvkoeuq phank toh. Shei loh goeus bang gas nyamoq kuot khoq cho sauhbuk mas comh toh zis yah dvyhangteh nyamoq soetuon zis tsain xauh.

¹³Hauh thang lhyi nvmukdra gas nyang mas tsain bos dah shei goeus bang lyis doms kyauh. Shei cho yahge shei mau eq, nyamoq mas bos dah shei bang lyis doms kyauh las dvnganh gas vsainnyang kuot lai los goeus dah wotwu yah dvyhangteh soetuon zis tsain xauh.

¹⁴Hauh uhlyis shei zis yahge shei mau gas munyi thomh mas khyoq kat zis tsain xauh. Hauh munyi thomh gas aiq vlhain shei cho nghuot.

¹⁵Kang maussauh mas nyings ma bos soeu hank laus eq hauh munyi thomh mas khyoq kat zis tsain xauh.