Read Achang NYOQNYVNG 3 Bible Online

NYOQNYVNG 3 - Achang bible

NYOQNYVNG 3

¹Sardi phung mha dah loeuswons soeu lhyi heisoeh lhaih kat aq. Haih zis gas Mangso dah Dyos nyhet koeuq yahge kyi nyhet lom chi toh soeu dah dang nghuot. Nvng kuot dah muhzoh ngos seq. Nvng gas kang dwis nyeis ge hoeuh laus eq vshei dvnghuot.

²Housoeh las phuk soh lhaiq mus aq. Nvng mas nyet joq shih las shei loh nyeis bang lyis thukxank aq. Khasoeh ge lyis nvng kuot dah muhzoh ngah Mangso xikkhonh mas ma dyinghjet shih zis ngos nyvng dyei.

³Housoeh yvmvyah nvng cha xauh xuq zis yahge xauhgyo zis doms soh aq. Hauh yvlyis domsyos gyo las nah yaunos masyah nhaiqlom thaiq las lhain los aq. Nvng phuk soh lhaiq ma mus lyis gas, ngos khauh soeu teh jweh lyih das. Ngos nah jyank mas khanhamp jweh lyih das zis eq nvng ma seq das.

⁴Nghuot laus eq vsainnyang dyimis lyis vwot v-oeu ma mus nhang bang Sardi phung mha dvyhamh nyet joq shih. Nyamoq gas mon yih yvmvyah dyi thyoeu wuot las ngos yah dvgeh suh e das.

⁵Ung cho yoh bang gas heisoeh teh dyimis thyoeu xauh wuot das. Ngos nyamoq dah nyings lyis kang maussauh buk masyah thyuk tyamp das zis ma nghuot. Ngah Uwus xikkhonh mas eq, nyah loeuswons bang xikkhonh mas eq nyamoq gas ngos yah sen bang nghuot oen kyoq kyoq taiq hoeuh das.

⁶Dyos gas phung jens lyis khasoeh taiq zis gas no dap soeu ka xauhgyo bas jungh, ge.

⁷Tsai, Philadephia wus phung mha dah loeuswons soeu lhyi heisoeh lhaih kat aq. Haih zis gas gyingshang soeu, jyoeng soeu, Dawi dah suhshih chi soeu, hank ma yoh nyheih shoq phank toh las hank ma yoh phank shoq nyheih toh soeu dah dang nghuot.

⁸Nvng kuot nyeis dah muhzoh lyis ngos seq. Nvng yom dvtsiq dvbos laus eq, Ngah jyauh dang lyis nvng chank las ngah thoq mas wontang zis ngos seq. Nah xikkhonh mas hank eq ma yoh nyheih dah khomh dvkoeuq ngos phank hanh toh dyei goeus.

⁹Yoeuh aq, vsainnyang Yuda dius nghuot ge laus eq ma jings, Satan phung mha bos dah hauh hwah bang lyis ngos, nyamoq lyis nah khyeiyang mas los tsain paiq nhang das las, ngos nvng lyis jyetdap nyeis zis gas nyamoq seq das.

¹⁰Nvng gas ngos tying toh zis yah dvyhangteh ehnyet xing zis yah jhen das cho chank nyeis yvmvyah, nyeisjvng dius dvnganh yvlyis shiwu das xiklyis, nyeisjvng goms shoq shanghsenh zis jweh lyis ngos nvng lyis gomh das.

¹¹Ngos lvnyap jweh lyih das, nah dah ung buismuk lyis hank eq ma yoh lhuot yoeus bas jungh! Nvng yoh nyhoq lyis zungh nyeis aq.

¹²Yoh ung soeu lhyi ngah Mangso dah zoppaiq yhenmuh mas khungzains dvzains ngos bweh nhang das. Nyang hou mhayah khanhamp eq nghe pheh thuq das zis ma nghuot. Ngah Mangso dah nyings lyis eq, ngah Mangso jyank masyah thuq las, maukhung masyah gyoh los dah Yerusalem wus saiq ge, ngah Mangso dah wus nyings lyis eq, ngvnyang dah nyings saiq lyis eq, hauh soeu thoq mas ngos lhaih tap dyei das.

¹³Dyos gas phung jens lyis khasoeh taiq zis gas no dap soeu ka xauhgyo bas jungh.

¹⁴Ladoki wus phung mas dah loeuswons soeu lyis heisoeh lhaih kat aq. Haih zis gas wontang zis yahge jyoeng dah kanghjyoeng phoq, Mangso gvn ya gvnkhanh toh dah vpom, Amen! ge soeu dah dang nghuot.

¹⁵Nvng cha kuot goeus zis ngos seq. Nvng gas jyamh eq ma nghuot gywes eq ma nghuot. Nvng jyamh ya jyamh, gywes ya gywes dvkoeuq koeuq bweh das zis ngos o.

¹⁶Nghuot laus eq gvshih nvng gas gywes eq ma nghuot jyamh eq ma nghuot, loms loms mus joq yvmvyah ngah nhuot masyah dyeh tyamp das.

¹⁷Nvng gas, Ngos gas dis, ngos mas zisyos nyoshoq joq, ngos mas chah cho dvnganh yoh goeus ge taiq. Nghuot laus eq nvng gas kha iq shanghsenh las nhaiqnyen phoh zis nghuot joq yvlyis nvng ma seq nyvng! Nvng gas shohjyen, nyoqjet las shohchen mus nyeis.

¹⁸Housoeh las nvng dis bas jungh, nyi mas kyink tyamp goeus dah xing lhyi eq, svbih xikkhonh mas nah shohchen vxoq vcaiq ma mus bas jungh. Nghop dyei das xiklyis nvng wuot dah dyimis thyoeu jens eq, nah nyoq nyvng das xiklyis juot ja mvcheih eq, ngah jyank mas wis yoeus das zis ngos nvng lyis joeu i da dyei.

¹⁹Ngos gas ngos jyetdap bang dvnganh lyis nyho, jyauh zis yah joeng. Housoeh las nvng jyoengh gying soh zis yah nhaiqlom thaiq aq.

²⁰Yoeuh aq, ngos gas khomh koq yap joq, ngah thwe gyo las khomh phank dyei soeu hank jyank mas laus eq, ngos wvng las nyang yah dvgeh zoshuk das. Nyang eq ngos yah dvgeh xauh zo shuk das.

²¹Ngos gas ung cho yoh las ngah uwus dah tank mas nyang yah dvgeh yoh tsung teh, ung cho yoh soeu lyis ngah uwus dah tank mas ngos yah dvgeh xauh tsung das toeuh ngos dyei das.

²²Dyos gas phung jens lyis khasoeh taiq zis gas no dap soeu ka xauhgyo bas jungh, ge.