Read Achang NYOQNYVNG 6 Bible Online

NYOQNYVNG 6 - Achang bible

NYOQNYVNG 6

¹Hauh thang lhyi Yvnglo gas kyihau nyhet koeuq masyah dvkoeuq phank kat yvlyis ngos nyvng las yewus nyei ja masyah dvdoeu gas maujau jau thwe teh zis yah, Los aq, ge taiq thwe ngos xauhgyo.

²Ngos yoeuh kat lyis nyang thyoeu dvdoeu lyis nyvng. Houmha ji soeu ka lyei dvkoeuq chi toh, buismuk eq dvkoeuq tsungh dyei las nyang gas ung cho yoh goeus soeu nghuot zis yah dvyhangteh, ung shih das xiklyis thuq los.

³Hauh thang lhyi Yvnglo gas kyihau aiq vkoeuq phank kat lyis, yewus aiq vdoeu gas, Los aq, ge taiq zis ngos xauhgyo.

⁴Hauh uhlyis gohtoeu nyang nes teh zis dvdoeu thuq los. Hauh nyang ji soeu lhyi haih nyeisjvng thoq mas jeszan cho bweh nhang lha dius nyang changh sat goh nhang das toeuh dyei toh. Nyang lyis moengsa zainsmuh eq huon dyei.

⁵Tsai Yvnglo gas kyihau somh vkoeuq lyis phank kat lyis, yewus somh vdoeu gas, Los aq, ge zis ngos xauhgyo. Hauh uhlyis ngos yoeuh kat lyis nyang noq dvdoeu nyeis. Houmha ji soeu ka nyah loq mas jvng dvkoeuq chi toh.

⁶Hauh yewus nyei ja dah vjo masyah nyings thuq los teh dah thwe dvkoeuq ngos xauhgyo. Hauh thwe ka, Sunghso dvpan lyis dvnyeih dah uhkung phauh khyvlyis shangh chah. Laiq somh pan lyis dvnyeih dah uhkung phauh khyvlyis shangh chah. Nghuot laus eq hauh tsanlun zains jens yahge zvbiq khyam jens lyis vlhoeu thyoq tyamp goh, ge taiq.

⁷Hauh thang lyis Yvnglo gas kyihau nyei vkoeuq lyis phank kat lyis yewus nyei vdoeu gas, Los aq, ge taiq zis ngos xauhgyo.

⁸Tsai, ngos yoeuh kat lyis nyang nhamh dvdoeu lyis nyvng. Houmha ji soeu dah nyings gas Shei zau nghuot. Nyah thang mha munyi thomh eq tanh tanh chank yenh, nyamoq gas nyeisjvng dah nyei boms dvboms mas nyeis dah dius jens lyis moeng zan, phanghkhauq zainsmuh, yomh yahge yewus shoeuhshih zis yah sat das toeuh tsain yoh.

⁹Tsai Yvnglo gas kyihau oeng vkoeuq phank lyis, Mangso dah dang taiq kyoh gvng mas eq, wontang zis yah kanghjyoeng kat gvng mas eq, sat zis xauh bang dah dyos lyis eq, hauh phon o mha ngos nyvng.

¹⁰Hauh dyos jens gas, yomsoq zainsmuh yahge gyingshang lha dan dah Yhensain eh, ngamoq lyis sat dah yobos gvng mas nyeisjvng mas nyeis dah dius jens lyis ma shoeuhshih, soe ma tuon tuon nvng khanhamp jweh shoq nyeis dah lah, ge thwe zainsmuh yah tsain kaiq.

¹¹Nyamoq yuk khanghmuh lyis dyi thyoeu gvm huot las, nyamoq teh sat zis xauh das jyeidwis changh jens yahge vmang vnoeuh moq dah nyings yoh changjet shoq, dvsoq langh nyeis shih das xiklyis nyamoq lyis tying toh.

¹²Tsai, Yvnglo gas kyihau khyuk vkoeuq phank kat zis ngos nyvng. Hauh uhlyis maunyeis svsoh dwis las buis eq thoeubaplap dah yanghthung misseh noq teh noq tyamp las lhamhmuh lom gonh eq suih teh nes tyamp.

¹³Lvhomp zains lyis uklyeis yah thungh lyis shih-kyei gywis tyamp teh maukhung mas dah kyi ka nyeisjvng mas tsain gywis gyoh tyamp.

¹⁴Maukhung ka lom tyamp dah sauhdain teh dyuk tyamp las boms yahge goeujo dvnganh eq vsainnyang joqyos masyah xwih tyamp zis tsain xauh.

¹⁵Hauh uhlyis nyeisjvng mas dah hwankti jens, zau guon bang, jeszau jens, dis bang, yombos bang, dius yuk khanghmuh, jons jens yahge luiq bang, dvnganh gas lukkhyung jens yahge boms mas dah luk-uk jens mas tsain phang tamh.

¹⁶Nyamoq gas boms yahge lukkhyung jens lyis lui las, Ngamoq thoq mas gyoh nhiq dyei aq. Hwankti tank mas tsung toh soeu dah nyoqnho yahge Yvnglo dah nhaiqlom dyis masyah ngamoq lyis gos dyei aq.

¹⁷Nyah aiq yuk dah gyukphoh nhaiqlom dyis buisnyeis zainsmuh heimha jweh goeus las hauh zis lyis hank yoh thoenk yap das lah, ge.