Read Achang 1 SAMUEL 1 Bible Online

1 SAMUEL 1 - Achang bible

1 SAMUEL 1

¹Ephraim boms mau, Rama wus mas Elkana ge dah Ephraim dius dvyuk nyeis. Nyah vphauh gas Elihu, vbah gas Yeroham nghuot las Zup vhuh mas Tohu yhenbang nghuot.

²Nyang yhensain nyhiq aiq yuk yoh: Dvyuk dah nyings gas Hana, gohtoeu dvyuk gas Penina nghuot. Penina gas lo bos. Hana gas lo ma bos.

³Haih vbusbih gas Maukhung Jesphung YHENSAIN lhyi paiq das, phudyei das ge, nyah wus Rama masyah Shilo wus mas zvn yau zvn doq loh. Houmha YHENSAIN dah phudyei soeu Eli dah lotang Hopni yahge Phineha ka YHENSAIN dah phudyei vzomh nghuot.

⁴Elkana phudyei dah shishenh khanghmuh lyis, nyang nyah yhensain nyhiq Penina lyis shoh gvmboms dvkoeuq dyei, nyah lo yuk khanghmuh lyis eq gvmboms dvkoeuq koeuq dyei.

⁵Elkana ka Hana lyis senhtyau gvmboms dyei: YHENSAIN ka Hana lyis lo ma bos nhang laus eq nyang Hana lyis svsoh jyet.

⁶YHENSAIN nyang lyis lo ma bos nhang yvmvyah nyang yah khyank goh changh Penina gas nyang lyis dius ngis khyoq las ehnyet nyo nhang.

⁷Zvn yau zvn loh zis yah dvyhangteh, nyamoq Mangso yhen mha loh uhlyis Penina gas Hana lyis ma thoq taiq lo shoq nhaiqngis nhang gvng mas nyang wom ma zo, ngaus las nyeis.

⁸Nyah yhensain phoq Elkana nyang lyis nyei, Hana eh, nvng chamus ngaus nyeis? Wom chamus ma zo? Chamus nhaiqkuk nyeis? Ngos nah xiklyis lo dvci yoh thoq lyis zes gis ma nghuot lhyeh, ge.

⁹Dvlhain ka, Shilo mas YHENSAIN dah yhen mas nyamoq dye zo shuk thang lhyi Hana toq loh. Nyah ehnyet mas nhaiq khoh las gvgis ngaus zis yah YHENSAIN lhyi shvmanh dung. Hauh uhlyis phudyei Eli gas khomh nvm, nyah tank mas tsung toh.

¹¹Maukhung Jesphung YHENSAIN lhyi Hana dvja nyhen toh zis gas, Nah jyeidwis dah yaukyenh zis lyis ma tohnyhik, yoeuh dyei, soh dyei las yukgis lo dyei lyis, ngos nyah cam lhyi ma thyet dyei[2], nyah dvcaiq gonh YHENSAIN dah jyeidwis duot das xiklyis kyauh das, ge.

¹²Housoeh svsoh lo nyangh shoq, nyang YHENSAIN xikkhonh mas shvmanh tsoq dung nyeis. Eli gas nyah nhuot lyis yoeuh toh.

¹³Nyah nhaiqlom masyah shvmanh dung las nhuotkuk dwis laus eq thwe ma thuq yvmvyah Eli gas nyang yet nyeis ge nghamh.

¹⁴Eli nyang lyis taiq zis gas, Nvng khanyhank jweh shoq yet das lah, yhei tuon aq, ge.

¹⁵Hana phuk taiq zis gas, Ma nghuot, yhensain eh, ngos gas nhaiqngis dah vmesbih nghuot, ngos zvbiq ma shuk, yhei eq ma shuk, YHENSAIN xikkhonh mas ngah yaukyenh cho huot kat nyeis zis dvnghuot.

¹⁶Nah jyeidwis lyis vmesbih lhung oen vtsuk. Nhaiqkuk cho, noskyingh cho bos las gvshih jweh shoq dvdung nyeis, ge.

¹⁷Eli phuk taiq zis gas, Nyenstap zis yah loh aq. Nvng nyang lyis dung zis yah dvyhangteh Israel dah Mangso ka nvng lyis dyei bas jungh.

¹⁸Nyang taiq zis gas, Nah jyeidwis nyih nah nyoqlvtjvng mas nyoqnho yoh bas jungh, ge. Housoeh las hauh vmesbih gas loh las wom zo, nhaiq ma kuk lo.

¹⁹Nyamoq nvp lyis noq yah toq las YHENSAIN xikkhonh mas paiq lho lha Rama wus, nyamoq yhen pheh tauh loh. Elkana gas nyah yhensain nyhiq Hana yah zomh. YHENSAIN Hana dah shvmanh dung dang lyis gyo dyei.

²⁰Hana gas ung mha loshang chi lha yukgis lo khoeu los. Hauh lo gas YHENSAIN jyank mas shvmanh dung las yoh yvmvyah nyang lyis Samuel[3] ge nyhink.

²¹Elkana yahge nyah yhenbang dvnganhmoq yah dvgeh, zvn yau zvn phudyei das zis yahge senhtyau nyhen toh zis tyink das xiklyis Shilo pheh loh das shishenh doms jweh los.

²²Hana gas ma doq loh shih. Nyang nyah yhensain phoq lyis taiq zis gas, Loshang nauh ma kangh shih lyis ngos ma doq loh shih. Nauh kangh lyis YHENSAIN xikkhonh mas dvcaiq gonh nyeis das xiklyis loh shwih kat uhjyangh dvdoq loh das, ge.

²³Elkana nyang lyis taiq zis gas, Nvng nghamh doeus khyvlyis kuot aq, nauh kangh shoq nyeis aq, YHENSAIN ka nah[4] dangthoengh lyis doengs nhang bas jungh, ge. Housoeh las Hana eq yhen mha nyeis las nyah lo lyis nauh kangh shoq nyah nauh gvmshuk.

²⁴Nauh kangh thang lhyi somh zvn bos noeulu dvdoeu [5] sunghso mons dvpungh[6] shohyeis thung mha zvbiq dvtyvp yah dvgeh loshang Samuel lhyi Shilo wus YHENSAIN yhen mha shwih doq jweh loh.

²⁵Nyamoq hauh noeu sat thang lhyi loshang lhyi Eli jyank shwih loh.

²⁶Hana ka Eli lyis taiq, Ngah yhensain eh, ngos lyis vcomh lo lah? Ngos gas nah xikkhonh mas yap las YHENSAIN lhyi shvmanh dung dah vmesbih nghuot.

²⁷Ngos haih loshang yoh das xiklyis dung. Ngos dung zis yah dvyhangteh YHENSAIN ngos lyis dyei.

²⁸Housoeh yvmvyah ngos nyang lyis YHENSAIN lhyi dyei. Nyang dwis nyeis dvchank YHENSAIN lhyi dyei goeus, ge. Hauh thang lhyi nyamoq houmha YHENSAIN lhyi tsain paiq.