Read Achang 1 SAMUEL 15 Bible Online

1 SAMUEL 15 - Achang bible

1 SAMUEL 15

¹Samuel Saulo lyis taiq zis gas, YHENSAIN ka nyah dius Israel thoq mas guon das xiklyis nvng lyis coeu juot dyei aq, ge YHENSAIN ngos lyis nhang goeus. Housoeh las gvshih YHENSAIN dah dang gyo aq.

²Yomzains YHENSAIN heisoeh ge: Israel jens Egutu masyah doq los yoq lyis Amalek jens khasoeh lhom thyoq yvlyis ngos soh.

³Housoeh las gvshih nvng Amalek lyis loh zan aq. Yu ehnyet vbos, nyamoq yoh zis shank shoq mhont aq, vbusbih, vmesbih, loshang, nauhnoeuh, yvng, gola-u, mauhlyihzoe dvnganh sat aq, ge.

⁴Saulo ka dius tsainh las Telaim mas suon lhyi, khyei cho jes aiq sens, Yuda vnyau mas zis dvmons nghuot.

⁵Saulo ka Amalek wus pheh loh las, langhkhau zvvs mas lhom nyeis.

⁶Saulo Ken jens lyis taiq zis gas, Ngos namoq lyis Amalek jens yah dvgeh ma bos mhont jus bas jungh, nyamoq masyah thuq las gohtoeu nyeis geh: khasoeh ge lyis Israel dius jens Egutu masyah doq los uhlyis namoq nhaiqnyen cho chixoeuq goeus, ge. Ken jens eq Amalek jens masyah dyung thuq loh.

⁷Saulo ka Amalek jens lyis Hawila masyah Egutu buisthuq mas dah Shur jweh shoq sat.

⁸Amalek hwankti Agag lyis vdwis xauh nyhik. Nyah dius jens lyis gas sham yah dvnganh shank shoq sat.

⁹Nghuot laus eq Saulo yahge nyah dius jens gas Agag eq, gis thank yvng, noeu, coeu dah yvnglo, gis dah vyhang lhyi chaeq ma mhont: ma yhung jus, ma gis zis dvnganh lyis gas shank shoq mhont.

¹⁰YHENSAIN dang Samuel jyank jweh los zis gas,

¹¹Ngos Saulo lyis hwankti toq zis auhuiq. Nyang ngah thang ma chank, ngos tyingtoh dang lyis ma kuot, ge. Hauh zis gas Samuel lyis nhaiqkuk nhang lha, nyang YHENSAIN lhyi dvnyens yah dung.

¹²Samuel nvp lyis noq yah toq las Saulo lyis zes das xiklyis loh lyis, Saulo ka Khamel wus jweh las nyah xiklyis lukcuk toh khoq lho lha doms tauh zis yah Giga wus pheh gyoh e goeus cho xauhgyo. Housoeh nyang eq Saulo nyeis yvmas chank loh.

¹³Samuel Saulo jyank mas jweh lyis Saulo nyang lyis taiq zis gas, YHENSAIN nvng lyis shvmanh dyei bas jungh: ngos YHENSAIN tyingtoh dang chank kuot goeus, ge.

¹⁴Samuel taiq zis gas, Housoeh lyis ngah no mas xauhgyo dah yvng nyings thwe, noeu ma thwe ka chah vjyuk gah, ge.

¹⁵Saulo taiq zis gas, Ngah dius jens Amalek dius jens jyank masyah chi los. Nyamoq YHENSAIN nah Mangso lhyi phudyei das xiklyis gis thank yvng, noeu lyis nyhet toh. Nyet goeu dvnganh[30] lyis gas shank shoq ngamoq mhont goeus, ge.

¹⁶Samuel Saulo lyis taiq zis gas, No shih aq, vmvn YHENSAIN ngos lyis taiq dah dang nvng lyis taiq kyoh bah ge lyis nyang gas, Taiq aq, ge.

¹⁷Samuel taiq zis gas, Nvng gas nvng nghamh teh ngis soeu nghuot laus eq, Israel jens dah uhjyung bweh las Israel dah hwankti joqyos mas YHENSAIN nvng lyis coeu juot dyei ma nghuot lhyeh?

¹⁸YHENSAIN nvng lyis we mas nhang lha taiq zis gas, Loh aq, yobos nyo dah Amalek jens lyis shank shoq mhont aq, nyamoq ma thank dvchank jeszan aq dvge.

¹⁹Housoeh lyis nvng YHENSAIN dah domsyos ma gyo, jeswus dah lvnyhvp yoeus las YHENSAIN nyoqlvtjvng mas ma gis zis kuot lhyeh, ge.

²⁰Saulo Samuel lyis taiq zis gas, Nghuot goeus, ngos YHENSAIN dah dang lyis domsyos gyo goeus. YHENSAIN kuot nhang zis loh kuot goeus. Amalek jens lyis shank shoq mhont goeus. Ngos Amalek hwankti Agag lyis shwih los.

²¹Nghuot laus eq dius jens gas Giga mas YHENSAIN, nah Mangso lhyi lomhxangh lainh mes las yvng eq noeu eq lvnyhvp kuot, shank shoq mhont chah mhayah gis thank vyhang yoeus los, ge.

²²Samuel taiq zis gas, YHENSAIN ka nyah dang lyis domsyos gyo yvmas nhaiqdoeus teh, ngheq dyei jyungshuk yahge lomhxangh lainh yvlyis nhaiqdoeus das lah? Yoeuh aq, domsyos gyo zis gas phudyei thoq lyis gis. Dang gyo zis gas yvnglus coeu thoq lyis gis.

²³Gomloeus toq zis gas yius noq yah zomh teh, nhaiqlom than zis gas, silho paiq bang teh yobos thoeu. Nvng gas YHENSAIN dah dang lyis ngoek yvmvyah, nyang eq nvng lyis hwankti mhayah yoeus tyamp las nvng lyis tyamp goeus, ge.

²⁴Saulo Samuel lyis taiq zis gas, Ngos cu goeus: ngos dius jens lyis gyuk las nyamoq dah dang gyo yvmvyah YHENSAIN dah tyingtoh dang lyis eq, nah dang lyis eq lyi lhyweq goeus.

²⁵Housoeh las gvshih ngah yobos lyis jhen dyei aq, ngos YHENSAIN lhyi yoh paiq bas jungh nvng ngos yah jenh loh goh oen, ngos nvng lyis dung, ge.

²⁶Samuel Saulo lyis taiq zis gas, Ngos nvng yah ma loh. Nvng YHENSAIN dah dang lyis ngoek yvmvyah YHENSAIN ka nvng lyis Israel hwankti kuot yvmas yah yoeus tyamp las peq goeus, ge.

²⁷Housoeh Samuel loh bah ge nungs phuk lyis, nyang nyah dyithang lhyi chank lang las hauh zis gas juiq loh.

²⁸Samuel nyang lyis taiq zis gas, YHENSAIN khvnyhik Israel munghdan nah jyank masyah langchuiq yoeus las nah thoq lyis gis, nah yhenkyoh dvyuk lyis dyei goeus.

²⁹Hauh thoq lyis Israel dah phunk gas ma dyoq, nhaiqlom eq ma thaiq: nhaiqlom thaiq das zis gas nyang cangsoeu ma nghuot, ge.

³⁰Saulo taiq zis gas, Ngos cu goeus: nghuot laus eq ngah dius dah logis jens xikkhonh mas eq, Israel jens dah xikkhonh mas eq ngos lyis phauh nyang cho chixoeuq shih aq. Ngos YHENSAIN, nah Mangso lhyi yoh paiq shoq ngos yah dvgeh loh goh, ge.

³¹Housoeh Samuel Saulo yah loh las Saulo ka YHENSAIN lhyi paiq.

³²Hauh thang lhyi Samuel taiq zis gas, Amalek hwankti Agag lyis ngah jyank mas shwih los aq, ge. Agag gas, Shei cho ka jyoengh lai loh goeus ge nghamh zo las nyah jyank mas pyo pyo los[31]

³³Samuel gas, Nah sham yah ungwes nyoshoq moq lyis lo ma bos lo shoq kuot teh, gvshih nah ungwes eq lo ma bos soeu nghuot das, ge zoh lyis Giga phon xikkhonh mas Agag lyis vdoeus doeus jap tyamp.

³⁴Hauh thang lhyi Samuel gas Rama pheh loh, Saulo eq Gibea wus, nyah yhen pheh loh.

³⁵Samuel gas shei buisnyeis jweh shoq hwankti Saulo jyank ma loh lo. Nghuot laus eq Samuel gas Saulo xiklyis nhaiqkuk. YHENSAIN ka Saulo lyis Israel jens dah hwankti kuot nhang goeus cho lhyi auhuiq.