Read Achang 1 SAMUEL 17 Bible Online

1 SAMUEL 17 - Achang bible

1 SAMUEL 17

¹Gvshih Philisti jens gas jeszan das zis dius tsainh las Yuda mau, Sokho wus mas huom lha Sokho yahge Azeka jo Ephe-Damim mas dvp thoeng nyeis.

²Saulo yahge Israel jens eq dius tsainh las Ela langhkhau mha dvp thoeng lha Philisti jens lyis jeszan das zis sont nyeis.

³Philisti jens thyitvp jing mas, Israel jens haqtvp jing mas yap las nyamoq jo mas langhkhau kyo joq.

⁴Hauh uhlyis Philisti dvp mas 9 pe[32] thoq lyis nyhang dah Goliat ge Gat dius, thoeuqzoe dvyuk thuq los.

⁵Nyang gas thunk uhkyop kyop, 125 paung ko dah thunk dyi wuot.

⁶Thunk khyeitsungh tsungh las kvtoq jo mas eq thunk lham wons chi.

⁷Lham yau gas yoqmuh iq bos, lham thyoh gas thyeq 15 paung lyei. Nyah gos wons dyei soeu dvyuk nyah xik mas loh.

⁸Goliat gas Israel dah jesphung xik mas yap las taiq zis gas, namoq jeszan das zis chamus sont goh? Ngos gas Philisti dius, namoq gas Saulo dah jons ma nghuot lah? Dius dvyuk khyen kat las ngos yah lyih zan-goh nhang aq.

⁹Nyang ngos lyis zan las yoh sat lyis, ngamoq namoq jons duot das. Ngos yuk nyang lyis ung lha yoh sat lyis gas, namoq ngamoq dah jons duot das las ngamoq lyis phuqsoe das, ge.

¹⁰Philisti phoq taiq shih zis gas, Khvnyhik ngos Israel jesphung lhyi nyings nyhih. Ngos yah zan-goh das xiklyis dius dvyuk khyen nhang kat geh, ge.

¹¹Hauh Philisti phoq nyings nyhih dang Saulo yahge Israel jens xauhgyo lyis nyamoq ehnyet thank las svsoh tsain gyuk.

¹²Dawi gas Yuda mau Betlehem wus mas nyeis Ephrat dius Yese dah lo nghuot. Yese loloeu xet yuk yoh. Nyang gas Saulo dah zaih lyis manglo[33] nghuot goeus.

¹³Nyah loxeih somh yuk gas Saulo thang mha chank las jes muh wons bang nghuot. Hau jes muh wons bang somh yuk dah nyings gas: lomons yuk Eliab, nyah thang mha soeu ka Abinadab, somh vyuk gas Shama nghuot.

¹⁴Dawi gas lothank nghuot: lobes somh yuk gas Saulo thang mha chank uhlyis,

¹⁵Dawi gas Saulo jyank mas eq loh, Betlehem mas nyah uwus dah yvng eq yoeuh las e los suh nyeis.

¹⁶Goliat gas nyeici nyeih nyenh khanghmuh nvp khanghmuh los thuq xoeuq las nyings nyhih.

¹⁷Yese nyah lo Dawi lyis taiq zis gas, Hai Misshenh 8 pan nyet[34] sunghso dvci lhyoq yoeus las dvp thoeng yvmas nah vmang moq lyis wons loh dyei aq.

¹⁸Haih nauhcoeu tungh dvci koeuq eq nyamoq dah khyoenghsoe lhyi guon dah zau lyis dyei aq. Nah vmang moq yanghzan ma yanghzan zis yoeuh las nyamoq masyah kanghjyoeng yoeus los aq.

¹⁹Hwankti Saulo, nah vmang moq yahge Israel jens dvnganhmoq Ela langhkhau mha Philisti jens lyis zan nyeis, ge.

²⁰Dawi gas nvp lyis noq yah toq las, yvng lyis yvng yoeuh soeu jyank mas kyauh khoq las Yese tying kat zis yah dvyhangteh zonoms yoeus las loh. Nyang dvp mas jweh lyis jeszan hoeu thwe kaiq las jeszan das xiklyis jeszan joqyos pheh Israel jens thuq los langh.

²¹Israel jesphung yahge Philisti jesphung jens jeszan das xiklyis nyoqnho changh xoeu lha jens goh toh.

²²Dawi gas nyang chi loh dah vyhang zokho ba bang loq mas kyauh lho lha jeszan joqyos pheh wuih wvng zis yah nyah vmang moq lyis jeshuh.

²³Nyang nyamoq yah jisgoh nyeis lyis, yoeuh aq, Philisti dius, Gat mas dah Goliat ge thoeuqzoe gas Philisti dvp masyah thuq los las xik pheh teh nyings nyhih nyeis. Hauh yvlyis Dawi xauhgyo.

²⁴Israel dvnganhmoq nyang lyis nyvng lyis svsoh gyuk las phang.

²⁵Israel jens taiq zis gas, Hai doq los nyeis soeu lhyi namoq vnyvng goh lah? Israel lyis nyings nyhih las thuq los. Nyang lyis sat soeu lhyi hwankti ka jyungshuk zainsmuh yah chungh das, nyah lonyi lyis eq dyeizo das, nyah uwus yhenbang lyis eq Israel mas khoengh ma kat nhang lo, ge.

²⁶Dawi nyah nvm mas bang lyis taiq zis gas, Hau Philisti phoq lyis sat las, Israel xauh dah xoqphuh cho lhyi yoh shang tyamp soeu chah vkyuh yoh das? Kang dwis Mangso dah jesphung lhyi nyings nyhih das zis, vthyoh ma tyomh dah hau Philisti gas khasoeh teh soeu nghuot lah, ge.

²⁷Nyamoq phuk taiq zis gas, Hauh Goliat lhyi sat soeu lhyi haih jyungshuk yoh das, ge xikpheh vgus doms tsain taiq.

²⁸Nyang dius jens yah taiq goh nyeis yvlyis nyah mangmuh Eliab xauhgyo lyis nyang Dawi lyis nhaiqyo las taiq zis gas, Nvng heimha cha los kuot? Hau ma tham ma mus dah yvng lyis mhanhdyvp mas hank yah toh khoq? Nvng khwank, lhung cho ngos seq. Nvng jeszan zis yoeuh das xiklyis dvlos, ge.

²⁹Dawi taiq zis gas, Gvshih ngos cha cu? Ngos nyei dais ma bos lhyeh, ge.

³⁰Nyang nungs phuk las, gohtoeu dvyuk lyis vkhang teh doms nyei. Hauh soeu eq vkhang vgus doms taiq.

³¹Dawi taiq dang tsain xauhgyo lyis nyamoq gas Saulo xikkhonh mas tsain taiq kyoh lyis, nyang lyis khi.

³²Dawi Saulo lyis taiq zis gas, Hauh soeu gvng mas hank eq ehnyet vthank goh, nah jyeidwis hau Philisti phoq lyis zan das, ge.

³³Saulo Dawi lyis taiq zis gas, Nvng hau Philisti dius lyis ma e yoh zan, nvng loshang dvnghuot shih: hauh soeu ka ngis shih yoq lyis yah jes muh wons goeus, ge.

³⁴Dawi Saulo lyis taiq zis gas, Nah jyeidwis ngah uwus dah yvng yoeuh nyeis uhlyis khangkhyi, woms los las yvng phung mhayah yvnglo yoeus loh.

³⁵Ngos gas hauh yvlyis chank khat sat las yvnglo lyis nyah nhuot masyah khyuot yoeus. Ngos lyis dyvm ngat los lyis nyah mauh mas lang las bat sat.

³⁶Housoeh nah jyeidwis ngos khangkhyi lhyi eq, woms lyis eq yoh sat. Hau vthyoh ma tyomh dah Philisti dius eq dwis nyeis Mangso dah jesphung lhyi nyings nyhih yvmvyah housoeh nghuot das, ge.

³⁷Hauh thoq lyis Dawi taiq shih zis gas, Khangkhyi yahge woms dah nhuot masyah ngos lyis khyuot yoeus dah YHENSAIN ka hau Philisti phoq dah loq masyah eq khyuot yoeus das, ge. Saulo Dawi lyis taiq zis gas, Loh aq, YHENSAIN ka nvng yah nghuot das, ge.

³⁸Saulo ka nyah jesgungs Dawi lyis wuot nhang. Thunk uhkyop nyah uhloms mas tsungh dyei, thunk dyi eq gvm huot.

³⁹Dawi gas nyah jesgungs thoq mas sham wons las suh yoeuh lyis ma kuot ku lha ma yoh wuot. Housoeh las Dawi Saulo lyis taiq zis gas, Haih jesgungs yah ngos ma yoh loh, ma laih, ge khyuot tyamp.

⁴⁰Housoeh nyah lhamloq chi lha jeiskhyoh mas dah lukjyot oeng lom kui chi lha nyang yvng yoeuh lyis wons dah ihtsung mha kat. Nyah loq mas panh cicont chi lha Goliat jyank pheh e loh.

⁴¹Philisti phoq eq Dawi jyank pheh los las, nyah sham lham wons soeu ka nyah xik pheh loh. Nyang zes zes ni los las,

⁴²nyang Dawi lyis vlhomuh nyvng lyis ma phauh ma danh kuot: khasoeh ge lyis nyang ngis shih, cam eq nes las yungh soeu nghuot.

⁴³Nyang Dawi lyis taiq zis gas, Nvng gas lhamloq yah ngah jyank mas los das zis gas ngos lvkhuih lah, ge. Nyang nyah mangso jens lyis lui las Dawi lyis nhoengh.

⁴⁴Nyang Dawi lyis taiq zis gas, Los aq, ngos nah shoh mau mas nghoq yahge mhanhdyvp yewus lyis tsoh bah, ge.

⁴⁵Dawi toeuh zis gas, Nvng ngah jyank mas moengsa, lham, gos yah los. Nghuot laus eq ngos gas nvng nyings nyhih nyeis, Israel jesphung dah Mangso, Yomzains YHENSAIN dah nyings masyah nah jyank mas los.

⁴⁶YHENSAIN ka khvnyhik nvng lyis ngah loq mas kyauh zis yah ngos nvng lyis sat las lainzain thyet das. Philisti jesphung dah mvng, mau mas nghoq yahge mhanhdyvp yewus lyis dyei das. Housoeh Israel mas Mangso bos yvlyis nyeisjvng gonh yoh seq das.

⁴⁷YHENSAIN ka sham lham yah khyuot zis ma nghuot yvlyis haih dius huom yoh seq das: khasoeh ge lyis haih jes cho ka YHENSAIN zis nghuot las ngamoq loq mas kyauh das, ge.

⁴⁸Goliat gas Dawi yah doms zes ni los. Dawi eq Goliat lyis zan das xiklyis jesphung shot pheh lvnyap wuih loh.

⁴⁹Dawi gas nyah ihtsung mhayah luk dvlom lap las Goliat jyank pheh panh kat. Hauh zis gas Goliat dah ngelang lyis loh zangh las ngelang phuk las nyang nyeisjvng mas gop gyoh loh.

⁵⁰Housoeh Dawi gas luk panh dvlom yah Philisti phoq lyis ung lha sat. Nghuot laus eq Dawi loq mas sham ma chi.

⁵¹Housoeh Dawi wuih las Philisti phoq dah vyvm mas loh yap zis yah nyah sham dyvng masyah moengsa she lha nyah lainzain thyet zis yah nyang lyis tyeh sat. Philisti jens gas nyamoq dah thoeuqzoe shei yvlyis nyvng las tsain phang.

⁵²Hauh uhlyis Israel jens yahge Yuda jens gas toq kaiq hoeu lha Philisti jens lyis langhkhau[35] jweh shoq, Ekron wus khomh jweh shoq chank khat. Dvmdap dah Philisti jens gas Sharaim wus choyvm chank yah Gat wus, Ekron jweh shoq lains joq.

⁵³Israel jens gas Philisti jens lyis khat masyah tauh los las Philisti jens dah zvng khau mha dah zisyos yoeus loh.

⁵⁴Dawi gas Goliat dah uhloms lyis Yerusalem pheh yoeus loh, nghuot laus eq nyang Goliat dah jes sham jes lham lhyi ka nyah zvng mas toh.

⁵⁵Dawi Goliat lyis zan das ge thuq loh uhlyis Saulo nyvng lyis, nyang Abna lyis nyei zis gas, Jesphung dah zau Abna eh, haih loyvm phoq gas hank lo lah, ge. Abna gas, Hwankti eh, nvng kang dwis zis yah dvyhangteh, ngos ma seq, ge.

⁵⁶Hwankti taiq zis gas, Hauh loyvm hank lo nghuot zis choq aq, ge.

⁵⁷Dawi Goliat lyis sat las, nyah uhloms chi lha tauh los lyis, Abna gas nyang lyis Saulo dah xikkhonh mas shwih loh.

⁵⁸Saulo nyang lyis nyei zis gas, Loyvm phoq eh, nvng hank lo gah, ge. Dawi phuk taiq zis gas, Ngos gas Betlehem wus mas nyeis nah jyeidwis, Yese dah lo nghuot, ge.