Read Achang RUTHA 1 Bible Online

RUTHA 1 - Achang bible

RUTHA 1

¹Israel mau mas soetuon bang guon yoq lyis, hauh mau mas phanghkhauq changh gyoh. Yuda mau Betlehem mas dah vbusbih dvyuk gas hauh phanghkhauq changh gvng mas Moab mau mas phanghkhauq ku das ge, loh. Nyang gas nyah yhensain nyhiq yahge nyah loloeu tang lyis eq shwih loh.

²Nyah nyings gas Elimelek ge, nyah yhensain nyhiq nyings gas Naomi nghuot. Nyah aiq yuk dah loloeu tang nyings gas Malon yahge Kilion nghuot. Nyah mebih gas Yuda mau Betlehem wuxom Ephrat wus dius nghuot. Nyamoq Moab mas nyeis uhlyis,

³Elimelek gas Naomi yahge nyah lotang lyis shei chauh toh khoq.

⁴Lotang ka Moab lonyi tsain yoeus. Hauh Moab lonyi tang nyings gas Orpa yahge Rutha nghuot. Nyah mebih Moab mau mas 10 zvn nyeis nyangh thang lhyi,

⁵Malon yahge Kilion eq shei loh. Housoeh Naomi lyis nyah lotang eq, nyah yhensain phoq eq shei chauh toh khoq.

⁶Ma nyangh lyis Mangso ka Nyah dius jens lyis jyo gis dah shvmanh doms dyei goeus ge cho lhyi Moab mau mas Naomi xauhgyo las nyah doeusmuh tang eq cheq Yuda mau pheh tauh loh das zis cicont kuot.

⁷Housoeh Naomi yah nyah doeusmuh tang ka nyah mebih nyeis mhayah toq las Yuda mau pheh loh cho mha suh loh nyeis.

⁸Housoeh loh nyeis lyis cholvt mas Naomi gas nyah doeusmuh tang lhyi, Nah zomh dah ungwes uwus yhen pheh tauh loh geh. Nah nhaiqtang ka shei goeus phoqtang yahge ngos lyis nhaiqbos gvng mas Mangso ka nah nhaiqtang lhyi nhaiqnyen shohgyo bas jungh.

⁹Nah zomh lyis Mangso nyenhnywe dah yhen khau yoh nhang bas jungh, ge. Housoeh Naomi gas nyah doeusmuh tang lhyi bvlot tanh las tauh loh nhang lhyi doeusmuh tang ngaus

¹⁰las taiq, Ngah zomh nvng yah dvgeh nah dius nyau nyeis mau pheh dvchank los das, ge.

¹¹Nghuot laus eq Naomi doms taiq zis gas, Ngah lotang yhen pheh tauh loh geh, Ngah thang vchank goh. Ngah ung mha nah zomh xiklyis yhensain phoq ma bos lo.

¹²Loh geh lotang, loh geh. Ungwes yhen pheh tauh loh geh. Ngos svsoh mang goeus, yhensain phoq yah nyeis das nyenhkyi ma nghuot lo. Ngos yhensain phoq gis yoeus shih nyenhkyi nghuot las khvnyens nyang vnoeuh dap las khoeu los lyis nah zomh yoh langh das lah?

¹³Nah zomh ngah lo lyis nyihwank das xiklyis hou iq nhangh shohjyen xauh das zis ma gis, loh geh, tauh loh geh. Ngah nhaiqngis nyoqyaus cho ka nah zomh thoq lyis nyo. Khasoeh ge lyis Mangso dah loq gas ngos lyis joeng goeus, ge.

¹⁴Nyah zomh doms ngaus. Orpa yuk gas nyah nyimuh lyis bvlot tanh las tauh loh. Nghuot laus eq Rutha gas Naomi yah ma gang.

¹⁵Yoeuh aq, Nah vbi nyah dius nyau, nyah mangso jyank tauh loh goeus. Nvng eq tauh loh gis, ge Naomi Rutha lyis taiq.

¹⁶Nghuot laus eq Rutha gas, Nvng lyis toh khoq las tauh das cho ngos lyis vsang. Nvng khapheh loh lyis ngos loh das. Nvng kha mha nyeis lyis ngos nyeis das. Nah dius nyau gas ngah dius nyau, nah Mangso ka ngah Mangso nghuot.

¹⁷Nvng shei yvmas ngos shei lha nyhop das. Shei gang mas lai las ngos nvng yah gang lyis Mangso ngos lyis gvgis joeng bas jungh.

¹⁸Housoeh Rutha gas nyang yah dvgeh loh das zis goeng goeng nghamh thyet goeus cho nyvng lyis Naomi gas Rutha lyis tauh das cho ma jyonh lo.

¹⁹Housoeh nyah metang ka gyung tsoq suh loh goeus. Nyah metang Betlehem mas jweh wvng loh lyis dvwus gonh yah nonh loh. Vmesbih jens gas, Naomi vnghuot lah, ge nyei.

²⁰Naomi gas, Ngos lyis Naomi v-oen goh, Mara oen dvlui lo geh.[1] Khasoeh ge lyis Yomzains YHENSAIN ka ngos lyis nhaiqngis nhaiqkuk nhang goeus.

²¹Ngos gas dyinghjet zis yah thuq loh. Nghuot laus eq YHENSAIN Mangso ka ngos lyis yhen pheh vkom doms shwih los. YHENSAIN Mangso ka ngos lyis shohjyen nhang goeus, Yomzains YHENSAIN ka ngos lyis shanghsenh nyungdaus nhang goeus, ge.

²²Naomi gas Moab mau masyah nyah doeusmuh Moab lonyi Rutha yah dvgeh Betlehem mas tauh los. Nyah metang Betlehem mas jweh los shishenh gas bali[2] vsaiq yet loh yoq nghuot.