Read Achang 1 SAMUEL 16 Bible Online

1 SAMUEL 16 - Achang bible

1 SAMUEL 16

¹YHENSAIN Samuel lyis taiq zis gas, Israel hwankti mhayah peq tyamp dah Saulo gvng mas nvng khanyhank jweh shoq kuk nyeis das lah? Nah thuk mas coeu tyink las loh aq. Ngos nvng lyis Betlehem dius Yese jyank mas nhang kat bah. Ngos nyah lo jens mas dvyuk lyis hwankti kuot das zis khyen toh, ge.

²Samuel taiq zis gas, Ngos khasoeh yoh loh das? Hauh cho Saulo xauhgyo lyis ngos lyis sat das, ge. YHENSAIN taiq zis gas, Nvng noeu dvpon she loh las, Ngos YHENSAIN lhyi phudyei das zis los, oen aq.

³Hau lomhxangh lainh yvmas Yese lyis khi aq: nvng cha kuot das zis ngos taiq das: Ngos nyings yoeus dah vyuk lyis hwankti khyvlyis coeu juot dyei aq, ge.

⁴Samuel gas YHENSAIN taiq zis kuot las Betlehem pheh loh: Nyang jweh loh gvng mas hauh wus mas dah logis jens nvn las taiq zis gas, Nvng nyenstap cho yah sen lha los lah, ge.

⁵Nyang taiq zis gas, Nyenstap cho yah dvgeh lomhxangh lainh das zis los. Namoq gungs lyis cheihshang lha ngos yah dvgeh lomhxangh pwe wvng goh, ge. Nyang Yese yahge nyah lo jens lyis eq cheihshang nhang lha hauh phudyei pwe mha khi.

⁶Nyamoq dye jweh lyis, Nyang Eliab lyis yoeuh las, jyoengh coeu juot kham das soeu ka nyah xikkhonh mas nghuot goeus, ge.

⁷Nghuot laus eq YHENSAIN Samuel lyis taiq zis gas, Nyah vwot, nyah gungskhyank lyis vyoeuh; ngos nyang lyis ma yoeus: khasoeh ge lyis YHENSAIN ka dius nyvng khyvlyis nyvng zis ma nghuot. Dius gas vwot lyis yoeuh, YHENSAIN ka nhaiqlom lyis dvyoeuh, ge.

⁸Yese gas Abinadab lyis lui las Samuel xikkhonh mas nhang kat. Samuel gas YHENSAIN haq yuk lyis eq ma yoeus, ge.

⁹Yese gas Shama lyis loh nhang. Nyang taiq zis gas, YHENSAIN haq yuk lyis eq ma khyen, ge.

¹⁰Housoeh, Yese gas lo jens nyhet yuk gonh lyis Samuel xikkhonh mas loh nhang. Nghuot laus eq Samuel gas, Haih bang lyis YHENSAIN ma khyen, ge.

¹¹Samuel Yese lyis taiq zis gas, Nah lo jens dvnganh heimha nyeis lhyeh, ge. Nyang gas, Lothank dvyuk bos shih, nyang yvng yoeuh nyeis, ge. Samuel gas Yese lyis, Nyang lyis khi nhang aq, nyang heimha ma jweh lyis yang pwe mha ma yoh wvng tsung, ge.

¹²Nyang nhang lha, Dawi lyis shwih jweh los. Nyang gas yungh, yanghzan dah loyvm lo nghuot. Nyah nyoqjeih kyi. YHENSAIN taiq zis gas, Haih soeu nghuot, toq las nyang lyis coeu juot dyei aq, ge.

¹³Samuel eq nyah coeu khyau toq yoeus las, nyah vmang moq dah vgungs mas nyang lyis coeu juot dyei. Hauh nyeih masyah YHENSAIN dah Dyos gas Dawi thoq mas jweh joq. Housoeh Samuel eq toq las Rama pheh loh.

¹⁴YHENSAIN dah Dyos gas Saulo masyah gang loh goeus las YHENSAIN jyank masyah ma gis dah dyos nyang lyis yau los dyei.

¹⁵Housoeh las Saulo dah jyeidwis jens nyang lyis taiq zis gas, Yoeuh aq, gvshih YHENSAIN jyank masyah ma gis dah dyos nvng lyis thauqkhyi nyeis.

¹⁶Nah xikkhonh mas nyeis dah jyeidwis jens ngamoq lyis toenk vlhomuh seq bat soeu xo das toeuh dyei aq. Hauh YHENSAIN jyank masyah ma gis dah dyos nah jyank mas jweh lyis, hauh soeu toenk bat las nvng lyis lhoq ngon das, ge.

¹⁷Saulo nyah jyeidwis jens lyis taiq zis gas, Toenk seq bat shvpyo soeu lhyi xo lha ngah jyank mas shwih los aq, ge.

¹⁸Jyeidwis dvyuk phuk taiq zis gas, Ngos Betlehem dius Yese dah loloeu dvyuk nyvng ku; nyang gas toenk seq bat shvpyo, womh las jeszan lyes, joeui bos, yungh eq yungh, dang taiq gis, Mangso nyang yah nyeis, ge.

¹⁹Housoeh las Saulo ka Yese jyank mas loeuskyoh bang nhang lha taiq kat zis gas, Yvng yoeuh soeu, nah lo Dawi ngah jyank mas nhang kat aq, ge.

²⁰Yese gas Saulo xiklyis mauhlyihzoe tu mha ohlhyoq, zvbiq dvthuk, beqlo dvdoeu nyah lo Dawi lyis yah huon.

²¹Dawi Saulo jyank jweh las nyah xikkhonh mas yap joq. Saulo ka nyang lyis svsoh jyet las nyah sham lham wuq das soeu khyvlyis khyen yoeus.

²²Saulo ka Yese jyank mas dius nhang lha taiq kat zis gas, Ngos Dawi lyis o goeus las, nyang lyis ngah jyank mas jenh nyeis nhang aq, ge.

²³Housoeh las YHENSAIN jyank masyah ma gis dah dyos Saulo thoq mas jweh lyis Dawi gas hau toenk yoeus las bat shvpyo pyo kuot zis yah ma gis dah dyos gas Saulo jyank masyah thuq loh las doms huiq los los mus.