Read Achang NYOQNYVNG 7 Bible Online

NYOQNYVNG 7 - Achang bible

NYOQNYVNG 7

¹Hauh thang lhyi loeuswons bang nyei yuk gas nyeisjvng nyei thunk mas yap joq las, nyeisjvng thoq mas eq, nvmukdra thoq mas eq, saiqzains thoq mas eq, lyeis ma yoh muot gyon bas jungh ge, nyeisjvng nyei thunk mas dah lyeis lyis tsain tsop zains toh yvlyis ngos nyvng.

²Tsai, dwis nyeis Mangso dah kyihau chi toh dah loeuswons soeu dvyuk buisthuq shot pheh yah thuq los zis ngos nyvng. Nyang gas nyeisjvng yahge nvmukdra lyis lhoeu thyoq das toeuh yoh dah loeuswons soeu nyei yuk lyis thwe zainsmuh yah kaiq taiq.

³Hauh loeuswons soeu ka, Ngamoq Mangso jyeidwis jens dah ngelang mas kyihau ma tap dvchank gas, nyeisjvng lyis eq, nvmukdra lyis eq, saiqzains lyis eq, vshoeuhshih shih goh, ge.

⁴Ngelang mas Mangso dah kyihau tap toh goeus bang 144,000 nghuot cho ngos lyis taiq kyoh goeus. Hauh bang gas Israel dah lo jens dvci aiq koq masyah,

⁵Yuda vkoq mas dvmons aiq khyoengh, Ruben vkoq mas dvmons aiq khyoengh, Gad vkoq mas dvmons aiq khyoengh,

⁶Asher vkoq mas dvmons aiq khyoengh, Napthali vkoq mas dvmons aiq khyoengh, Manase vkoq mas dvmons aiq khyoengh,

⁷Simon vkoq mas dvmons aiq khyoengh, Lewi vkoq mas dvmons aiq khyoengh, Isakha vkoq mas dvmons aiq khyoengh,

⁸Zebulun vkoq mas dvmons aiq khyoengh, Yosep vkoq mas dvmons aiq khyoengh, Benyamin vkoq mas dvmons aiq khyoengh kyihau tap zis tsain kham yoeus goeus.

⁹Hauh thang lhyi ngos yoeuh kat lyis houmha hank eq ma yoh thoq suon lo shoq nyo dah moqmuh dvkoeuq lyis ngos nyvng. Nyamoq gas vnyau khanghmuh, vhuh khanghmuh, mau khanghmuh mas bang yahge nyingh vja ja kat bang masyah eq, lyih tsain jweh bang nghuot. Hauh bang gas dyi thyoeu tsain wuot las, nyamoq loq mas tsanlun saiq ko tsain chi lha, hauh hwankti tank xikkhonh mas eq, Yvnglo dah xikkhonh mas eq tsain yap joq.

¹⁰Nyamoq gas thwe zainsmuh yah khyuot yoeus cho ka hwankti tank mas tsung toh soeu yahge Yvnglo jyank masyah nghuot ge tsain kaiq.

¹¹Tsai, loeuswons bang dvnganh gas, hwankti tank, logis jens yahge yewus nyei doeu lyis tsain yap lhaink toh. Hauh uhlyis nyamoq gas hwankti tank khyeiyang mas gop las, Mangso lhyi dupaiq zis yah,

¹²Amen! chungh, phunk, joeui jyehjuh chungh, nyoqnho ngelang, yomsoq yahge yom gas vcaiq vto yah Mangso jyank mas joq bas jungh! Amen ge tsain taiq.

¹³Hauh uhlyis logis jens masyah dvyuk gas haih dyi thyoeu wuot bang gas hank tsain nghuot lah? Khapheh yah tsain thuq los bang nghuot lah, ge, ngos lyis nyei.

¹⁴Ngos gas, Yhensain eh, ngos ma seq, nvng gas seq oen, toeuh. Hauh uhlyis, nyang gas, nyamoq gyukphoh shanghsenh zainsmuh masyah tsain luiq thuq los bang nghuot. Nyamoq dah dyimis lyis, hauh Yvnglo dah suih mas tsain cheihshang goeus.

¹⁵Housoeh las nyamoq gas Mangso dah tank xikkhonh mas xauh nyeis zis yah nyah Yhenmuh mas nyang lyis nyeih nyenh tsain paiq nyeis. Hwankti tank mas tsung toh soeu eq, nyamoq yah dvgeh nyeis las nyamoq lyis gomh das.

¹⁶Nyamoq gas thang pheh khanhamp eq yuot shet zis ma xauh lo das. Buis eq, khateh dah ngeh cho eq, nyamoq lyis yoh ngeh nhang das zis ma nghuot.

¹⁷Khasoeh ge lyis hwankti tank vgungs mas nyeis dah Yvnglo gas nyamoq dah yvng yoeuh soeu bweh das. Kang jeisthuq dwang jweh shoq nyamoq lyis cho she das. Mangso eq nyamoq nyoq mas dah nyoqdyeis dvnganh buot tyamp dyei das, ge ngos lyis taiq.