Read Achang NYOQNYVNG 9 Bible Online

NYOQNYVNG 9 - Achang bible

NYOQNYVNG 9

¹Tsai, loeuswons oeng vyuk nyah lvbuh muot kat. Hauh uhlyis maukhung masyah nyeisjvng mas kyi dvlom dyet gyoh joq zis ngos nyvng, Hau kyi lhyi noq thank dwang chukbuiq dah suhshih dyei.

²Hauh kyi ka noq thank dah dwang chukbuiq lyis phank kat las nyikhauh gas nyikhyomp zainsmuh mas dah nyikhauh teh hauh dwang masyah nhoenk doq los zis yahge hauh dwang dah nyikhauh gvng mas buis yahge maulvt gas soeng soeng noq tyamp.

³Hauh nyikhauh masyah janghgyik jens thuq los las, nyeisjvng mas tsain gyoh. Nyamoq lyis gungsgauh jens yoh ja yomsoq dyei toh.

⁴Nyamoq gas nyeisjvng mas dah mhanh lyis eq, nyaus ya nyaus ja lyis eq, saiq jens lyis eq yoh zangh das zis ma nghuot ge vmingh dyei toh. Vsainnyang dah ngelang mas Mangso dah kyihau ma dap bang lyis kyingh yoh shoeuhshih das ge tying toh.

⁵Janghgyik jens gas hauh dius jens lyis lhamhmuh oeng khyvp shoeuhshih masyah lai las sat das toeuh ma yoh. Hauh shoeuhshih zis gas gungsgauh pat yhangteh nos.

⁶Hauh lhamhmuh oeng khyvp gyo lyis nyamoq shei cho tsain xo das, nghuot laus eq nyamoq hauh zis lyis nyvng das zis ma nghuot. Nyamoq tsain shei mes das, nghuot laus eq shei cho ka nyamoq jyank masyah phang loh das.

⁷Hauh janghgyik jens gas jeszan das xiklyis shauq toh dah nyang jens yah doeusgoh. Nyamoq dah uhloms mas xing buismuk teh zis tsain tsungh. Nyamoq dah nyoqnho ka dius dah nyoqnho teh zis tsain nghuot.

⁸Nyamoq dah cam gas nyelo jens dah cam teh nghuot. Nyamoq dah zwis gas khangkhyi jens dah zwis teh nghuot.

⁹Nyamoq dah sainhkhonh lyis thyeq sainhkhonh nghop teh zis yah tsain nghop toh. Nyamoq dah dungs phap thwe ka, jes dyvm zan dah nyang lhyingh nyoshoq nyings huomh toh dah thwe yah doeus joq.

¹⁰Nyamoq mas gungsgauh dah lhyank yahge nyen teh zis yuk las nyamoq lhyank yah dius jens lyis lhamhmuh oeng khyvp shoeuhshih das toeuh tsain yoh.

¹¹nyamoq gas nyamoq thoq mas guon dah hwankti dvyuk yoh. Hauh hwankti ka dwangchukbuiq lyis guon dah loeuswons soeu nghuot. Nyah nyings lyis Hebre pheh yah Abadon, Greek pheh yah gas Apolion (lhoeu thyoq soeu) ge zis nghuot.

¹²Xiklyis dah mvtanhzoe gas lai loh goeus. Hauh thang lyis mvtanhzoe aiq ja jweh los shih das.

¹³Hauh thang lhyi loeuswons khyuk vyuk nyah lvbuh muot kat. Hauh uhlyis Mangso xikkhonh mas joq xing phon vthunk nyei thunk masyah thwe dvkoeuq thuq los zis ngos xauhgyo.

¹⁴Hauh thwe ka loeuswons soeu khyuk vyuk lyis, Uphrat lvng yvm mas lhunk toh dah loeuswons bang nyei yuk lyis phui kat aq, ge.

¹⁵Housoeh las hauh loeuswons nyei yuk gas lhunk toh masyah phui kat zis tsain xauh. Nyamoq gas cangsoeu dius somh boms dvboms lyis sat das ge hauh shishenh, hauh buisnyeis, hauh lhamhmuh, hauh zvn xiklyis sont toh zis xauh bang tsain nghuot.

¹⁶Nyang ji dah jesphung jens aiq xo wvn nghuot cho ngos lyis taiq kyoh goeus.

¹⁷Tsai, ngah nyoqnyvng mas nyang jens yahge houmha ji bang lyis ngos nyvng. Nyamoq gas nyi teh nes, Nila vlanh teh lanh, hwank teh buh dah sainhkhonh nghop lyis tsain nghop toh. Nyang jens dah uhloms gas khangkhyi jens dah uhloms yah doeus las nyamoq dah lhyo masyah nyi jyenh, nyi khauh yahge hwank thuq nyeis.

¹⁸Hauh nyang jens dah nhuot masyah thuq nyijyenh, nyikhauh, yahge hwank ge dah shanghsenh cho somh koeuq gvng mas, cangsoeu dius somh boms dvboms sat zis tsain xauh.

¹⁹Khasoeh ge lyis hauh nyang jens dah yom gas nyamoq dah nhuot yahge lhyank mas tsain bos. Nyamoq dah lhyank jens gas uhloms dap lhangnyis teh doeus las, hauh zis yah dius jens lyis tsain chweh.

²⁰Hai shanghsenh cho mhayah yoh luiq las nyet joq shih dah cangsoeu dius jens gas, nyamoq kuot dah muhzoh masyah ehnyet ma yoh tsain thaiq, nyamoq gas yius jens lyis eq, nyoq ma nyvng no ma gyo, ma seq suh dah, ngwis, xing, thunk, luk yahge saiq silho jens lyis paiq cho eq ma tsain tomp tyamp.

²¹Dius sat muh, hweq muh, yauxi muh, khauh muh masyah nyamoq nhaiqlom ma yoh tsain thaiq.