Read Achang RUTHA 3 Bible Online

RUTHA 3 - Achang bible

RUTHA 3

¹Dvnyeih Naomi gas nyah doeusmuh Rutha lyis, Ngos nah xiklyis vtheh vpom goeng das xiklyis yhen xo dyei das.

²Boaz gas yah boek sain nghuot. Nvng nyah uhkung nyhiq jens thang mha jyo gyoh eq kui ku goeus. Khvnyens nyang thanjang mas bali nang das zis nghuot.

³Ngah doeusmuh ngos taiq dang gyo aq. Nvng gungs cheih, nvm pyo xangh coeu juot, nah gis thank dyi mis thaiq wuot las thanjang pheh e loh aq. Nghuot laus eq Boaz nyenhcon ma dye zo dvchank nah gungs vnyvng xoeuq.

⁴Nyang khamha yhet zis yoeuh toh aq. Nyang yhet muih thang lhyi nyah khyei thang mha tsoek loh las khyei mha mis toeu las gop yhet aq. Nvng cha kuot das zis nyang taiq los das.

⁵Rutha eq, Gis goeus ungwes nvng taiq khyvlyis ngos chank kuot das, ge.

⁶Housoeh Rutha thanjang pheh e loh. Nyang gas nyah nyimuh taiq zis yah dvyhangteh dvnganh chank kuot.

⁷Boaz gas nyenhcon dye zo shuk thang lyis ehnyet gying zis yah bali boms nvm mas loh yhet. Boaz yhet muih thang lhyi Rutha gas tsoek yah Boaz dah khyei mha mis loh toeu lha gop yhet.

⁸Nyenh gungsgvm lyis Boaz dvnlos dvn-nyet soh los las gungs phanh kat. Hauh uhlyis nyah khyeiyang mas vmesbih dvyuk yhet joq zis nyvng las dvn.

⁹Boaz gas, Nvng hank nghuot lah, ge nyei kat. Hauh vmesbih gas, Ngos nah jyeidwis Rutha nghuot. Nvng gas ngos lyis yoeuh gomh das soeu nghuot las nah dyithang ngos lyis phomh dyei aq, ge toeuh.

¹⁰Hou uhlyis Boaz gas, Ngah lonyi nvng lyis Mangso shvmanh dyei bas jungh. Cangxeih lyis nvng nah nyimuh Naomi lyis nhaiqnyen thoq lyis gvshih ngos lyis nhaiqnyen zis gas zes kuh. Nvng gas dis dah loyvm, nghuot ya shohjyen dah loyvm lyis ma xo.

¹¹Gvshih ngah lonyi eh nvng vchiq. Nvng sang zis ngos dvnganh kuot das. Ngah wugungs dius dvnganh nvng nyhiq gis nghuot cho seq.

¹²Ngos gas nvng lyis yoeuh gomh das nah boek nghuot. Nghuot laus eq ngah thoq lyis zes ni dah nah boek sain nyeis shih.

¹³Khvnyens heimha yhet aq. Nvpyo nyang chauh mes shoeuh lyis gas gis goeus, nyang shoeuh bas jungh. Nyang ma mes shoeuh lyis gas, Mangso nyeis zis yah dvyhangteh ngos nvng lyis chauh shoeuh das. Nvpsangh jweh shoq nvng heimha yhet joq aq.

¹⁴Housoeh Rutha Boaz dah khyeiyang mas nvpsangh jweh shoq yhet. Dius changh ma seq yoeuh goh shih, nyoq thyvp thyvp nyvng los lyis Rutha yhet toq. Boaz eq, Thanjang mas vmesbih lyih zis hank ma seq bas jungh, ge taiq zo.

¹⁵Boaz gas Rutha lyis nah mis gangh lhywa kat aq, ge. Rutha nyah mis gangh lhywa kat lyis Boaz bali 6 pan [6] laiq kat dyei las toeu huon kat. Hauh thang lhyi Boaz wus pheh loh.

¹⁶Rutha yhen mha doms jweh los lyis nyah nyimuh Naomi gas, Khasoeh nghuot goeus lah, ge nyei. Rutha eq Boaz nyah xiklyis bos kuot dyei das cho dvnganh taiq kyoh.

¹⁷Rutha taiq shih zis gas, Nah nyimuh jyank gungs kom vtauh loh ge, Boaz sang lha haih bali 6 pan laiq kat dyei, ge.

¹⁸Housoeh ge lyis Naomi gas, Vlo eh, cha nghuot los das zis seq shoq langh nyeis aq. Haih buisnyeis gyo lyis Boaz gas nyang kuot chah muh ma dye dvchank no das zis ma nghuot, ge.